Esekiele 13 - Tosi Tapu

Le tautea o le kau polofeta loi

¹ Na tuku mai loa kiate au le folafola a le Eteleno, o pati :

² Vosa o le tagata, kikite ki polofeta o Iselaele ala e kikite, Ti ke pati kia latou ala e kikite o mulimuli ki olatou loto totonu : Kotou fakalogo mai ki le folafola a le Eteleno !

³ E folafola le Aliki, le Eteleno, o pati : Malaia ki polofeta valea, Ala e mulimuli ki olatou loto totonu Kae e leaise lotou tio fua ki se nea !

⁴ Pe ni lenato i loto malie o ni fale maumau, E fenaaki au polofeta, ei Iselaele.

⁵ Na leaise kotou pale o tapono a pu o le paa, Na leaise kotou takatakai le fale o Iselaele ki se paa, Ke kotou tuu makeke i le tau, I le aso o le Eteleno.

⁶ E vaiga alotou tio, ti e loi alatou kikite ; E lotou pati : Na pati le Eteleno ! Kae na leaise kakau fua latou e le Eteleno ; Ti e lotou tuku ke amanaki e soko loa alatou masau.

⁷ Pe leaise vaiga akoutou tio, pe leaise loi akoutou kikite ala e kotou fakasa ? E kotou pati : Na pati le Eteleno ! Kae na leaise kau folafola fua.

⁸ Koia e folafola ai le Aliki, le Eteleno, o pati : O tupu e kotou fakasa ni nea vaiga ti ko akoutou tio ko ni loi, Ko leinei, e kau mamafa kia koutou, E pati le Aliki, le Eteleno.

⁹ E vilo loa loku lima ki le kau polofeta Ala e fai ia ni tio vaiga mo ni kikite loi ; E leaise lotou toe kau loa i le fakatasiga o loku kakai, E leaise tosi loa latou i le tosi o le fale o Iselaele, Ti e leaise lotou ulu loa ki le fenua o Iselaele. Ti e kotou iloa loa ko au ko le Aliki, le Eteleno.

¹⁰ E soko loa a nea ana o tupu e lotou kakaai loku kakai, O pati : Tokamalie ! kae e leaise tokamalie. Ti e fakatuu e loku kakai se paa, Kae ko latou, e lotou fakamomole aia ki se lase.

¹¹ Pati kia latou ala e fakamomole ia le paa ki le lase, e solo loa a ia ; E au loa se ua makeke fakafokifa ; Ti e to loa se ua fatu, Ti e agi loa le afa.

¹² Ti ko leinei, e solo loa le paa ! Pe leaise pati atu loa kia koutou : Kofea le lase leia na kotou fakamomole a ia ki ai ?

¹³ Koia e folafola ai le Aliki, le Eteleno, o pati : I loku sausau e kau fakato ia loa le afa ; E au fakafokifa loa se ua makeke i loku sausau ; Ti e to loa se ua fatu i le makeke katoa o maumaui le paa.

¹⁴ E kau soloi loa ki lalo le paa leia na fakamomole ki le lase, E siga loa a ia ki le kele, ti e sa loa ona fakavae ki tafa ; E solo loa a ia, ti e kotou mamate loa i loto malie o ona maumau. Ti e kotou iloa loa ko au ko le Eteleno.

¹⁵ E kau fakafimalie loa loku sausau ki le paa, Ti mo latou ala na fakamomole ia a ia ki le lase ; Ti e kau pati atu loa kia koutou : Kua oki le paa !

¹⁶ Ti kua oki mo latou ala na fakamomole ia a ia, Le kau polofeta o Iselaele ala na kikite ki Selusalemi, Ti na maua ia ni tio o le tokamalie kiate ia, Kae e leai fua se tokamalie kiate ia ! E folafola le Aliki, le Eteleno.

¹⁷ Ti ko koe, vosa o le tagata, ave ou mata ki taineliki o lou kakai Ala e kikite o mulimuli ki olatou loto totonu, Ti ke kikite kia latou !

¹⁸ E ke pati loa : E folafola le Aliki, le Eteleno, o pati : Malaia kia latou ala e tui ia ni matemate ki lima fuli, Ti e tui ia ni pulou ki ulu o fenua fuli, O tupu ke lotou pule ki laumalie fuli ! Pe kotou loto ke kotou pule ki laumalie o loku kakai, Kae kotou taupau okoutou laumalie ?

¹⁹ E kotou fakanoai au i mua o loku kakai, Ki ni ga lukuga falina mo ni ga potu pane, O kotou tamate ni laumalie ala e leaise tonu ke mate, Kae kotou fakamauli ni laumalie ala e leaise tonu ke mauli, O kotou kakaai ai loku kakai, leia e fakalogo ki le loi.

²⁰ Koia e folafola le Akiki, le Eteleno, o pati : Ko leinei e kau vesia ki okoutou matemate Ala e kotou maselei ai a laumalie o tupu ke kotou ano o popula ; E kau taaki loa latou i okoutou lima, E kau saofaki loa laumalie ala na kotou fakapopula.

²¹ E kau toe taaki loa mo okoutou pulou, Ti e kau saofaki loa loku kakai i okoutou lima ; E leaise lotou toe liliu loa ko ni mounu i okoutou lima. Ti e kotou iloa loa ko au ko le Eteleno.

²² O tupu e kotou fakamamae le loto o le tagata agatonu ki ni loi, Leia na leaise kau fakamamaei, Ti e tupu e kotou fakamakeke a lima o le tagata agaveli Ke aua na mavae a ia i lona ala veli ke mauli ai,

²³ E leaise kotou toe maua loa ni tio vaiga, Ti e leaise kotou toe fai ia loa ni kikite ; E kau saofaki loa i okoutou lima loku kakai. Ti e kotou iloa loa ko au ko le Eteleno.