Esekiele 27 - Tosi Tapu

Tagi laulau ki Tile

¹ Na tuku mai loa kiate au le folafola a le Eteleno, o pati :

² Ti ko koe, vosa o le tagata, Fai se tagi laulau ki Tile !

³ Ti ke pati loa ki Tile : A koe leia e tonatona i le mata tai, Ti e ke fai koloa mo kakai o ni motu mauke ! E folafola le Aliki, le Eteleno, o pati : Tile, na ke pati : E kau fulumalie o malie tukupau !

⁴ E tuu lou nofoaga i loto malie o atu tai ; Ko latou ala na fau ia a koe na fakaliliu ia a koe o malie tukupau i le fulumalie.

⁵ Na lotou teuteu a koe ki sipele o Senili ; Na lotou too ni sete o Lipane ke fai ai lou fana ;

⁶ Na lotou fau ou foe ki le sene o Pasani, Ti na lotou fau ou ekeekeaga ki le lei na gaoi i le sete Ti na aumai mei motu o Kitimi.

⁷ Na fai ou la mo ou manumanu Ki le kie tea fakamailoga o Esipito ; Na fai ou puipui Ki ni kie na pena usi mo kula mei atu motu o Sipele.

⁸ Ti ko kakai o Sitone mo Alevate na foe ia ou vaka, Ti na taki latou e lau kau tagata popoto, ei Tile.

⁹ Na nofo iate koe le kau matua o Kepale mo lana kau tufuga popoto, O fakafoou ou vaka. Na tau a vaka fuli o le tai kiate koe, mo olatou kau vaka, O totogi ou koloa.

¹⁰ Na kau i lau solia ni tagata mei Pelesi, mo Luti, mo Puti, Ko ni tagata tau latou ; Na lotou tautau alatou paletau mo olatou puloga tau i ou fale solia. Na lotou tuku le mauiga kiate koe.

¹¹ Na leo ou paa e ni tagata o Aleva, o fakatasi mo au tagata solia, Ti na nofo ni tagata toa i ou tule. Na lotou tau alatou paletau i ou paa fuli, Na lotou fakaliliu a koe o fulumalie tukupau.

¹² Na fai koloa mo koe le kakai o Talesisi, O tupu ko le lasi o ou koloa. Na lotou totogi ou koloa Ki le paaga, mo le ukamea, mo le etani, mo le pulu.

¹³ Na ke fai koloa mo Savani, mo Tupale, mo Meseke ; Na lotou soli kiate koe ni kau popula, mo ni nea gaoi sila, Ke totogi ai ou koloa.

¹⁴ Ko latou o le fale o Tokalama Na fakatau kiate koe ni osi, mo ni tagata ekeosi, mo ni mule.

¹⁵ Na fai koloa mo koe a fanau o Tetani ; Na fakalaka i ou lima a koloa o ni motu mauke ; Na totogi a koe ki ni tala o manu mo le epene.

¹⁶ Na fai koloa Silia mo koe, O tupu ko le lasi o ou koloa ; Na fakatau e ia kiate koe Le emelote, ni kie kula, ni kie tui fakamailoga, Ni kie tea, ni feo, mo ni fatu mauiga kula.

¹⁷ Kua fai koloa Suta mo le fenua o Iselaele mo koe : Na lotou soli kiate koe le fulumeto o Miniti, Ni kato, le meli, le lolo, ni nea fakamanogi, O totogi ai ou koloa.

¹⁸ Na fai koloa Tamaso mo koe, O tupu ko le lasi o ou koloa, O tupu ko le lasi o koloa kesekese na ke maua ; Na aumai e ia kiate koe le vino o Eleponi mo le fului ovi tea.

¹⁹ Na aumai e Vetani mo Savani, mei Usale, Ki ou fale koloa Le ukamea gigila, le sinamome, le u manogi.

²⁰ Na fai koloa Tetani mo koe, Na fakatau e ia kiate koe ni tupenu ke eke ai i osi.

²¹ Na fai koloa Alapia mo pule fuli o Ketale mo koe, Na lotou fakatau kiate koe ni akeno, mo ni ovi tagata, mo ni koti tagata.

²² Na fai koloa Sepa mo Laema mo koe ; Na lotou fakatau kiate koe ni nea fakamanogi mauiga kesekese, ni fatu mauiga kesekese, mo le aulo.

²³ Na fai koloa Salani mo koe, mo Kane, mo Eteni, Mo le kau fai koloa o Sepa, mo Asilia, mo Kilimati ;

²⁴ Na lotou aumai kiate koe ni kofu mauiga, Mo ni taupulupulu usi, mo ni kofu fakamailoga, Mo ni kie lanu kesekese ala na tanaki i ni pusa sete ti na saisai ki ni maea makeke.

²⁵ Na fetuku ou koloa e vaka o Talesisi ; Na ke nofo i le mou koloa lasi mo le kololia, I le loto malie o atu tai.

²⁶ Na ave a koe e latou ala na foe ia ou vaka ki le moana loloto : Na fatii a koe e se matagi mei le potu esite i loto malie o le moana.

²⁷ Ti ko ou koloa, mo ou fale koloa, mo au gaoiaga fuli, Au matelo mo ou kapiteni, Au kau tufuga vaka mo au kau fai koloa, Au tagata tau fuli ala e nonofo iate koe, Ti mo le kakai fuli leia e nofo iate koe, E vivilo loa ki le loto tai, I le aso o lou vilo.

²⁸ I le tagi o au kapiteni E galulu loa a mata tai i ou tafatafa ;

²⁹ Ti e ifo loa i olatou vaka le kau foevaka, Mo matelo, mo kapiteni fuli o le tai. E lotou tutuu loa i le kele ;

³⁰ E lotou tagi leo lasi loa o tupu ko koe, Ti e lotou tagi mamae loa kiate koe ; E lotou laku loa le efu ki olatou ulu, Ti e lotou fuliteka loa i le mugalafu ;

³¹ E lotou tele loa olatou ulu o tupu ko koe, E lotou tui loa ni taga, Ti e lotou fetagisi loa kiate koe, O tupu ko le mamae o olatou loto Mo lolatou alofa lasi kiate koe.

³² I lolatou mamae, e lotou sua loa se laumate kiate koe, E lotou tagi laulau loa kiate koe : Ko ai na tatau mo Tile, Na tatau mo le kolo lena kua maumau i loto malie o le tai ?

³³ I le temi leia na ke fetuku ai ou koloa i loto malie o le tai, Na ke fagai o makokona ni kakai toka api ; I le lasi o au nea kai mo ou koloa, Na ke fakakoloa ia a sau o le malama nei.

³⁴ Kae i le aso leia na fatii ai a koe e le tai, I le aso leia na ke puli ai i le tai loloto, Na vivilo fakatasi mo koe Ou koloa mo lou kakai toka api.

³⁵ Kua ofolele lasi le kakai fuli o atu motu o tupu ko koe, Kua i olatou sau, Kua sa lolatou lulu i olatou mata.

³⁶ Kua mapu le kau fai koloa o ni kakai matapule kiate koe ; Kua ke puli, ti e leaise toe maua loa a koe i se aso !