Esekiele 28 - Tosi Tapu

Folafola kikite ki le sau o Tile

¹ Na tuku mai loa kiate au le folafola a le Eteleno, o pati :

² Vosa o le tagata, pati ki le sau o Tile : E folafola le Aliki, le Eteleno, o pati : Kua malaga ki aluga lou loto, ti kua ke pati : E kau Atua, E kau ekeeke i le ekeekeaga o le Atua, i le manava o atu tai ! Ko koe, e ke tagata kae e leaise ke Atua, Ti e ke too lou finegalo ki le finegalo o le Atua.

³ Ko leinei, e ke poto ake ia Taniela, E leaise munia se nea fakapulipuli kiate koe ;

⁴ I lou poto mo lou atamai, na ke totogi ni koloa kiate koe, Na ke tanaki se aulo mo se paaga i ou fale koloa ;

⁵ I lou poto lasi mo lau fai koloa Na ke fakatupu o lasi ou koloa, Ti na malaga ki aluga lou loto o tupu ko ou koloa.

⁶ Koia e folafola ai le Aliki, le Eteleno, o pati : O tupu na ke too lou finegalo ki le finegalo o le Atua,

⁷ Ko leinei, e kau aumai loa kiate koe ni matapule, A kakai itaita veli o atu puleaga ; E lotou tosoi loa le seleta ki lou poto lasi, Ti e lotou fakakelekele loa lou fulumalie.

⁸ E lotou ti loa a koe ki le popoko, Ti e ke mate loa ofaipe latou ala e mamate lavelavea I loto malie o le tai.

⁹ Pe ke pati loa i mua o le tagata leia e tamate ia loa a koe : E kau Atua ? E ke tagata loa kae e leaise ke Atua, I le lima o leia e tamate ia loa a koe.

¹⁰ E ke mate loa i le mate o le kau lee silikosisio, I le lima o le kau matapule. Talie ko au, na kau masau, E pati le Aliki, le Eteleno.

¹¹ Na tuku mai loa kiate au le folafola a le Eteleno, o pati :

¹² Vosa o le tagata, Fai se tagi laulau ki le sau o Tile ! E ke pati loa kiate ia : E folafola le Aliki, le Eteleno, o pati : Na ke liliu ko se paaki totonu o le malie tukupau, Na ke apele i le poto, na ke malie tukupau i le fulumalie.

¹³ Na ke nofo i Eteni, i le oloto o le Atua ; Na kofu a koe ki fatu mauiga fuli, Ki le saletuane, mo le topasi, mo le taimane, Ki le kilisolite, mo le onise, mo le sasepe, Ki le safile, mo le kelenate, mo le emelote ti mo le aulo : I le aso leia na fakatupu ai a koe, Na ke teu ki ni nea fakateuteu mauiga.

¹⁴ Na ke nofo ko se selupino leoleo, leia na folasi ia ona kapakau ; Na kau fakanofo a koe i le mauga maokioki o le Atua, Na ke saele i loto malie o fatu gigila.

¹⁵ Na ke saosaoa i ou ala, Mei le aso leia na fakatupu ai a koe, O kaku ki le aso leia na maua ai le agaveli iate koe.

¹⁶ O tupu ko le lasi o lau fai koloa Na ke apele i le agamakeke, ti na ke agasala ; E kau ti a koe ki lalo i le mauga maokioki o le Atua, Ti e kau kapu a koe, selupino leoleo, I loto malie o fatu gigila.

¹⁷ Na malaga ki aluga lou loto o tupu ko lou fulumalie, Na ke fakakelekele lou poto ki lou kololia ; E kau ti a koe ki le kele, E kau tuku a koe ki mua o sau ke lotou tio kiate koe.

¹⁸ I le lasi o au agaveli, I le veli o lau fai koloa, Na ke fakakelekele ou sagatualio ; E kau fakamavae loa mei loto malie o ou se afi leia e kai ia loa a koe. E kau fakaliliu a koe ke mugalafu i le aluga o le kele, I mata o latou fuli ala e tio kiate koe.

¹⁹ Ko latou fuli ala e iloa ia a koe i atu kakai E ofolele o tupu ko koe ; Kua ke puli, e leaise toe maua loa a koe i se aso !

Folafola kikite ki Sitone

²⁰ Na tuku mai loa kiate au le folafola a le Eteleno, o pati :

²¹ Vosa o le tagata, tagaki ou mata ki Sitone, Ti ke kikite kiate ia !

²² E ke pati loa : E folafola le Aliki, le Eteleno, o pati : Ko leinei, e kau mamafa kiate koe, Sitone ! E kau fakasa loa loku kololia i loto malie o ou ; Ti e lotou iloa loa ko au ko le Eteleno, I le aso leia e kau fai ai loa aku fakamaau kiate ia, I le aso leia e kau fakasa ai loa loku maokioki i loto malie o ona.

²³ E kau kakau mai loa le taumasaki veli kiate ia, E kau fakatafe loa le toto i ona ala ; E vivilo loa a mate i loto malie o ona, I le seleta leia e au loa mei potu fuli o taai a ia. Ti e lotou iloa loa ko au ko le Eteleno.

²⁴ Ti e leaise toe liliu loa a ia ki le fale o Iselaele Ko se talai laakau leia e fakalavea ia, se laakau sukisuki leia e fakamasae ia, I lotolotoga o latou fuli ala e takatakai ia a ia ti e vesia kiate ia. Ti e lotou iloa loa ko au ko le Aliki, le Eteleno.

²⁵ E folafola le Aliki, le Eteleno, o pati : I le aso leia e kau fakatasii ai loa le fale o Iselaele i loto malie o kakai ala na mavete ai, e kau fakasa loa iate ia loku maokioki i mua o atu puleaga, ti e lotou nonofo loa i lolatou fenua leia na kau soli ki laku tagata fakasausau ko Sakopo.

²⁶ E lotou nonofo loa i ai i le tokamalie, ti e lotou fakatuu loa ni fale, ti e lotou to loa ni faisaga vite ; e lotou nonofo loa i ai i le fimalie, i le aso leia e kau fai ai loa aku fakamaau kia latou fuli ala e takatakai ia a ia mo vesia kiate ia. Ti e lotou iloa loa ko au ko le Eteleno, ko lolatou Atua.