Esekiele 23 - Tosi Tapu

Folafola o Olola (Iselaele) mo Osolipa (Suta)

¹ Na tuku mai loa kiate au le folafola a le Eteleno, o pati :

² Vosa o le tagata, na i ai ni fafine e toka lua, Ko taineliki o se fafine e tasi.

³ Na la faiaga i Esipito, Na la faiaga i lola temi tupulaga ; I lena na amoamo ai ola u, I lena na fafa ai ki ola manava fakafafine taupoou.

⁴ Na igoa le uluaki ko Olola, Ti ko lona taina ko Ololipa. Na kau avaga mo laua toka lua, Ti na la fanaui ni vosa mo ni taineliki kiate au. Ko Olola, ko Samalia ; Ko Ololipa, ko Selusalemi.

⁵ Na agatuu loa Olola kiate au ; Na oli makeke loa a ia ki ana feauaki, Ki le kau Asilia ala na nonofo i ona tafatafa,

⁶ Ala na teu ki ni kie usi, Ala na kovana mo pule tau, Ala na tauleleka mo tupulaga, Ala na poto i le lele osi.

⁷ Na faiaga a ia mo latou, Mo le kau lalasi fuli o fanau a Asilia ; Na fakakelekele a ia mo latou fuli ala na mamana a ia ki ai ; Na fakakelekele a ia mo olatou taulaatua fuli.

⁸ Na leaise tiaki e ia ana faiaga i Esipito : Talie na lotou momoe mo ia i lona ikiiki, Na lotou amosi ona manava fakataupoou, Na lotou liligi kiate ia alatou faiaga.

⁹ Koia na kau tuku ai a ia ki lima o ana feauaki, Ki lima o fanau o Asilia, Ala na oli makeke a ia ki ai.

¹⁰ Na lotou tio ki lona telefua, Na lotou too ona vosa mo ona taineliki, Na lotou tamate a ia totonu ki le seleta ; Na logologona a ia i fafine, O tupu ko tautea ala na fai kiate ia.

¹¹ Na tio ki le nea lena lona taina ko Ololipa, Na toe asilisili ake loa lona valevalea iate ia. Na fakalaka ake loa ana faiaga i la o lona taina.

¹² Na oli makeke loa a ia ki fanau o Asilia, Ala na nonofo i ona tafatafa, Ala na kovana mo pule tau, Ala na teu fulumalilie, Ala na eke i ni osi, Ala na tauleleka mo tupulaga fuli.

¹³ Na kau tio loa kua kelekele a ia, Kua mulimuli a ia ofaipe lona taina i le ala e tasi.

¹⁴ Na ano foki a ia o toe mamao ake i ana faiaga. Na tio loa a ia ki ni paaki o ni kau tagata i paa o le kolo, Ko ni paaki o ni kau tagata Kaletea, ala na fai ki le pena kula,

¹⁵ Mo ni kilipipi i olatou vakavaka, Mo ni kie lanu kesekese na sai i olatou ulu, Ala na mata fuli pe ni pule, Ala ko ni paaki totonu o fanau o Papilone, Mei Kaletea, lolatou fenua.

¹⁶ Na oli makeke loa a ia kia latou, i lana uluaki tio fai kia latou, Ti na kakau loa e ia ni tagata avelogo kia latou i Kaletea.

¹⁷ Ti na ano loa fanau o Papilone kiate ia, O momoe mo ia i lona palepale, Ti na lotou fakakelekele loa a ia ki alatou faiaga. Na fakakelekele a ia mo latou, Ti oki na maliu loa lona loto ia latou.

¹⁸ Na fakasa e ia i ai lana faiaga, Na fakasa e ia ki tafa lona telefua ; Koia na maliu ai loku loto iate ia ofaipe le maliu o loku loto i lona taina.

¹⁹ Kae na liuliuga e ia ana faiaga, O manatu ki aso o lona ikiiki, Leia na faiaga ai i le fenua o Esipito.

²⁰ Na oli makeke a ia ki ni tagata faiaga, Ala na oli veli fakamanu ofaipe ni asino Ti na fai fakamakeke ofaipe ni osi.

²¹ Na ke manatu ki agasala i lou ikiiki, I le temi leia na kukumi ai e tagata Esipito ou u, ti na lotou amosi lou manava fakataupoou.

²² Koia, Olipa, e folafola ai le Aliki, le Eteleno, o pati : Ko leinei, e kau lagai au feauaki kiate koe, Latou ala kua vesia ki ai lou loto, Ti e kau aumai loa latou kiate koe mei potu fuli :

²³ A fanau o Papilone ti mo le kau Kaletea fuli, A kakai o Pikoti, mo Soa, mo Koa, Mo fanau fuli o Asilia, Ala tupulaga mo tauleleka, Ala e kovana mo pule tau fuli, Ala ko ni pule lalasi mo logologona, Ala ko ni tagata ekeosi fuli.

²⁴ E lotou au loa kiate koe mo ni masafu, mo ni saliote tau, mo nea fuli e maua ia ni teka, Ti mo se solia toka api ; Mo le paletau lasi ti mo le paletau ikiiki, mo puloga ukamea. E lotou au mei potu fuli kiate koe. E kau tuku loa le fakamaau kia latou, Ti e lotou fakamaau loa a koe o mulimuli ki alatou lao.

