Esekiele 3 - Tosi Tapu

Esekiele, tagata leo

¹ Na pati mai a ia kiate au : Vosa o le tagata, kai le nea leia e ke maua, kai le tosi lena, ti ke ano, ti ke masau ki le fale o Iselaele !

² Na kau fakamaga loa loku gutu, ti na fagai loa e ia au ki le takaiga tosi lena.

³ Na pati mai loa a ia kiate au : Vosa o le tagata, fagai lou manava ti fakaapele ou tootooga ki le takaiga tosi leia e kau soli atu kiate koe ! Na kau kai loa a ia, ti na suamalie loa a ia i loku gutu ofaipe le sua meli.

⁴ Na pati mai a ia kiate au : Vosa o le tagata, ano ki le fale o Iselaele, ti ke fakasa kia latou aku folafola !

⁵ Talie e leaise kau kakau a koe ki se kakai leia e maua ia se masau kese pe ko se masau faigataa ; kae ko le kakai o Iselaele.

⁶ E leaise ko ni kakai toka api ala e maua ia se masau kese pe faigataa, leia e leaise ke matala loa ki alatou masau. Kapau na kau kakau a koe kia latou, kua lotou fakalogo loa kiate koe.

⁷ Kae e leaise loto loa le fale o Iselaele ke fakalogo kiate koe, talie e leaise fia fakalogo a ia kiate au ; talie kua fia nealasi ti mo ulu fefeka le fale katoa o Iselaele.

⁸ Ko leinei e kau fakafefeka loa ou mata ke ke fakatau ki olatou mata ; e kau fakafefeka loa lou lae, ke ke fakatau ki olatou lae.

⁹ E kau fakaliliu loa lou lae ofaipe se fa taimane, ke fefeka ake i le makasinu. Aua na ke i kia latou, logo ai ko se famili latou o ni kakai agatuu.

¹⁰ Na pati mai a ia kiate au : Vosa o le tagata, ke ke tali i lou loto ti mo fakalogo mai ou taliga ki folafola fuli ala e kau fakasa atu loa kiate koe !

¹¹ Ano ki le kau popula, ki fanau o lou kakai ; e ke masau loa kia latou, tatau aifai pe lotou fakalogo pe leaise lotou fakalogo, kae e ke pati loa kia latou : Ko leinei le folafola a le Aliki, le Eteleno.

¹² Ti na ave loa au e le Laumalie, ti na kau logo loa ki se leo i oku tua ofaipe se gugulu lasi : Ke tapusa le kololia o le Eteleno i lona agaiaga !

¹³ Na kau logo loa ki le tapata o kapakau o manu, ala na feuluaki, mo le logoa o teka i olatou tafa, mo se logoa o le gugulu lasi.

¹⁴ Ti na siki loa au e le Laumalie, o ave. Na kau ano loa i le loto mamae mo le loto itaita, kae na gaoi makeke le lima o le Eteleno kiate au.

¹⁵ Na kau kaku loa ki Teleapipi, ki le kau popula ala na nonofo i tafa o le vaitafe o Kepale, i le ganea leia na lotou nonofo ai ; i ai na kau nofo loa mo latou i aso e fitu, o talitali mo se loto punamauli lasi.

¹⁶ I le sili o aso e fitu, na tuku mai loa le folafola a le Eteleno kiate au, o pati :

¹⁷ Vosa o le tagata, e kau fakanofo loa a koe ko le tagata leo ki le fale o Iselaele. E ke fakalogo loa ki le folafola leia e vilo atu loa i loku gutu, ti e ke fakasa loa kia latou aku valoki.

¹⁸ Ka kau pati loa ki le tagata agaveli : E ke mate loa ! kapau e leaise ke valoki loa a ia, kapau e leaise ke masau ke tafoki le tagata agaveli i lona ala veli ti ke saofaki ai lona mauli, e mate loa le tagata agaveli lena i lana agaveli, ti e kau afa atu loa kiate koe lona toto.

¹⁹ Kae kapau e ke valoki le tagata agaveli, kae e leaise tafoki a ia i lana agaveli mo lona ala veli, ti e mate loa a ia i lana agaveli, ti ko koe, e ke saofaki loa lou laumalie.

²⁰ Kapau e tafoki se tagata faitotonu i lana faitotonu o fai le nea leia e veli, e kau fakatuu loa se masele i ona mua, ti e mate loa a ia ; talie na leaise ke valoki a ia, e mate loa a ia i lana agasala, e leaise toe masau loa ki le faitotonu leia na fai e ia i mua, ti e kau toe afa atu loa kiate koe lona toto.

²¹ Kae kapau e ke valoki le tagata faitotonu ke aua na agasala, ti e leaise toe agasala a ia, e mauli loa a ia, talie na fakalogo a ia ki le valoki leia na ke fai kiate ia, ti ko koe, e ke saofaki loa lou laumalie.

²² I ai foki, na teki le lima o le Eteleno kiate au, ti na pati mai a ia kiate au : Tuu ki aluga, ano ki le vaivailiua, ti e kau folafola atu loa kiate koe i ai.

²³ Na kau tuu ake loa ki aluga, ti na kau ano loa ki le vaivailiua ; ti ko leinei, na sa loa i ai le kololia o le Eteleno, ofaipe le kololia leia na kau tio ki ai i tafa o le vaitafe o Kepale. Ti na kau fakamapee loa o fakapulou oku mata ki le kele.

²⁴ Na ulu loa le Laumalie kiate au, ti na fakatuu loa e ia au i oku vae. Ti na folafola mai loa le Eteleno kiate au, o pati : Ano, o ulu ki loto o lou fale, ti ke tapono a ia.

²⁵ Vosa o le tagata, ko leinei, e sai loa a koe ki ni maea, o tupu ke aua na ke ano kia latou.

²⁶ E kau fakapipiki loa lou alelo ki lou kaugutu, o tupu ke ke gutu mate, ti ke aua na ke valoki latou, talie ko se famili latou o ni kakai agatuu.

²⁷ Ti ka kau masau atu loa kiate koe, e kau fakamavaa loa lou gutu, o tupu ke ke pati kia latou : Ko leinei le folafola a le Aliki, le Eteleno. Ko leia e loto ke fakalogo ke fakalogo, ko leia e leaise loto ke fakalogo ke aua na fakalogo, talie ko se famili o ni kau agatuu.