Esekiele 16 - Tosi Tapu

Fakatatau o Selusalemi ki se fafine faiaga

¹ Ti na folafola mai loa kiate au le Eteleno, o pati :

² Vosa o le tagata, fakasa ki Selusalemi ana nea fakalialia !

³ E ke pati loa : E folafola le Aliki, le Eteleno, ki Selusalemi : Na fakatupu a koe ti na fanaui a koe i le fenua o Kanaane ; ko lou tamana ko se tagata Amole, ti ko lou tinana ko se fafine Eti.

⁴ I lou tupu, i le aso leia na fanaui ai a koe, na leaise tuuti lou uso, ti na leaise fufulu a koe i se vai ke ke mea, ti na leaise olo a koe ki se patai, ti na leaise kofukofu a koe ki ni kie.

⁵ Na leaise tasi ke alofa kiate koe, o fai a nea ana kiate koe pe manava alofa kiate koe ; kae na ti telefua a koe ki faisaga, talie na ke fakalialia i le aso leia na fanaui ai a koe.

⁶ Na kau fakalaka loa i ou tafa, ti na kau tio loa kiate koe e ke maanu i lou toto, ti na kau pati atu loa kiate koe : Ke ke mauli i lou toto ! Ti na kau toe pati atu kiate koe : Ke ke mauli i lou toto !

⁷ Na kau liuliuga a koe o tua kau agafulu afe, ofaipe le mutie o faisaga. Ti na ke tuputupua, ti na ke liliu o lasi, ti na ke liliu o fulumalie saosaoa ; na tutupu ou u, ti na sosomo lou lau ulu. Kae na ke telefua, io, na ke telefua katoa.

⁸ Na kau toe fakalaka i ou tafa, ti na kau tio kiate koe, ti ko leinei, kua soko lou temi ki le alofa. Na kau folasi loa kiate koe le tapatapa o loku kofu, ti na kau uufi loa lou telefua, ti na kau fakapapau loa ke kau agatonu kiate koe, ti na kau fai loa mo koe se sai, e pati le Aliki, le Eteleno, ti na kau maua loa a koe ma aku.

⁹ Na kau fufulu loa a koe ki le vai, ti na kau fakapuli loa le toto leia na piki iate koe, ti na kau takai loa a koe ki le lolo.

¹⁰ Na kau soli atu loa kiate koe ni teu fakamailoga, mo ni taka kilii manu na pena usi ; ti na kau nonoa loa ou vakavaka ki se kie tea, ti na kau fakakofu loa a koe ki se kie silika.

¹¹ Na kau teuteui loa a koe ki ni nea fakateuteu : Na kau tui loa ni matemate ki ou lima, ti na kau fakatau loa se kasoa ki lou ua,

¹² Ti na kau fakapiki loa se fa sau ki lou isu, mo se sa sau ki ou taliga, mo se pala fulumalie ki lou ulu.

¹³ Koia na teuteui loa a koe ki le aulo mo le siliva, ti na fakakofu loa a koe ki se kie tea, mo se kie silika, mo ni kie tui fakamailoga. Na ke kai loa ki le falina malie, mo le meli, mo le lolo. Na ke liliu loa o fulumalie mo saosaoa, ti na ke gali loa ke filifili a koe ko le avaga a le sau.

¹⁴ Ti na mafola loa lou logologona i atu puleaga, o tupu ko lou fulumalie, leia na saosaoa, i le malie o laku teuteui a koe, e pati le Aliki, le Eteleno.

¹⁵ Kae na ke fanaki loa ki lou fulumalie, ti na ke fakaaoga loa lou logologona, o faiaga ; na ke faiaga loa mo latou fuli ala na fakalaka i ou tafa, ti na ke soli a koe kia latou.

¹⁶ Na ke too loa ni teu i ou teu ala na lanu kesekese, o ke teu loa ki ai a ganea taualuga ala na ke faiaga ai : na leikiaise fai le nea aia, ti e leaise toe soko loa a ia.

¹⁷ Na ke too loa lou teu fulumalie leia na fai ki le aulo mo le siliva, leia na kau soli atu kiate koe, ti na ke fai loa ki ai ni fakatata o ni tagata, ti na ke faiaga loa kia latou.

¹⁸ Na ke too loa ou teu fakamailoga, ti na ke fakakofu loa latou ki ai, ti na ke momoli loa ki fakatata ana loku lolo mo loku iseso.

¹⁹ Ko le pane leia na kau soli atu kiate koe, mo le falina tea, mo le lolo, mo le meli, ala na kau fagai a koe ki ai, na ke momoli loa kia latou a nea ana ofaipe ni kaloni manogi malie. Ko lena le nea leia na soko, e pati le Aliki, le Eteleno.

²⁰ Na ke too loa ou vosa mo ou taineliki, ala na ke fanaui kiate au, ti na ke sakilifisioi loa latou kia latou ko lalatou nea kai : Pe na leaise feauga i au faiaga ?

