Esekiele 31 - Tosi Tapu

Folafola fakatata o le sete o Lipane

¹ I le fetuu kau agafulu tupu tasi, i le uluaki aso o le masina tolu, na tuku mai loa kiate au le folafola a le Eteleno, o pati :

² Vosa o le tagata, pati kia Falaone, le sau o Esipito, ti mo lona kakai katoa : Ko ai loa e tatau mo koe, a koe leia e lasi kese ?

³ Ko leinei, ko Asilia ko se sete lasi o Lipane ; Na fulumalilie ona laa, Na matotolu ona lau, ti na taualuga a ia, Ti na fakalaka lona tumutumu i laakau fuli.

⁴ Na fakavai a ia e vai o ua o tupu lasi, Na fakasomo a ia e vai o le kele o taualuga ; Na tafe ni vaitafe i tafatafa o le ganea leia na to ai a ia, Ti na lotou ave olatou magai liua ki laakau fuli o faisaga.

⁵ Koia leia e malaga ai lona kuaga o taualuga i laakau fuli o faisaga, Na liuliuga ona laa, na mafolafola ona taulu, O tupu ko le lasi o le vai leia na fakavai ia a ia.

⁶ Na fai ofaga a manu lele fuli o le lagi i ona laa, Na fanaunau a manu fuli o le vao i lalo o ona laa, Ti na nonofo ni puleaga mauke i lona malu.

⁷ Na fulumalie a ia i lona lasi, mo le mafolafola o ona laa, Talie na ogo loloto ona aka i ni vai lasi.

⁸ Na leaise fakalaka ake iate ia a sete o le oloto a le Atua, Na leaise tatau se laa o se sipele mo ona laa, Ti na leaise tatau se lau o se palatane mo lona lau ; Na leaise tatau se laakau i le oloto o le Atua mo ia i le lasi ai o lona fulumalie.

⁹ Na kau fakafulumalie a ia ki ni laa mauke, Ti na manumanu kiate ia a laakau fuli o Eteni, i le oloto a le Atua.

¹⁰ Koia e folafola ai le Aliki, le Eteleno, o pati : O tupu na malaga lona kuaga ki aluga, O tupu na malaga lona tumutumu i laakau fuli o le vaomatua, Ti na fia nealasi lona loto i lona taualuga,

¹¹ Ko leinei, na kau tuku a ia ki lima o le toa o atu puleaga, Leia e tautea ia loa a ia o mulimuli ki lona agaveli ; talie na kau kapu a ia.

¹² Na sele a ia, o tiaki i lalo, e ni kau matapule, Latou ala e agamakeke i kakai fuli ; Na vivilo ona laa i mauga mo vaivailiua fuli, Na fatifati ona taulu i vanu fuli o le fenua ; Ti na sosola le kakai katoa o le malama nei i lona malu, Ti na lotou tiaki a ia.

¹³ Na au a manu lele fuli o le lagi o tutuu i ona laa fatifati, Ti na fai e manu fuli o le vao olatou nofoaga ki ona taulu,

¹⁴ O tupu ke aua na toe malaga ki aluga taulu o laakau fuli ala e tuu i tafatafa o le vai, Ti ke aua na toe masiki olatou tumutumu i laakau o le vaomatua, Ti ke aua na toe taualuga a sene fuli ala e fakavai tuumau. Talie kua tuku ki le mate a nea fuli mo fanau a le tagata, Ti e lotou ifo loa ki le loloto o le kele, Mo latou ala e ifo ki le popoko.

¹⁵ Koia e folafola ai le Aliki, le Eteleno, o pati : I le aso leia na ifo ai a ia ki le nofoaga o le kau mate, Na kau liligi le mamae, na kau tapono le vanu o tupu ko ia, Ti na kau taofi a vaitafe ; Na taofi a atu vai lalasi. Na kau tuku ke mamae le loto o Lipane o tupu ko ia, Ti na fakamalo loa a laakau fuli o le vao.

¹⁶ I le gugulu o lona vilo na kau fakalulu a atu puleaga I le aso leia na kau tuku ai a ia ki le nofoaga o le kau mate, Mo latou ala e ifo ki le popoko ; Ko laakau fuli o Eteni na fimalie i potu loloto o le kele, Laakau fulumalilie mo malilie o Lipane, ala na fakavai fuli e atu vai.

¹⁷ Na lotou ifo foki mo ia ki le nofoaga o le kau mate, Kia latou ala na mamate i le seleta ; Ko latou ana ko lona lima, ti na lotou nonofo i lona malu i loto malie o atu puleaga.

¹⁸ Ko ai e tatau mo koe i le kololia mo le taualuga, I laakau fuli o Eteni ? E ti loa a koe mo laakau o Eteni Ki potu loloto o le kele, E ke moe loa i loto malie o le kau lee silikosisio, Mo latou ala na mamate i le seleta. Ko lena le anoaga o Falaone mo lona kakai katoa ! E pati le Aliki, le Eteleno.