Esekiele 15 - Tosi Tapu

Fakatatau o Iselaele ki le fafie o le vite

¹ Ti na folafola mai loa kiate au le Eteleno, o pati :

² Vosa o le tagata, ko le fafie o le vite, pe mauiga ake a ia I fafie o la ake laakau o le vaomatua ?

³ Pe too le fafie lena ke fai ai se nea mauiga ? Pe fai ki ai se fao ke tau ai se nea ?

⁴ Ko leinei, e tuku a ia ki le afi ke tutu ai ; E tutu e le afi ona potupotu, ti e ulaula le loto malie : Pe aoga loa a ia ki se nea ?

⁵ Ko leinei, i lona koi katoa, na leaise aoga fua a ia ki se gaoi ; E feaki ake loa ke aoga a ia ki se gaoi, Mo ka kua kai a ia e le afi, pe kua vela a ia ?

⁶ Koia e folafola ai le Aliki, le Eteleno, o pati : Ofaipe le laakau o le vite i laakau o le vao, Leia e kau ti ke tutu e le afi, E kau tiaki felaaki loa a kakai o Selusalemi.

⁷ E kau fakaaga loa oku mata kia latou. Na lotou sao i se afi, kae e tutu loa latou e se tasi a afi. Ti e kotou iloa loa ko au ko le Eteleno, Mo ka kau fakaaga loa oku mata kia latou.

⁸ E kau fakaliliu loa le fenua ko se toafa, O tupu na lotou agatuu kiate au, E pati le Aliki, le Eteleno.