Esekiele 19 - Tosi Tapu

Tagi ki pule o Iselaele

¹ Ti ko koe, fatu se lau mamae ki pule o Iselaele,

² Ti ke pati : Ko ai lou tinana ? Ko se laione fafine. Na moe a ia i lotolotoga o ni laione tagata ; Na taupau e ia ona uviki i loto malie o ni laione muli.

³ Na fagai e ia se tasi o ona uviki, Leia na liliu loa ko se laione tupulaga, Ti na poto loa i le afa o lana nea kai ; Na kai loa e ia ni tagata.

⁴ Na logo loa a atu puleaga ki lona masaui, Ti na maua loa a ia i lolatou popoko ; Na lotou fakapiki loa se mama ki lona isu ti na lotou ave loa a ia Ki le fenua o Esipito.

⁵ I le tio a le laione fafine kua ano noa lana talitali, Ti kua faisala a ia i lana amanaki malie, Na too loa e ia se tasi i ona uviki o fagai, Ti na liliu loa a ia ko se laione tupulaga.

⁶ Na saele loa a ia i lotolotoga o laione tagata, Na liliu loa a ia ko se laione tupulaga, Ti na poto loa a ia i le kapu o lana nea kai ; Na kai loa e ia ni tagata.

⁷ Na too fakamakeke loa e ia olatou fale fakaalialiki, Ti na maumaui loa e ia olatou kolo ; Na kaia loa e ia le fenua mo nea fuli ala na maua i ai, O tupu ko le gugulu o ana tagi.

⁸ Na fakatasi loa a atu puleaga i ona tafatafa o tau kiate ia. Na lotou folasi loa lolatou kupega kiate ia, Ti na maua loa a ia i lolatou popoko.

⁹ Na lotou fakapiki loa se mama ki lona isu, ti na lotou tuku loa a ia ki se kisi, Ti na lotou ave loa a ia ki le sau o Papilone ; Ti oki na lotou taki loa a ia ki se kolo makeke, O tupu ke aua na toe logo ki lona leo i aluga o mauga o Iselaele.

¹⁰ Ko lou tinana, ofaipe koe, na tatau mo se vite, Leia na to i tafa o ni vai. Na fua a ia ti na lasi ona laa, O tupu ko le lasi o vai.

¹¹ Na maua e ia ni laa makeke ke fai ai ni tokotoko fakasau ; Na malaga a ia o taualuga ake i la ake laakau. Na viki a ia, o tupu ko lona taualuga mo le lasi o ona laa.

¹² Kae na taaki fakaveliveli loa a ia, o ti ki le kele ; Na fakagae loa ona fua e le matagi o le potu esite ; Na fatifatii loa ona laa makeke o malo ; Na tutu loa a ia e le afi.

¹³ I le lakaga nei kua to a ia i le toafa, I se kele malo mo kaka.

¹⁴ Na mapuna le afi i ona laa, Ti na kai e ia ona fua ; E leaise koi maua e ia ni laa makeke Ke fai ai se tokotoko fakasau. Ko lena se lau mamae, leia e tonu ke sua ko se lau mate.