²⁵ E kau liligi loku sausau kiate koe, Ti e lotou fai loa kiate koe i le itaita. E lotou tuuti loa lou isu mo ou taliga, Ti e mate loa i le seleta le toetoega iate koe. E lotou too loa ou vosa mo ou taineliki, Ti e kai loa e le afi le toetoega iate koe.

²⁶ E lotou too loa ou kofu iate koe, Ti e lotou ave loa ou nea fakateuteu ala na ke teu ki ai.

²⁷ E kau fakagato loa au agaveli, Mo au faiaga i le fenua o Esipito ; E leaise ke toe ave loa ou mata kia latou, E leaise ke toe manatu loa ki Esipito.

²⁸ Talie e folafola le Aliki, le Eteleno, o pati : Ko leinei, e kau tuku a koe ki lima o latou ala e ke vesia ki ai, Ki lima o latou ala kua maliu ai lou loto.

²⁹ E lotou fai loa kiate koe i lolatou vesia, E lotou too loa ou koloa fuli, Ti e lotou tuku loa a koe ke telefua, ke telefua katoa. E fakasa loa ki tafa le fakalumaluma o au fai nea fakavale, Mo au aga fakalialia ti mo au faiaga.

³⁰ E soko loa a nea ana kiate koe, O tupu ko lau faiaga ki atu puleaga, O tupu ko lau fakakelekele ki olatou taulaatua.

³¹ Na ke saele i le ala o lou taina mua, Koia e kau fakavilo ai loa lona ipu ki lou lima.

³² Koia e folafola ai le Aliki, le Eteleno, o pati : E ke inu loa le ipu o lou taina, E ke inu loa le ipu lasi mo loloto lena ; E kakata loa kiate koe, mo gologolo loa kiate koe, Talie kua apele pipi le ipu.

³³ E ke kona loa i le mamae, Talie ko le ipu a ia o le i mo le mamae, Leia na inu foki e lou taina ko Samalia.

³⁴ E ke inu loa a ia o kaku ki lona masa, E ke gugu loa a ia ki ou nifo, E lavea loa ou u i ona kiva. Talie kua kau masau, a au, ko le Aliki, le Eteleno.

³⁵ Koia e folafola ai le Aliki, le Eteleno, o pati : O tupu na ke galoi au, O tupu na ke tiaki au ki ou muli, Koia e ke amo ai loa le tua o au aga fakalialia mo au faiaga.

³⁶ Na pati mai loa le Eteleno kiate au : Vosa o le tagata, pe ke fakamaau loa Olola mo Ololipa ? Fakasa kia laua ala nea fakalialia !

³⁷ Na la fai ni tono, ti e i ai se toto i ola lima : Na la fai ni tono mo ola taulaatua ; Ti ko fanau ala na la fanaui kiate au, Na la fakalaka latou i le afi ke kai e taulaatua.

³⁸ Ko leinei foki le nea leia na la fai kiate au : Na la fakakelekele loku fale tapu i le aso lena, Ti na la maumaui oku sapato.

³⁹ Na la momoli ola fanau ki ola taulaatua, Ti na la ano i le aso totonu lena ki loku sagatualio O fakakelekele a ia. Ko lena le nea leia na la fai i loku fale.

⁴⁰ Ti na la toe afa mai foki ni tagata mei mamao, Na la kakau ni tagata avelogo kia latou, ti ko leinei, na lotou au aifai. Kia latou, na ke fakamea, na ke pena ou mata, Na ke tui ou teu fulumalilie ;

⁴¹ Na ke ekeeke ki se palepale fulumalie, Na tuu i ona mua se laupapa, Ti na ke teki ki le laupapa lena laku iseso mo laku lolo.

⁴² Na logo ki ni kalaga a se kakai toka api leia na fakafiafia mo ia ; Ti na maua i le kakai toka api lena ni tagata mei le toafa o Sape, Ala na velo ia ni matemate ki lima o le tautaina, Ti mo ni pala fulumalilie ki ola ulu.

⁴³ Ti na kau pati loa o uiga mo leia kua matua i le tono : Pe toe soko atu loa e ia lana faiaga, pe toe au loa ni iki kiate ia ?

⁴⁴ Ti na au loa kiate ia ofaipe le ano ki se fafine faiaga ; Na fenaaki le ano kia Olola mo Ololipa, Ko ni fafine fakalialia.

⁴⁵ Kae e fakamaau loa laua e ni tagata agatonu, Ofaipe le fakamaau o ni fafine tono, Ofaipe le fakamaau o ni fafine ala na liligi ia le toto ; O tupu ko ni fafine tono laua, ti e maua se toto i ola lima.

⁴⁶ Talie e folafola le Aliki, le Eteleno, o pati : E kau aumai loa se kakai toka api kia laua, Ti e kau tuku loa laua ki le kaia.

⁴⁷ E tuki fatu loa laua e le kakai toka api lena, Ti e fakaoki loa laua e le seleta ; E tamate loa ola vosa mo ola taineliki, E tutu loa ola fale e le afi.

⁴⁸ E kau fakagato loa i ai le agasala i le fenua ; E ako loa e fafine fuli i ai E leaise tonu ke lotou fai se agasala ofaipe le tautaina lena.

⁴⁹ E toe fakavilo loa lakoutou agasala kia koutou, Ti e kotou amo loa a agasala o okoutou taulaatua. Ti e kotou iloa loa ko au ko le Aliki, le Eteleno.