Esekiele 2 - Tosi Tapu

Kauga a Esekiele

¹ Na pati mai a ia kiate au : Vosa o le tagata, tuu ki aluga, ti e kau masau atu loa kiate koe.

² I lana masau mai kiate au, na ulu loa le Laumalie kiate au ti na fakatuu loa e ia au ki aluga ; ti na kau logo loa ki leia na masau mai kiate au.

³ Na pati mai loa a ia kiate au : Vosa o le tagata, e kau kakau a koe ki fanau o Iselaele, ki kakai fakatutuu ana, ala na agatuu kiate au ; kua lotou agasala kiate au, latou mo olatou tamana, o kaku mai ki le aso leinei e tou nofo ai.

⁴ Ko ni fanau fia tuu mo loto fefeka ; e kau kakau a koe kia latou, ti e ke pati loa kia latou : Ko leinei le folafola a le Aliki, le Eteleno.

⁵ Logo ai pe lotou fakalogo, pe leaise lotou fakalogo, talie ko se famili fakatutuu latou, e lotou iloa loa e i ai se polofeta i lotolotoga o latou.

⁶ Ti ko koe, vosa o le tagata, aua na ke i kia latou, aua na ke i kia alatou masau, logo ai e ke maua i ou tafa ni laakau talatala mo ni laakau sukisuki, ti e ke nofo fakatasi mo ni sekolopio ; aua na ke i o tupu ko alatou masau, ti aua na ke lulu o tupu ko olatou mata, talie ko se famili latou o ni kau agatuu.

⁷ E ke fakasa loa kia latou aku folafola, pe lotou fakalogo pe leaise lotou fakalogo, talie ko ni kakai agatuu latou.

⁸ Ti ko koe, vosa o le tagata, fakalogo mai ki le nea leia ka kau fakasa atu kiate koe ! Aua na ke agatuu ofaipe le famili agatuu lena ! Fakamavaa lou gutu, ti ke kai le nea leia e kau soli loa kiate koe !

⁹ Na kau tio loa, ti ko leinei, na falo mai se lima kiate au, ti na too e ia se ga tosi e takatakai.

¹⁰ Na folasi loa e ia le tosi i oku mua, ti na tosi a ia i loto mo tafa ; na tosi i ai ni tagi, mo ni mamae, mo ni malaia.