Esekiele 20 - Tosi Tapu

Agatuu a Iselaele : agamalie o le Atua

¹ I le fitu o fetuu, i le aso kau agafulu o le lima o masina, na au loa ni iki o le kau matua o Iselaele, o afa le finegalo o le Eteleno, ti na lotou tonatona loa i oku mua.

² Ti na folafola mai loa kiate au le Eteleno, o pati :

³ Vosa o le tagata, masau ki le kau matua o Iselaele, ti ke pati kia latou : E folafola le Aliki, le Eteleno, o pati : Pe na kotou au o afa au ? E pati le Aliki, le Eteleno : E kau mauli ! e leaise kau tali ke kotou afa au.

⁴ Ko koe, vosa o le tagata, e ke fia fakamaaui latou, e ke loto ke ke fakamaaui latou ! Fakasa kia latou a nea fakalialia o olatou tamana !

⁵ E ke pati loa kia latou : E folafola le Aliki, le Eteleno, o pati : I le aso leia na kau filifili ai Iselaele, na kau siki loku lima ki le sakoga o le fale o Sakopo, ti na kau sa kia latou i le fenua o Esipito ; ti na kau siki loku lima kia latou, o pati : Ko au ko le Eteleno, lokoutou Atua.

⁶ I le aso lena, na kau siki loku lima kia latou, o fakamavae latou i le fenua ko Esipito ki se fenua leia na kau aga o afa kia latou, fenua e tafe ai le sua manu mo le meli, fenua fulumalie kese i fenua fuli.

⁷ Na kau pati kia latou : Ke kotou tasi tiaki a nea fakalialia ala e toso ia okoutou mata, ti aua na kotou fakakelekele koutou ki a taulaatua o Esipito ! Ko au ko le Eteleno, lokoutou Atua.

⁸ Ti na lotou agatuu kiate au, ti na leaise lotou fia fakalogo kiate au. Na leaise tiaki e se tasi fua a nea fakalialia ala na pipiki ki ai ona mata, ti na leaise lotou tiaki fua a taulaatua o Esipito. Na kau maua loa le manatu ke liligi loku sausau kia latou, ke fakavilo kia latou loku sausau katoa, i loto malie o le fenua ko Esipito.

⁹ Kae na kau fakapoipoi ki loku suafa, o tupu ke aua na fakalialia a ia i mua o puleaga ala na lotou nonofo ai, ala na iloa ia laku fakapapau ke fakamavae latou i Esipito.

¹⁰ Koia na kau fakamavae ai latou i Esipito, ti na kau taki ai latou ki le toafa.

¹¹ Ti na kau soli loa kia latou aku lao ti na kau fakasasa loa kia latou aku fakatotonu, ala e tonu ke fai e le tagata, o tupu ke mauli ai.

¹² Ti na kau soli foki kia latou oku sapato ofaipe se fakamailoga iate au mo latou, o tupu ke lotou iloa ko au ko le Eteleno leia e fakamaokioki ia latou.

¹³ Kae na agatuu loa le fale o Iselaele kiate au i le toafa. Ti na leaise lotou mulimuli loa ki aku lao, ti na lotou tiaki loa aku fakatotonu, ala e tonu ke fai e le tagata o tupu ke mauli ai, ti na lotou maumaui fakaveliveli loa aku sapato. Koia na kau maua ai loa le manatu ke liligi kia latou loku sausau i le toafa, o tupu ke fakapuli ai latou.

¹⁴ Kae na kau toe fakapoipoi ki loku suafa, o tupu ke aua na fakalialia a ia i mua o puleaga ala na tio ki laku fakamavae latou i Esipito.

¹⁵ I le toafa, na kau siki loa loku lima kia latou, o tupu ke aua na taki latou ki le fenua leia na kau fakatuutuu kia latou, fenua leia e tafe ai le sua manu mo le meli, fenua fulumalie kese i fenua fuli,

¹⁶ Ti ko le nea lena o tupu na lotou tiaki aku fakatotonu, ti na leaise lotou mulimuli ki aku lao, ti na lotou maumaui aku sapato, o tupu na leaise fakamamao olatou loto i olatou taulaatua.

¹⁷ Kae na logo ai le nea lena, na mamae loa loku mata kia latou, ti na leaise kau maumaui loa latou, ti na leaise kau fakapuli loa latou i le toafa.

¹⁸ Na kau pati loa ki olatou vosa i le toafa : Aua na kotou mulimuli ki lekula o okoutou tamana, ti aua na kotou taupau alatou agai fenua, ti aua na kotou fakakelekele koutou ki olatou taulaatua !

¹⁹ Ko au ko le Eteleno, lokoutou Atua. Kotou mulimuli ki aku pelesepeto, ti kotou tausi aku fakatotonu, o fai latou.

²⁰ Kotou fakatapui oku sapato, ti ke lotou liliu ko se fakamailoga iate au mo koutou, o tupu ke iloa ai ko au ko le Eteleno, ko lokoutou Atua.

²¹ Kae na agatuu loa a vosa kiate au. Ti na leaise lotou mulimuli loa ki aku pelesepeto, ti na leaise lotou tausi mo fai loa aku fakatotonu, ala na tonu ke fai e le tagata ke mauli ai, ti na lotou maumaui loa aku sapato. Na kau maua loa le manatu ke liligi loku sausau kia latou, ke fakavilo loku sausau katoa kia latou i le toafa.

²² Kae na kau taofi loku lima, ti na kau gaoi o tupu ko loku suafa, ke aua na fakalialiai a ia i mua o puleaga ala na tio ki laku fakamavae latou i Esipito.