²¹ Na ke tamate oku vosa, ti na ke soli latou ke fakalaka i le afi ma latou !

²² I loto malie o au aga fakalialia fuli mo au faiaga, na leaise ke manatu fua ki le temi leia na ke ikiiki ai, le temi leia na ke telefua ai, io, leia na ke telefua katoa ai, ti na ke maanu ai i lou toto.

²³ I le oki o au gaoi veveli fuli, - malaia, malaia kiate koe ! e pati le Aliki, le Eteleno, -

²⁴ Na ke fakatuu loa ni fale faiaga kiate koe, ti na ke fakatupu loa ni ganea taualuga kiate koe i ala fuli ;

²⁵ Na ke fakatuu ou ganea taualuga i uluaga o ala fuli, ti na ke maumaui lou fulumalie, ti na ke soli a koe kia latou fuli ala na fakalaka i ou tafa, ti na ke liuliuga au faiaga.

²⁶ Na ke faiaga ki le kau Esipito, tagata tino makeke ala e nonofo i ou tafatafa, ti na ke liuliuga au faiaga ke kau sausaua ai.

²⁷ Ti ko leinei, kua kau siki loku lima kiate koe, ti kua kau fakaikiiki le vaega leia na kau fakatuutuu kiate koe, ti kua kau tuku a koe ke faitalisa ki ai ou fili, a taineliki o le kau Filisitini, ala na luma ki au agatukipo.

²⁸ Na ke faiaga mo le kau Asilia, talie na leaise ke kaekae ; na ke faiaga mo latou ti na leaise ke kaekae aifai.

²⁹ Na ke fakalasi lau faiaga mo le fenua o Kanaane o kaku ki Kaletea, kae na leaise ke kaekae aifai.

³⁰ Oiau ! Ki le lasi o le gaegae o lou loto, e pati le Aliki, le Eteleno, i lau aga o fai a nea fuli ana, ala ko le gaoi a se fafine pule i le faiaga.

³¹ I le temi leia na ke fakatuu ai ou fale faiaga i uluaga o ala fuli, i le temi leia na ke teuteui ai ni ganea taualuga i lapalasi fuli, na leaise ke fai fua pe le fafine faiaga leia e afa ia sona totogi.

³² Na ke liliu ko le fafine faiaga leia e tali ia ni tagata kese kae tiaki e ia lona avaga totonu.

³³ E tuku se totogi ki fafine faiaga fuli, kae ko koe, na ke soli ni nea alofa ki au kau mamana fuli, ti na ke totogi latou ke lotou au kiate koe i potu fuli, o faiaga mo koe.

³⁴ Na ke kese mo la ake fafine faiaga fuli, talie na leaise afa a koe e se tasi, ti na ke toe kese foki, talie ko koe leia na totogi ia au kau tagata, kae na leaise ko latou ala na totogi ia a koe.

³⁵ Koia, fafine faiaga, fakalogo mai ki le folafola a le Eteleno !

³⁶ E folafola le Aliki, le Eteleno, o pati : O tupu na maumaui ou koloa, ti na fakasa lou telefua i au faiaga mo au feauaki, mo ou taulaatua fakalialia fuli, ti o tupu ko le toto o au fanau ala na ke soli kia latou,

³⁷ Ko leinei, e kau fakatasii loa au feauaki fuli ala na ke fiafia ai, latou fuli ala na ke alofa ki ai, mo latou fuli ala na ke vesia ki ai, e kau fakatasii mai loa latou i potu fuli kiate koe, ti e kau fakasa loa kia latou lou telefua, ti e lotou tio fuli loa ki lou telefua.

³⁸ E kau fakamaui loa a koe ofaipe le fakamaui o fafine faiaga mo fafine ala e liligi ia le toto. E kau fakaliliu loa a koe ko se vikitima kua apele i le toto, talie e vilo loa loku sausau mo loku finenonofo kiate koe.

³⁹ E kau tuku loa a koe ki olatou lima ; ti e lotou maumaui loa ki lalo ou ganea faiaga, ti e lotou maumaui loa ou ganea taualuga ; e lotou too loa ou teu, ti e lotou too loa lou teu fulumalie, kae e lotou tiaki telefua loa a koe, io, e lotou tiaki telefua katoa loa a koe.

⁴⁰ E lotou aumai loa le kakai kiate koe, ti e lotou tuki fatui loa a koe, ti e lotou suki loa a koe ki le seleta ;

⁴¹ E lotou tutu loa ou fale ki le afi, ti e lotou tautea loa a koe i mua o ni kau fafine toka api. E kau fakagato loa i ai lau faiaga ti e leaise ke toe soli loa se totogi.

⁴² E kau fakafimalie loa i ai loku sausau kiate koe, ti e kau siki loa iate koe loku finenonofo, ti e kau fimalie loa, ti e leaise kau toe ita loa.

