Esekiele 29 - Tosi Tapu

Folafola kikite ki Esipito mo Falaone

¹ I le fetuu kau agafulu, i le aso kau agafulu tupu lua o le masina kau agafulu, na tuku mai loa kiate au le folafola a le Eteleno, o pati :

² Vosa o le tagata, mafuli ou mata kia Falaone, sau o Esipito, Ti ke kikite kiate ia mo Esipito katoa !

³ Masau, ti ke pati loa : E folafola le Aliki, le Eteleno, o pati : Ko leinei, e kau mamafa kiate koe, Falaone, sau o Esipito, Kolokotile lasi, leia e moe i loto malie o ou vaitafe, Leia e pati : Ko loku vaitafe, ko au leia na fai ia a ia !

⁴ E kau tuii loa se matau ki ou kaugutu, E kau fakapipiki loa ki ou unafi a ika o ou vaitafe, Ti e kau toso loa a koe mei loto malie o ou vaitafe Mo ika fuli ala e maua i ai Ti na pipiki loa ki ou unafi.

⁵ E kau ti loa a koe ki le toafa, A koe mo ika fuli o ou vaitafe. E ke vilo loa ki loto o faisaga, E leaise toe fakatuu ake loa a koe pe tanu loa a koe ; Talie e kau tuku loa a koe ke kai E manu o le kele mo manu lele o le lagi.

⁶ Ti e iloa loa e le kakai katoa o Esipito ko au ko le Eteleno, Talie ko lalatou tokoi ki le fale o Iselaele ko se fa u gaegae.

⁷ I lalatou too a koe i le lima, na ke fati, Ti na ke saei lolatou tuauma katoa ; I lalatou fanaki kiate koe, na ke fati, Ti na ke fakapalalisia olatou ifiifi.

⁸ Koia e folafola ai le Aliki, le Eteleno, o pati : Ko leinei e kau aumai loa kiate koe le seleta, Ti e kau tuuti loa iate koe a tagata mo manu.

⁹ Ti e lavaki loa mo vaoa le fenua o Esipito. Ti e lotou iloa loa ko au ko le Eteleno, Talie na pati a ia : Ko le vaitafe a aku, ko au leia na fakatupu ia a ia !

¹⁰ Koia e kau mamafa ai kiate koe mo ou vaitafe, Ti e kau fakaliliu loa le fenua o Esipito ke toafa mo vaoa, Mei Miketoli o kaku ki Siene ti mo koiga o Etiopia.

¹¹ E leaise toe ano loa i ai se vae o se tagata, E leaise toe ano loa i ai se vae o se manu, Ti e leaise nofoi loa a ia e se kakai i fetuu e kau fa.

¹² E kau fakaliliu loa le fenua o Esipito ko se fenua toafa o lasi ake i fenua fuli kua toafa, Ti e kau maumaui loa ona kolo o lasi ake i kolo fuli kua maumaui, I le lolotoga o fetuu e kau fa. E kau veteki loa le kau Esipito i atu puleaga, E kau fakamavetevete loa latou i fenua kesekese.

¹³ Koia e folafola ai le Aliki, le Eteleno, o pati : Ka oki loa fetuu e kau fa e kau fakatasi loa le kau Esipito Mei puleaga ala na lotou mavetevete ai.

¹⁴ E kau toe aumai loa le kau popula o Esipito, E kau toe aumai loa latou ki le fenua o Patolosi, Ki le fenua leia na lotou tupu ai ; Kae e lotou liliu loa i ai ko se puleaga gaegae.

¹⁵ Ko le puleaga ikiiki oki loa a ia i atu puleaga fuli, Ti e leaise toe malaga loa a ia i aluga o atu puleaga, Talie e kau fakaikiiki loa a ia o tupu ke aua na toe pule a ia i atu puleaga.

¹⁶ E leaise toe liliu loa le puleaga lena ko se fanakiaga ki le fale o Iselaele ; E fakamanatu loa e ia ki Iselaele lana agasala, i le aso leia na tuku ai lana fanaki kiate ia. Ti e lotou iloa loa ko au ko le Aliki, le Eteleno.

Ko le too o Esipito e Nepukatenesale

¹⁷ I le fetuu kau lua tupu fitu, i le uluaki aso o le uluaki masina, na tuku mai loa kiate au le folafola a le Eteleno, o pati :

¹⁸ Vosa o le tagata, ko Nepukatenesale, sau o Papilone, Na tuku ki lana solia ke fai ia se gaoi faigataa ki Tile ; Kua tula fuli a ulu, Kua makolokolo fuli a tuauma ; Kae na leaise maua e ia se totogi i Tile, e ia mo lana kau solia, O uiga mo le gaoi leia na fai e ia ki Tile.

¹⁹ Koia e folafola ai le Aliki, le Eteleno, o pati : Ko leinei, e kau tuku kia Nepukatenesale, sau o Papilone, Le fenua o Esipito ; E too loa e ia ona koloa, E maumaui loa e ia a ia E ave loa e ia ni kakai Ke totogi ai lana kau solia.

²⁰ E kau soli kiate ia le fenua ko Esipito, Ke totogi ai le gaoi na fai e ia ki Tile, Talie na lotou gaoi kiate au, E pati le Aliki, le Eteleno.

²¹ I le aso lena, e kau soli loa se makeke ki le fale o Iselaele, Ti e kau fakamavaa loa lou gutu, Esekiele, i loto malie o ona ; Ti e lotou iloa loa ko au ko le Eteleno.