Esekiele 24 - Tosi Tapu

Fakamailoga o le maumau o Selusalemi

¹ I le iva o fetuu, i le aso kau agafulu o le masina kau agafulu, na tuku mai loa kiate au le folafola a le Eteleno, o pati :

² Vosa o le tagata, tosi i se tosi le aso leinei ! Talie kua fakafeofi mai le sau o Papilone ki Selusalemi i le aso totonu leinei.

³ Ke tuku se folafola fakatata ki le famili o le kau agatuu, o ke pati kia latou : E folafola le Aliki, le Eteleno, o pati : Fakatuu, fakatuu le fa kulo, ti liligi se vai ki loto.

⁴ Laku ki ai a inati, a inati malilie fuli, le alaga muli, mo le alaga mua ; fakaapele a ia ki ivi malilie.

⁵ Filifili a ovi malilie o le kau ovi ; ti tanaki se fafie i lalo o le fa kulo ; tafu le fa kulo ke pula malie, o tupu ke moso malie foki a ivi ala e tuku i loto.

⁶ Koia e folafola le Aliki, le Eteleno, o pati : Malaia ki le kolo tukipo, fa kulo kelemea, leia e leaise toe puli lona kelemea ! Too taki tasi a inati fuli i ai, ti aua na toe filifili o fai ki le loto.

⁷ Talie e maua i loto malie o ona le toto leia na liligi e ia ; ti kua tuku e ia a ia i aluga o le utu, kae na leaise liligi e ia a ia ki le kele ke tanu e le efu.

⁸ Koia na kau liligi ai lona toto i aluga o le utu, i le ganea leia e leaise mafai ke tanumia ai, o tupu ke tupu ai loku sausau, ti ke kau tautea a ia.

⁹ Koia e folafola le Aliki, le Eteleno, o pati : Malaia ki le kolo tukipo ! Ko au foki, e kau loto ke fai se afi lasi.

¹⁰ Eti le fafie, fakakaka le afi, fakamoso malie a inati, fakamanogi a ia ke lasi, ti tuku ke vela a ivi.

¹¹ Ti teki le kulo lavaki ki aluga o malala kaka, o tupu ke vevela a ia, ti ke kula lona ukamea ; ti e puli loa le fakalialia leia i loto, ti e maumaui loa le kelemea.

¹² E ano noa le pakia ! E leaise feala loa ke fakapuli e le afi le kelemea katoa leia kua apele ai.

¹³ Selusalemi, kua ke kelekele o tupu ko au aga fakalialia fuli. Na kau loto ke fakamea a koe, kae na leaise ke tuku ke fakamea a koe. Koia e leaise feala loa ke ke liliu o mea, o kaku ki laku liligi kiate koe loku sausau katoa.

¹⁴ Ko au, le Eteleno, kua kau masau : ti e soko loa le nea lena ! E kau fai loa a ia ; ti e leaise kau toe solomuli loa, ti e leaise kau toe aloalofa loa pe toe fakasemala loa. E fakamaaui loa a koe o mulimuli ki lau aga mo au gaoi, e pati le Aliki, le Eteleno.

¹⁵ Na tuku mai loa kiate au le folafola a le Eteleno, o pati :

¹⁶ Vosa o le tagata, ko leinei, e kau too iate koe ki se mate fakaofolele, le fiafiaaga o ou mata. Aua na ke tagi laulau loa, aua na ke tagi loa, ti aua na sali loa ou loimata.

¹⁷ Mamae fakalologo, ti aua na fai se putu ; sai lou sulu ki lou ulu, ti tui ou taka ki ou vae ofaipe le masani ; aua na ke uufi lou kaukava, ti aua na ke kai le pane a ni iki.

¹⁸ Na kau masau ki le kakai i le usu, ti na mate loa laku avaga i le afiafi. I le ala usu ake, na kau fai loa le nea leia na fakatotonu mai kiate au.

¹⁹ Na pati mai loa le kakai kiate au : Pe leaise ke fakamatala mai loa kia matou le uiga o le nea leia e ke fai ?

²⁰ Na kau tali loa kia latou : Na tuku mai kiate au le folafola a le Eteleno, o pati :

²¹ Pati ki le fale o Iselaele : E folafola le Aliki, le Eteleno, o pati : Ko leinei, e kau fakakelekele loa loku fale tapu, leia ko le nekenekeaaga o lokoutou makeke, ko le fiafiaaga o okoutou mata, ti ko le tauaga o lokoutou alofa ; ti e tamate loa e le seleta okoutou vosa mo okoutou taineliki ala na toe i Selusalemi.

²² Ti e kotou fai loa i le aso lena ofaipe laku fai. E leaise kotou uufi loa okoutou mata, ti e leaise kotou kai loa le pane a ni iki,

²³ ti e kotou sai loa okoutou ulu, ti e kotou tui loa okoutou taka ; e leaise kotou tagi laulau loa ti e leaise kotou tagi loa ; kae e kotou gaegae loa o tupu ko akoutou agasala, ti e kotou mamae loa.

²⁴ E liliu loa Esekiele ko se fakamailoga kia koutou, ti e kotou fai loa a nea fuli ala na fai e ia. Ti ka soko loa a nea fuli ana, e kotou iloa loa ko au ko le Aliki, le Eteleno.

²⁵ Ti ko koe, vosa o le tagata, i le aso leia e kau too ai loa le nea leia e fakatupu ia lolatou makeke, mo lolatou fiafia, ti mo lolatou kololia, e kau toe too ai foki le fiafiaaga o olatou mata ti mo le tauaga o olatou alofa, olatou vosa mo olatou taineliki.

²⁶ I le aso lena, e au loa se tagata leia na sola, o fakasa le nea lena ki ou taliga.

²⁷ I le aso lena, e mavaa loa lou gutu ki le tagata lena na sola, ti e ke masau loa, kae e leaise ke toe gutu mate loa ; e ke liliu loa kia latou ko se fakamailoga, ti e lotou iloa loa ko au ko le Eteleno.