Esekiele 17 - Tosi Tapu

Folafola o akuila e lua : tautea o Setesiasi.

¹ Na tuku mai loa kiate au le folafola a le Eteleno, o pati :

² Vosa o le tagata, fai se masau ke lotou aga o mate, tuku se folafola fakatata ki le fale o Iselaele !

³ E ke pati loa : E folafola le Aliki, le Eteleno, o pati : Na au loa i Lipane se akuila lasi, na kapakau lalasi mo loloa, ti na apele i fulu na lanu kesekese, ti na fatii loa e ia le tumutumu o se sete.

⁴ Ti na too loa e ia le laa leia na taualuga oki i laa fuli, o ave a ia ki se fenua fai koloa, o tuku a ia ki se kolo o ni tagata fai koloa.

⁵ Ti na too loa e ia se uli o le fenua, o tuku ki se kele mauli ; ti na tuku e ia a ia ke ofi ki se vai lasi, ti na to loa e ia a ia ofaipe le sole.

⁶ Na somo loa le uli lena, o liliu ko se tafito vite leia na mafolafola i lalo kae na leaise malaga ki aluga ; na agaaga ona laa ki le akuila, ti na tutupu ona aka i ona lalo ; ti na liliu loa a ia ko se tafito vite, ti na sosomo loa ni ona laa, ti na tupu loa ni ona moto.

⁷ Na i ai loa se tasi ake akuila, na lasi, mo kapakau loloa ti mo fulu matotolu. Ti ko leinei, i le kele leia na to ai le vite, na falo loa e le vite lena ona aka mo ona laa ki le ganea leia na tuu ai le akuila, o tupu ke fakavai e ia latou.

⁸ Na to le vite lena i se kele malie, i tafa o se vai lasi, o tupu ke tupu ai ni ona laa mo ni ona fua, ti ke liliu a ia ko se vite fulumalie.

⁹ Ke ke pati : E folafola le Aliki, le Eteleno, o pati : Pe tupu malie loa le vite lena ? Pe leaise taaki loa e le uluaki Akuila ona aka, pe leaise motumotusi loa e ia ona fua, ke tupu ai sona gae, ti ke gini ai ona lau fuli ala na sosomo ? Ti e leaise aoga loa se makeke lasi pe ko se kakai toka api ke taaki ia ona aka.

¹⁰ Ko leinei, kua to le vite ; pe tupu malie loa a ia ? Pe leaise gae loa a ia mo ka agi mai kiate ia le matagi o le potu esite ? E gae loa a ia i le ganea leia na tupu ake ai.

¹¹ Ti na folafola mai loa kiate au le Eteleno, o pati :

¹² Pati ki le fale agatuu : E leaise kotou iloa le uiga o le nea lena ? Fakasa kia latou : Ko leinei, kua au le sau o Papilone ki Selusalemi, ti kua ave e ia le sau mo le kau pule ki Papilone.

¹³ Ti kua filifili e ia se tasi o le sakoga sau, ti kua fai e ia se sai mo ia, o fakamaua a ia ke fakapapau, ti kua ave e ia le kau lalasi o le fenua,

¹⁴ O tupu ke taofi le puleaga ke taulalo, ti ke aua na mafai ke toe malaga ki aluga, ti ke tausi e ia lana fakapapau o nofo agatonu ki ai.

¹⁵ Kae na agatuu a ia kiate ia, o kakau ni ana tagata avelogo ki Esipito, o tupu ke lotou aumai i ai kiate ia se kau osi mo se kau solia lasi. Pe manuia loa leia na fai ia le nea lena ? pe sao loa a ia ? Kua maumaui e ia le sai, ti e sao feaki loa a ia !

¹⁶ E pati le Aliki, le Eteleno : E kau mauli ! E mate loa le sau lena i le fenua o le sau leia na fakaeke ia a ia ki le ekeekeaga fakasau. O tupu na leaise tokaga a ia ki le fakapapau na fai, kae na motusi e ia le sai. Ti e mate loa a ia i Papilone totonu.

¹⁷ Ti e leaise ano loa Falaone mo se solia lasi ti mo se kakai toka api o saofaki a ia i le tau, mo ka laga loa ni palepale tau ti mo kenu loa ni popoko ke tamate ai se kakai toka api.

¹⁸ O tupu na nukinuki a ia ki le fakapapau, o motusi e ia le sai, ti na soli e ia lona lima, o fai e ia a nea fuli ana, e leaise sao loa a ia !

¹⁹ Koia e folafola ai le Aliki, le Eteleno, o pati : E kau mauli ! Ko laku sai, leia kua nukinuki ki ai, ti ko laku fakapapau leia na fai i loku suafa, leia kua motusi e ia. E kau fakavilo loa a nea fuli ana ki lona ulu.

²⁰ E kau folasi loa laku kupega kiate ia, ti e pikiia loa a ia ; e kau ave loa a ia ki Papilone, ti e kau tautea loa a ia i ai, o tupu ko lana agatuu kiate au.

²¹ Ko latou fuli o lana kau solia ala na sosola e mamate loa i le seleta, ti ko latou ala e toe loa e mavetevete loa ki potu kesekese fuli. Ti e kotou iloa loa ko au, le Eteleno, na kau masau.

²² E folafola le Aliki, le Eteleno, o pati : Ko au, e kau too loa le tumutumu o se sete lasi, ti e kau fakatuu loa a ia ; e kau tatai loa i ona laa se ga laa foou, ti e kau to loa a ia i se mauga taualuga.

²³ E kau to loa a ia i se mauga taualuga o Iselaele ; ti e toe sosomo loa ni ona laa ti e toe fua loa a ia ; ti e liliu loa a ia ko se sete fulumalie. E malolo loa a manu lele kesekese fuli i ona lalo, ti e malolo loa a manu fuli ala e mua ni olatou kapakau i le malu o ona laa.

²⁴ Ti e iloa loa e laakau fuli o le vao ko au, le Eteleno, na kau tuku ia ki lalo le laakau leia na malaga ki aluga, kae na kau siki ia ki aluga le laakau leia na tuku ki lalo, ti na kau fakagae ia le laakau sesega kae na kau fakasesega ia le laakau gae. Ko au, le Eteleno, kua kau masau, ti e kau gaoi loa.