Esekiele 26 - Tosi Tapu

Folafola kikite ki Tile

¹ I le kau agafulu tupu tasi o fetuu, i le uluaki aso o le masina, na tuku mai loa kiate au le folafola a le Eteleno, o pati :

² Vosa o le tagata, o tupu na pati Tile ki Selusalemi : Aitoa ! Aitoa ! Kua fati a ia, le matapa o kakai fuli ! E mafuli mai kiate au, E kau apele loa i koloa, kae e toafa loa a ia !

³ O tupu ko le nea lena, e folafola le Aliki, le Eteleno, o pati : Ko leinei, e kau mamafa kiate koe, Tile ! E kau tuku loa ke pale kiate koe ni puleaga mauke, Ofaipe le pale o galu o le tai.

⁴ E lotou maumaui loa paa o Tile, E lotou soloi loa ona tule, Ti e kau ali loa lona efu iate ia ; E kau fakaliliu loa a ia ko se utu telefua ;

⁵ E liliu loa a ia i le tai ko se ganea e tautau ai loa kupega ; Talie na kau folafola, e pati le Aliki, le Eteleno. E liliu loa a ia ko le nea kai a atu puleaga.

⁶ Ko ona taineliki i lona kele totonu E tamatamate loa e le seleta. Ti e lotou iloa loa ko au ko le Eteleno.

⁷ Talie e folafola le Aliki, le Eteleno, o pati : Ko leinei, e kau aumai loa ki Tile i le potu noleto a Nepukatenesale, sau o Papilone, le sau o sau fuli, mo ni kau osi, mo ni kau saliote, mo ni kau tagata ekeosi, ti mo se kakai toka api.

⁸ Ti e tamate loa e ia ki le seleta ou taineliki i lou kele totonu ; ti e kenu loa e ia ni mumuniaga i le kele, ti e fakatuu loa e ia ni palepale tau kiate koe, ti e taui loa e ia a koe.

⁹ E tege loa e ia ou kaua ki ana masini tau, ti e maumaui loa e ia ou tule ki ana masini.

¹⁰ E ufiufi loa a koe e le efu o lana kau osi lasi ; ti e galulu loa ou paa i le logoa o le kau ekeosi, mo le teka o saliote, mo ka e ulu loa le sau i ou matapa ofaipe le ulu ki se kolo kua lava.

¹¹ E takatakafi loa e ia ou ala fuli ki taga vae o lana kau osi, ti e tamate loa e ia lou kakai ki le seleta, ti e sosolo loa ki le kele ou kolo tau makeke.

¹² E too loa ou koloa, ti e kaia loa ou fale koloa, ti e soloi loa ou paa, ti e maumaui loa ou fale malolo, ti e laku loa ki le tai ou fatu, mo lou papa, mo lou efu.

¹³ E kau fakagatogato loa le logoa o au sua, ti e leaise toe logo loa ki le musika o au alepe.

¹⁴ E kau fakaliliu loa a koe ko se utu telefua ; ti e ke liliu loa ko se ganea leia e tautau ai loa a kupega ; ti e leaise toe lagai loa a koe. Talie ko au le Eteleno, kua kau masau, e pati le Aliki, le Eteleno.

¹⁵ E folafola le Aliki, le Eteleno ki Tile, o pati : E lulu loa atu motu I le logo ki lou vilo ki lalo, I le tagi o latou ala ka mamate, I le nofo o le matea iate koe.

¹⁶ E ifo loa a aliki fuli o le tai i olatou ekeekeaga fakasau, E lotou tatala loa olatou taupulupulu, Ti e lotou tuku loa olatou kofu fakamailoga ; Kae lotou kofu loa ki le i, ti e lotou tonatona loa ki le kele ; E lotou lulu loa i temi fuli, Ti e lotou ofolele lasi loa o tupu ko koe.

¹⁷ E lotou fai loa se tagi laulau kiate koe, o pati : Kolea ! Kua ke maumau ! A koe leia na fakakakai e latou ala na folau i tai fuli ! Kolo logologona, leia na makeke i le tai ! Kua maumau a ia mo latou ala na nonofo i ai, Ala na i ki ai a fenua fuli i ona tafatafa.

¹⁸ Ko leinei e lulu loa a atu motu i le aso o lou siga, E ofolele lasi loa a atu motu o le tai i lou fakaoki.

¹⁹ Talie e folafola le Aliki, le Eteleno, o pati : Ka kau fakaliliu ai loa a koe ko se kolo lavaki, Ofaipe kolo ala e leaise maua ia ni kakai, Ka kau aumai ai loa kiate koe le moana loloto, Ti e uufi loa a koe e atu vai lalasi,

²⁰ E kau ti loa a koe ki lalo mo latou ala kua ifo ki le popoko, Ki le kakai o le temi mua, E kau tuku loa a koe ki potu loloto o le kele, Ki potu lavaki lee gato, I tafa o latou ala kua ifo ki le popoko, O tupu ke aua na toe nofoi a koe ; Ti e kau taupau loa le kololia ki le fenua o le kau mauli.

²¹ E kau fakaliliu loa a koe ko se nea noa, ti e ke puli oki loa. E afa loa a koe, kae e leaise toe maua loa a koe i se aso, E pati le Aliki, le Eteleno.