Esekiele 30 - Tosi Tapu

Tagi ki le vilo o Esipito

¹ Na tuku mai loa kiate au le folafola a le Eteleno, o pati :

² Vosa o le tagata, kikite, ti ke pati : E folafola le Aliki, le Eteleno, o pati : Kotou tagi laulau !… Ei aso malaia !

³ Talie kua ofi mai le aso, kua ofi mai le aso o le Eteleno, Aso fakapouli : Ko le aso loa lena o atu puleaga.

⁴ E oso loa le seleta ki Esipito, Ti e nofo loa se i lasi i Etiopia, Mo ka vivilo loa a mate i Esipito, Mo ka too loa ona koloa, Ti mo ka maumau loa ona fakatafito.

⁵ Ko Etiopia, mo Puti, mo Luti, mo Alapia katoa, mo Kupi, Ti mo vosa o le fenua leia e kau mo latou, E vivilo loa mo latou i le seleta ;

⁶ Koia e folafola ai le Eteleno, o pati : E lotou vivilo loa, latou ala e tokoi ki Esipito, Ti e tuku loa ki lalo le fia nealasi o lona makeke ; Mei Miketoli o kaku ki Siene e lotou vivilo loa i le seleta, E pati le Aliki, le Eteleno.

⁷ E liliu loa le fenua ko se kele toafa i lotolotoga o kele toafa, Ti e kau loa ona kolo i kolo maumau.

⁸ Ti e lotou iloa loa ko au ko le Eteleno, Mo ka kau tuku ia loa le afi ki Esipito, Ti mo ka kau fatifati loa latou fuli ala e tokoi kiate ia.

⁹ I le aso lena, e kakau loa ni tagata avelogo i ni vaka, Ke ano o too le tokamalie i Etiopia ; Ti e nofo loa le i ia latou i le aso o Esipito, Talie ko leinei, kua vave fua a nea ana !

¹⁰ Koia e folafola ai le Aliki, le Eteleno, o pati : E kau fakapuli loa le kakai toka api o Esipito I le lima o Nepukatenesale, le sau o Papilone.

¹¹ E aumai loa a ia mo lona kakai, Leia ko le kakai itaita veli i kakai fuli, Ke maumaui ia le fenua ; E lotou taui loa Esipito ki le seleta, Ti e lotou fakaapele loa le fenua ki mate.

¹² E kau fakamalo ia loa a magai vaitafe, E kau tuku loa le fenua ki lima o le kau agaveli ; E kau maumaui loa le fenua mo nea fuli e maua i ai, i le lima o ni kau matapule. Ko au, le Eteleno, na kau masau.

¹³ Koia e folafola ai le Aliki, le Eteleno, o pati : E kau fakapuli loa a taulaatua, Ti e kau fakapuli loa i Nofi a fakatata noa ; E leaise toe maua loa se pule i le fenua o Esipito, Talie e kau fakamafola loa le i i le fenua o Esipito.

¹⁴ E kau maumaui loa Patolosi, E kau tutu loa ki le afi Tesoane, Ti e kau fai loa aku fakamaau ki No.

¹⁵ E kau liligi loa loku sausau ki Sini, le kolo tau o Esipito ; Ti e kau tuuti loa le kakai toka api o No iate ia.

¹⁶ E kau tuku loa le afi ki Esipito ; Ti e mamae lasi loa Sini, E mavaa loa a No i le pu o lona kaua, Ti e maua loa a Nofi e ona fili i loto malie o le ao.

¹⁷ E vivilo loa i le seleta Le kau tupulaga o Oni mo Pipeseti, Ti e ano loa a kolo ana ki le popula.

¹⁸ E fakapouli loa le aso i Takepanese, Mo ka kau fatii loa i ai le laakau a Esipito, Ti mo ka kau fakagato loa i ai le fia nealasi o lona makeke ; E uufi loa e se ao Takepanese, Ti e ano loa ona taineliki ki le popula.

¹⁹ E kau fai loa aku fakamaau ki Esipito, Ti e lotou iloa loa ko au ko le Eteleno.

²⁰ I le fetuu kau agafulu tupu tasi, i le aso fitu o le uluaki masina, na tuku mai loa kiate au le folafola a le Eteleno, o pati :

²¹ Vosa o le tagata, kua kau fatii le lima o Falaone, le sau o Esipito ; Ti ko leinei, na leaise faitoo le lima ke malie, Na leaise sai a ia ki se kie Ke sosoko ona ivi ti ke fakamakeke ai, O tupu ke toe feala lana too le seleta.

²² Koia e folafola ai le Aliki, le Eteleno, o pati : Ko leinei, e kau mamafa kia Falaone, sau o Esipito, Ti e kau fatii loa ona lima, Leia e malie mo leia kua fati, Ti e kau fakavilo loa le seleta i lona lima.

²³ E kau veteki loa le kau Esipito i atu puleaga, E kau fakamavetevete loa latou i fenua kesekese.

²⁴ E kau fakamakeke loa a lima o le sau o Papilone, Ti e kau tuku loa laku seleta ki lona lima ; E kau fatii loa a lima o Falaone, Ti e tagi laulau loa a ia i mua o le sau o Papilone ofaipe le tagi a latou ala ka mamate.

²⁵ E kau fakamakeke loa a lima o le sau o Papilone, Kae vilo loa ki lalo a lima o Falaone. Ti e lotou iloa loa ko au ko le Eteleno, Mo ka kau tuku loa laku seleta ki le lima o le sau o Papilone, Ti ka siki loa e ia a ia ki le fenua o Esipito.

²⁶ E kau fakamavetevete loa le kau Esipito i atu puleaga, E kau veteki loa latou i fenua kesekese, Ti e lotou iloa loa ko au ko le Eteleno.