²³ I le toafa, na kau toe siki foki loku lima kia latou ke veteki latou i lotolotoga o atu puleaga ti mo fakamavete latou i fenua kesekese,

²⁴ talie na leaise lotou fai aku fakatotonu, talie na lotou tiaki aku pelesepeto, ti na lotou maumaui aku sapato, ti na mulimuli olatou mata ki taulaatua o olatou tamana.

²⁵ Na kau tuku foki kia latou ni pelesepeto ala na leaise malilie, mo ni fakatotonu ala na leaise feala ke lotou mauli ai.

²⁶ Na kau fakakelekele loa latou ki alatou failaulau, i lalatou tuku olatou uluaki fuli ke fakalaka i le afi ; na kau loto loa i ai ke fakatuaa latou, o tupu ke lotou iloa ko au ko le Eteleno.

²⁷ Koia, vosa o le tagata, masau ki le fale o Iselaele, o pati kia latou : E folafola le Aliki, le Eteleno, o pati : Kua takua noa okoutou tamana kiate au, o tupu kua lotou agatuu kiate au.

²⁸ Na kau taki latou ki le fenua leia na kau fakapapau ke soli kia latou, kae na lotou tio ki ona potu taualuga fuli mo laakau sesega fuli ; ti na lotou fai loa i ai alatou failaulau, ti na lotou momoli loa i ai alatou moliga ala na fakatupu ia loku sausau, ti na lotou tutu loa i ai alatou kaloni manogi malie, ti na lotou liligi loa i ai lalatou lolo.

²⁹ Na kau pati loa kia latou : Koa a ganea taualuga ana kua kotou ano ki ai ? Talu i ai, na fakaigoa loa a potu ana ko ganea taualuga.

³⁰ Koia, pati ki le fale o Iselaele : E folafola le Aliki, le Eteleno, o pati : Pe leaise kotou fakakelekele koutou ofaipe okoutou tamana, pe leaise kotou faiaga ki alatou nea fakalialia ?

³¹ I lakoutou fai akoutou moliga, i lakoutou tuku ke fakalaka akoutou fanau i le afi, e kotou toe fakakelekele foki koutou i le aso nei ki okoutou taulaatua fuli. Ti ko au, pe kau tuku loa ke koutou afa au, e koutou, fale o Iselaele ? E pati le Aliki, le Eteleno : E kau mauli ! e leaise kau tuku loa ke kotou afa au.

³² E leaise kotou tio loa ki le fai o le nea leia e kotou manatu ki ai, mo ka e kotou pati : E motou loto ke motou tatau mo la ake puleaga, mo famili o la ake fenua, ti e motou loto ke motou tausi ki le laakau mo le fatu.

³³ E kau mauli ! E pati le Aliki, le Eteleno, e kau pule loa kia koutou, ki loku lima makeke mo loku lima falo, ti mo le liligi o loku sausau.

³⁴ E kau fakamavae loa koutou i loto malie o kakai, ti e kau fakamaopo mai loa koutou i fenua ala na kotou mavetevete ai, ki loku lima makeke ti mo le liligi loku sausau.

³⁵ E kau ave loa koutou ki le toafa o kakai, ti e kau fakamaaui loa koutou i oku mua.

³⁶ Ofaipe laku fakatuaa okoutou tamana i le toafa o le fenua o Esipito, e kau fakatuaa loa koutou, e folafola, le Aliki, le Eteleno.

³⁷ E kau fakamaua loa koutou ke kotou saele i laku laakau, ti e kau tuku loa koutou ki va o le sai.

³⁸ E kau vaei kese loa i a koutou le kau agatuu mo latou e agasala kiate au ; ti e kau too loa latou i le fenua leia e lotou matapule ai, kae e leaise lotou ano loa ki le fenua o Iselaele. Ti e kotou iloa loa ko au ko le Eteleno.

Fakapapau o le toe laga o Iselaele

³⁹ Ti ko koutou, fale o Iselaele, e folafola le Aliki, le Eteleno, o pati : Ke kotou tasi ano o tausi ki ona taulaatua ! Kae i le oki o le nea lena, e kotou fakalogo mai loa kiate au, ti e leaise kotou toe fakakelekele loa loku suafa taputapu ki akoutou moliga mo okoutou taulaatua.

⁴⁰ Talie e folafola le Aliki, le Eteleno, o pati : I loku mauga maokioki, i le mauga taualuga o Iselaele, e tausi loa au i ai e le fale katoa o Iselaele, mo latou fuli ala e nonofo i le fenua ; ti e kau tali malie loa latou i ai, ti e kau afa loa akoutou moliga, a uluaki fua o okoutou nea alofa, mo nea fuli ala e kotou momoli mai loa kiate au.

⁴¹ E kau tali loa koutou ofaipe se kaloni manogi fakaaloalofa, mo ka kau fakamavae loa koutou i loto malie o kakai, ti mo fakatasii koutou i fenua ala na kotou mavetevete ai ; ti e kotou fakasa loa i ai loku maokioki i mua o atu puleaga.

⁴² Ti e kotou iloa loa ko au ko le Eteleno, mo ka kau aumai loa koutou ki le fenua o Iselaele, ki le fenua leia na kau fakapapau ke soli ki okoutou tamana.

⁴³ I ai e kotou manatui loa akoutou agaveveli mo nea fuli ala na kotou fai o koutou kelekele ai ; e kotou fakalialia loa kia koutou totonu, o tupu ko nea fakalialia fuli ala na kotou fai.

⁴⁴ Ti e kotou iloa loa ko au ko le Eteleno, mo ka kau gaoi loa kia koutou, o tupu ko loku suafa, kae e leaise tupu ko akoutou agaveli ti mo akoutou gaoi fakalialia, ei fale o Iselaele ! e pati le Aliki, le Eteleno.