Esekiele 14 - Tosi Tapu

E leaise tali e le Eteleno ke afa a ia e ni tagata tausi taulaatua

¹ Na au loa kiate au ni iki o le kau matua o Iselaele, o tonatona i oku mua.

² Ti na tuku mai loa kiate au le folafola a le Eteleno, o pati :

³ Vosa o le tagata, kua amo e le kau tagata lena olatou taulaatua i olatou loto, ti kua pipiki olatou mata ki le nea leia na fakavilo ia latou ki le veli. Pe e kau tuku loa ke lotou afa mai se nea kiate au ?

⁴ Koia ke ke masau kia latou, ti ke pati kia latou : E folafola le Aliki, le Eteleno, o pati : Ko tagata fuli o le fale o Iselaele e amo ia ona taulaatua i lona loto, ti e pipiki ona mata ki le nea leia na fakavilo ia a ia ki lana agaveli, - kapau e au a ia o masau ki le polofeta, - ko au, le Eteleno, e kau tali loa kiate ia, logo ai le lasi o ona taulaatua,

⁵ O tupu ke maua i olatou loto totonu latou o le fale o Iselaele ala kua fakamamao iate au mo olatou taulaatua fuli.

⁶ Koia, ke ke pati ki le kakai o Iselaele : E folafola le Aliki, le Eteleno : Kotou toe fakasemala, ti kotou tafoki i okoutou taulaatua ; kotou tafoki okoutou mata i akoutou nea fakalialia fuli !

⁷ Talie ko tagata fuli o le fale o Iselaele, pe ko ni matapule e nonofo i Iselaele, ala kua fakamamao iate au, ti e amo ia ona taulaatua i lona loto, ti e pipiki ona mata ki le nea leia na fakavilo ia a ia ki lana agaveli, - kapau e au a ia o masau ki le polofeta ke afa e ia loku finegalo kiate ia, - ko au, le Eteleno, e kau tali totonu loa kiate ia.

⁸ E kau fakaagaaga loa oku mata ki le tagata lena, ti e kau gaoii loa a ia ko se fakamailoga mo se nea takuga, ti e kau tuuti loa a ia i lotolotoga o loku kakai. Ti e kotou iloa loa ko au ko le Eteleno.

⁹ Ti kapau e kakaai loa le polofeta mo kapau e puaki e ia se folafola, ko au, le Eteleno, leia na fakataga ia ke kakaai le polofeta lena ; e kau falo loa loku lima kiate ia, ti e kau tuuti loa a ia i lotolotoga o loku kakai ko Iselaele.

¹⁰ E lotou amo loa le tautea o lalatou agasala ; e tatau loa le tautea o le polofeta mo le tautea o leia na afa kiate ia,

¹¹ O tupu ke aua na toe sese le fale o Iselaele o mamao iate au, ti ke aua na toe fakalialia a ia i ana agasala fuli. Ti e lotou liliu loa ko loku kakai, ti ko au, e kau liliu loa ko lolatou Atua, e pati le Aliki, le Eteleno.

Faifaitakiaga o tagata agatonu e tolu

¹² Ti na folafola mai kiate au le Eteleno, o pati :

¹³ Vosa o le tagata, kapau kua agasala mai kiate au se fenua, o tausi ki taulaatua, ti kapau na kau falo loku lima kiate ia, ti kapau na kau fatii le laakau o le pane kiate ia, ti kapau na kau kakau le oge kiate ia, ti kapau na kau tuuti iate ia a tagata mo manu,

¹⁴ Kae e maua loa i loto malie o le fenua lena a tagata anei e toka tolu, ko Noe, mo Taniela, mo Sopo, e lotou saofaki loa olatou laumalie ki lalatou faitotonu, e pati le Aliki, le Eteleno.

¹⁵ Kapau na kau tuku loa ke taka ni manu fekai i le fenua, o maumaui a ia, ti kapau na liliu loa a ia ko se toafa leia na leaise toe ano ai loa se tagata o tupu ko manu fekai ana,

¹⁶ Kae e maua loa i loto malie o le fenua lena a tagata ana e toka tolu, e kau mauli ! e pati le Aliki, le Eteleno, e leaise lotou saofaki loa ni vosa, pe ko ni taine ; e lotou saofaki loa latou tefua, kae e liliu loa le fenua ko se toafa.

¹⁷ Ti kapau na kau aumai loa le seleta ki le fenua leinei, ti kapau na kau pati loa : Ke ano le seleta i le fenua ! Ti kapau na kau tuuti loa i ai a tagata mo manu,

¹⁸ Kae e maua loa i loto malie o ona a tagata ana e toka tolu, e kau mauli ! e pati le Aliki, le Eteleno, e leaise lotou saofaki loa ni vosa pe ko ni taine, kae e lotou saofaki loa latou tefua.

¹⁹ Ti kapau na kau kakau mai loa le taumasaki ki le fenua leinei, ti kapau na kau liligi loa ki ai loku sausau ki le mate, ke tuuti i ai a tagata mo manu,

²⁰ Kae e maua loa i loto malie o ia a Noe, mo Taniela, mo Sopo, e kau mauli ! e pati le Aliki, le Eteleno, e leaise lotou saofaki loa ni vosa pe ko ni taine, kae e lotou saofaki loa olatou mauli tefua i lalatou faitotonu.

²¹ Io, e folafola le Aliki, le Eteleno : E logo ai na kau tuku ki Selusalemi aku tautea fakaii e fa, ko le seleta, mo le oge, mo manu fekai, mo le taumasaki, ke tuuti i ai a tagata mo manu,

²² Kae e maua loa se ga toetoega leia e sao loa, leia e mavae loa, ni vosa mo ni taineliki. Ko leinei, e lotou au loa kia koutou ; e kotou tio loa ki olatou mauli mo alatou gaoi, ti e kotou fimalie loa i le malaia leia na kau kakau mai ki Selusalemi, i nea fuli ala na kau kakau mai kiate ia.

²³ E lotou fakapelepelei loa koutou, mo ka kotou tio loa ki olatou mauli mo alatou gaoi ; ti e kotou fakamaoki loa na leaise kau fai noa a nea fuli ala na kau fai ki Selusalemi, e pati le Aliki, le Eteleno.