⁴³ O tupu na leaise ke manatui lou temi ikiiki, o tupu na ke fakatupu ia loku ita ki nea fuli ana, ko leinei, e kau fakavilo loa lau faiaga ki lou ulu, e pati le Aliki, le Eteleno, ti e leaise ke toe fai loa le agaveli mo au nea fakalialia fuli.

⁴⁴ Ko leinei, ko latou fuli ala e fai taataaga e fai ia loa kiate koe le taagapati leinei : E tuu fai le taine ki le tinana !

⁴⁵ Ko le taine a koe o lou tinana, leia na tiaki ia lona avaga mo ana fanau ; ko le taina a koe o ou fetaina, ala na tiaki ia olatou avaga mo olatou fanau. Ko lokoutou tinana ko se fafine Eti, ti ko lokoutou tamana ko se tagata Amole.

⁴⁶ Ko lou taina mua, leia e nofo i lou fetuu sema, ko Samalia mo ona taineliki ; ti ko lou ga taina ikiiki, leia e nofo i lou fetuu atamai, ko Sotoma mo ona taineliki.

⁴⁷ Na leaise gato fua i lau saele i olatou ala, ti mo lau fai alatou nea fakalialia, na leaise feauga a nea ana kiate koe ; kae na ke toe veli oki ake ia laua i ou ala fuli.

⁴⁸ E pati loa le Aliki, le Eteleno : E kau mauli ! Ko Sotoma, lou ga taina, mo ona taineliki na leaise lotou fai le nea leia na kotou aga o fai, e koe mo ou taineliki.

⁴⁹ Ko leinei le agasala a Sotoma, lou ga taina : Na fia nealasi a ia, ti na mauli a ia i le koloa, ti na leaise tuania ia e ia se nea, a ia mo ona taineliki ; ti na leaise tokoi a ia ki le kau mativa mo le kau fakaaloalofa.

⁵⁰ Na lotou liliu o fia nealasi, o lotou fai ni nea fakalialia i oku mua. Koia na kau fakapuli latou i laku tio ki le nea lena.

⁵¹ Na leaise fai e Samalia le vaelua o au agasala ; talie na lasi ake au nea fakalialia i ana nea fakalialia ; ti na mata agatonu ake ou fetaina iate koe, o tupu ko nea fakalialia fuli ala na ke fai.

⁵² A koe leia na fakatuaa ia ou fetaina, tali lou luma, o tupu ko au agasala ala na ke liliu ai o fakalialia ake ia latou, ti na fakasa ia e lotou agatonu ake iate koe : Io, ke ke tali lou luma mo lou fakataulaloi, o tupu kua ke fakamatatonu ia ou fetaina.

⁵³ E kau toe aumai loa olatou kau popula, le kau popula o Sotoma mo ona taineliki, mo le kau popula o Samalia mo ona taineliki, mo lou kau popula i loto malie o latou,

⁵⁴ O tupu ke ke tali lou luma, ti ke ke fakasemala ki nea fuli ala na ke aga o fai, o ke liliu loa ko se nea fakafimalie kia laua.

⁵⁵ E toe liliu mai loa a Sotoma mo ona taineliki, ki lolatou nofo i mua ; ti e toe liliu mai loa a Samalia mo ona taineliki ki lolatou nofo i mua ; ti ko koe mo ou taineliki, e kotou toe liliu mai loa ki lokoutou nofo i mua.

⁵⁶ Pe na leaise ke masau veli ki lou taina ko Sotoma, i le temi o lou fia nealasi,

⁵⁷ I mua o le fakasa o lou agaveli ki tafa, i le temi leia na ke tali ai a nukinuki a taineliki o Silia mo latou ala e nonofo i ona tafatafa, ti mo nukinuki a taineliki o le kau Filisitini, ala e vesia kiate koe, mo latou fuli ala e nonofo i ona tafatafa !

⁵⁸ Kua ke amo au oli veli mo au nea fakalialia, e pati le Eteleno.

⁵⁹ Talie e folafola le Aliki, le Eteleno, o pati : E kau fai loa kiate koe o mulimuli ki le nea leia na ke fai, a koe leia na nukinuki ki le fakapapau o motusi le sai.

⁶⁰ Kae e kau toe manatui loa laku sai mo koe i le temi o lou ikiiki, ti e kau toe fai loa mo koe se sai lee gato.

⁶¹ E ke toe manatui loa lau faiaga katoa, ti e ke luma loa, mo ka e ke tali loa ou fetaina, ou taokete mo ou ga taina ; ti e kau soli atu loa latou kiate koe ko ou taineliki, kae e leaise tupu ko lau sai.

⁶² E kau fakatuu loa laku sai mo koe, ti e ke iloa loa ko au ko le Eteleno,

⁶³ O tupu ke ke manatui le temi kua sili ti ke ke fakasemala, o tupu ke aua na toe fakamavaa loa lou gutu ti ke ke luma, mo ka e kau fakamolemole loa kiate koe a nea fuli ala na ke aga o fai, e pati le Aliki, le Eteleno.