Esekiele 22 - Tosi Tapu

Agasala mo le tautea o Selusalemi

¹ Na tuku mai loa kiate au le folafola a le Eteleno, o pati :

² Ti ko koe, vosa o le tagata, pe ke fakamaaui loa, pe ke fakamaaui loa le kolo tukipo ? Io, fakasa kiate ia ana nea fakalialia fuli !

³ E ke pati loa : E folafola le Aliki, le Eteleno, o pati : Kolo leia e liligi ia le toto i loto malie o ou, o tupu ke kaku mai lou aso fakamaaui, leia e fai ia ni taulaatua ke fakakelekele ia a koe !

⁴ Kua ke agasala, o tupu ko le toto leia na ke liligi, ti kua ke kelekele, o tupu ko taulaatua ala na ke fai ! Kua ke fakaofi mai, e koe totonu, le aso o lou maumaui, ti kua lau ou aso. Koia e kau tuku loa a koe ki gologolo a kakai matapule, ti e ke liliu loa ko le nea katai a puleaga fuli.

⁵ E kakata loa kiate koe latou ala e feofi mo latou ala e mamao, kiate koe leia kua kelekele lou igoa ti kua apele i le mamae.

⁶ Ko leinei, i loto malie o ou, kua fakaaoga e pule fuli o Iselaele lolatou makeke ke liligi ia le toto ;

⁷ Kua tiaki iate koe le tamana mo le tinana, ti kua fai fakamakeke ki leia e matapule iate koe, ti kua fakapopulai le toe sala matua mo le fafine lokonui.

⁸ Kua ke tiaki loku sagatualio, ti kua ke maumaui aku sapato.

⁹ Kua maua iate koe ni kau tagata ala e fakatupu ia ni loi ke liligi ai le toto ; ti kua maua iate koe latou ala e kai i aluga o mauga ; ti kua fai ni tukipo i loto malie o ou.

¹⁰ Kua tio iate koe ki le telefua o le tamana ; ti kua fakamakeke iate koe ki le fafine i lona masaki fakafafine.

¹¹ Ti kua tasi tono le tagata mo le avaga o lona oloi, ti kua tasi tono mo lona fugao totonu, ti kua tasi fai veli mo lona tuagaane totonu, taine totonu o lona tamana.

¹² Kua tali i lou fale ni nea alofa ke liligi ai le toto ; ti kua ke fakamaua fakavale se tupu o lau paaga, mo se tupu o lau nea gaoi, ti kua ke kaia fakamakeke lou oloi, kae ko au, kua ke galoi au, e pati le Aliki, le Eteleno.

¹³ Ko leinei, kua kau pasipasi oku lima, kakai o Selusalemi, o tupu ko ou koloa kaia ti mo le toto leia na liligi i loto malie o ou.

¹⁴ Pe ke loto makeke loa, pe e makeke loa ou lima i le aso leia e kau gaoi ai loa kiate koe ? Talie ko au, le Eteleno, kua kau masau, ti e kau fai loa.

¹⁵ E kau fakamavetevete loa a koe i atu puleaga, ti e kau veteki loa a koe i fenua kesekese, ti e kau pulii loa lau aga fakalialia i loto malie o ou.

¹⁶ E ke fakakelekele loa a koe totonu i mua o puleaga, ti e ke iloa loa ko au ko le Eteleno.

¹⁷ Na tuku mai loa kiate au le folafola a le Eteleno, o pati :

¹⁸ Vosa o le tagata, kua liliu le fale o Iselaele kiate au ofaipe ni sikoli. Kua lotou tatau mo le siliva, mo le kapa, mo le etani, mo le ukamea, mo le pulu, ala e tuku ki le gutuumu kaka ke fakamea i ai.

¹⁹ Koia, e folafola le Aliki, le Eteleno : O tupu kua kotou liliu fuli ofaipe ni sikoli, ko leinei, e kau tanaki fakatuuga loa koutou ki loto malie o Selusalemi.

²⁰ Ofaipe le tanaki o le paaga, mo le sila, mo le ukamea, mo le pulu, mo le etani ki le gutuumu, ti e pupusi loa le afi ke fakasusua ai latou, e kau tanaki fenaaki loa koutou i loku sausau mo loku sausau lasi, ti e kau laku loa koutou ki le gutuumu ke tutu ai koutou.

²¹ E kau tanaki loa koutou, ti e kau pupusi loa kia koutou le afi o loku sausau, ti e kotou susua loa pe se vai i loto o Selusalemi.

²² Ofaipe le paaga leia e susua loa i le gutuumu, e kotou susua fenaaki loa i loto malie o Selusalemi. Ti e kotou iloa ai loa ko au, le Eteleno, kua kau liligi loku sausau kia koutou.

Agasala o pule mo le kakai o Iselaele

²³ Na tuku mai loa kiate au le folafola a le Eteleno, o pati :

²⁴ Vosa o le tagata, pati ki Selusalemi : Ko se kele a koe leia na leaise fakamea, ti na leaise fakavai e le ua, i le aso o le sausau.

²⁵ Kua kau fakatasi ana kau polofeta i loto o ona ; ofaipe ni laione fekai ala e sae ia alatou nea kai, ti kua lotou kai a laumalie, ti kua lotou too a koloa mo nea mauiga, ti kua lotou fakaapi le kau fafine lokonui i loto malie o ona.

²⁶ Kua maumaui e ona tagata faisakilifisio laku lao, ti kua lotou fakakelekele ia oku sagatualio, ti e leaise lotou iloa le kesekese o le nea taputapu mo le nea fakamalama, ti e leaise lotou fakasa ke iloa le kesekese o le nea kelekele mo le nea mea, ti kua lotou fakamaliu olatou mata i aku sapato, ti kua fakalialiai au i loto malie o latou.

²⁷ Kua fai ona pule pe ni lupo i loto malie o ona, ala e sae ia lalatou nea kai ; kua lotou liligi le toto, ti kua lotou tukipooi a laumalie, o tupu ke fakamakona ai lolatou manumanu koloa.

²⁸ Ti kua fufu e ana kau polofeta a nea fuli ana ki se pena tea, mo ni tio vaiga, mo ni kikite loi, o lotou pati : E folafola le Aliki, le Eteleno ! Kae na leaise folafola fua le Eteleno kia latou.

²⁹ Kua vilo le kakai o le fenua ki le agamakeke, ti kua lotou fai ni kaia, ti kua lotou fakamamae le fakaaloalofa mo le mativa, ti kua lotou takatakafi ki lalo le matapule, ti kua lotou maumaui a lao fuli.

³⁰ E kau afa ia latou se tagata leia e fakatuu ia se kaua, leia e tuu i le pu o le kaua i oku mua o tupu ko le fenua, o tupu ke aua na kau maumaui a ia ; kae e leaise kau maua se tasi.

³¹ E kau liligi loa loku sausau kia latou, ti e kau tutu loa latou ki le afi o loku sausau, ti e kau totogi loa alatou gaoi ki olatou ulu, e pati le Aliki, le Eteleno.