Esekiele 12 - Tosi Tapu

Tautea o le sau : mavetevete o Iselaele

¹ Na tuku mai loa le folafola a le Eteleno kiate au, o pati :

² Vosa o le tagata, e ke nofo i loto malie o se famili o ni kau agatuu, ala e maua ia ni fa mata ke tio kae e leaise lotou tio fuai, ni taliga ke logo kae e leaise lotou logo fuai ; talie ko se famili o ni kau agatuu.

³ Ti ko koe, vosa o le tagata, sapena ou nea ki le fanoga, ti ke ano i le ao, i olatou mua ! Ke ke ano kae lotou tio ki ai, i le ganea leia e ke nofo ai ki se tasi ake ganea kese : na saga e lotou matala loa i ai ko se famili latou o ni kau agatuu.

⁴ Ke ke ave ou nea fanoga i le ao i olatou mua ; ti ko koe, ke ke ano loa i le afiafi i olatou mua, ofaipe le ano a ni kau popula.

⁵ I olatou mua, e ke puui loa le paa, ti e ke fakaulu loa au nea i ai.

⁶ I olatou mua, e ke teki loa au kavega ki lou tuauma, ti e ke ave loa latou ki fafo i le fakapouli, ti e ke fakapulou loa ou mata ke aua na ke tio ki le kele ; talie e kau loto ke ke liliu ko se fakamailoga ki le fale o Iselaele.

⁷ Na kau fai ki le nea leia na fakatotonu mai kiate au : Na kau too loa i le ao a kavega ki loku fanoga, ti na kau puui loa le kaua ki loku lima i le afiafi, ti na kau fakaulu aku nea fanoga ki fafo i le pouli, ti na kau teki loa latou ki loku tuauma i olatou mua.

⁸ I le usu na tuku mai loa le folafola a le Eteleno kiate au, o pati :

⁹ Vosa o le tagata, ko le fale o Iselaele, le famili lena o ni kau agatuu, pe na leaise lotou vesili atu kiate koe : Kolea e ke fai ?

¹⁰ Pati kia latou : E folafola le Aliki, le Eteleno, o pati : Ko le folafola leinei o uiga mo le pule leia e nofo i Selusalemi, mo le fale katoa o Iselaele leia e nofo i ai.

¹¹ Ke ke pati : Ko se fakamailoga au kia koutou. Ko le nea leia na kau fai, ko ia leia e fai loa kia latou : E lotou ano loa ki le popula i se fenua mamao.

¹² Ko le pule leia e nofo i loto malie o latou, E teki ia loa lana kavega ki lona ua i le pouli, ti e ano loa ; E puui loa le paa ke fakaulu ai a ia ki fafo ; E pulou loa ona mata, Ke aua na tio ona mata ki le kele.

¹³ E kau folasi loa laku kupega kiate ia, Ti e maua loa a ia i laku masele ; E kau ave loa a ia ki Papilone, ki le fenua o le kau Kaletea ; Kae e leaise tio loa a ia ki ai, ti e mate loa a ia i ai.

¹⁴ Ko latou fuli ala e nonofo i ona tafa ti na tokoi kiate ia, Ti mo lana kau solia katoa, e kau fakamavete loa latou ki atu matagi fuli, Ti e kau kapu loa latou ki le seleta.

¹⁵ Ti e lotou iloa loa ko au ko le Eteleno, Mo ka kau veteki loa latou i atu puleaga, Mo ka kau fakamavete loa latou i fenua kesekese.

¹⁶ Kae e kau fakatoe loa ia latou ni tagata Ala e sao loa i le seleta, mo le oge, ti mo le taumasaki, O tupu ke lotou fakamatala alatou aga fakalialia fuli I puleaga ala e lotou ano loa ki ai. Ti e lotou iloa loa ko au ko le Eteleno.

¹⁷ Ti na tuku mai loa le folafola a le Eteleno kiate au, o pati :

¹⁸ Vosa o le tagata, e ke kai loa lau pane i le lulu, E ke inu loa lau vai i le tuania mo le i.

¹⁹ Pati ki le kakai o le fenua : Ko leinei le folafola a le Aliki, le Eteleno, Ki kakai o Selusalemi i le kele o Iselaele ! E lotou kai loa lalatou pane i le mamae, Ti e lotou inu loa lalatou vai i le i, Talie e mativa loa le fenua i nea fuli e mau e ia, O tupu ko le agamakeke o latou fuli ala e nonofo i ai.

²⁰ E maumau loa a kolo ala na apiapi, Ti e liliu loa le fenua ko se toafa. Ti e kotou iloa loa ko au ko le Eteleno.

²¹ Ti na tuku mai loa le folafola a le Eteleno kiate au, o pati :

²² Vosa o le tagata, kolea le uiga o masau gologolo ana E kotou fai i le fenua o Iselaele : Kua fakalaka a aso, kae e leaise soko fua se kikite ?

²³ Koia, ke ke pati kia latou : E folafola le Aliki, le Eteleno, o pati : E kau fakagato loa a masau gologolo ana : E leaise toe fai loa latou i le fenua o Iselaele. Kae ke ke pati kia latou : Kua ofi mai a aso Ala e fakasoko ai loa a tio fuli.

²⁴ Talie e leai loa ni tio vaiga, Pe ko ni kikite kaka I loto malie o le fale o Iselaele.

²⁵ Talie ko au, le Eteleno, e kau masau loa ; Ko le nea leia e kau fakasa loa e soko loa, Ti e leaise toe tuvai loa a ia ; Io, i okoutou aso, famili o kau agatuu, E kau fakasa loa se folafola ti e kau fakasoko loa a ia, E pati le Aliki, le Eteleno.

²⁶ Na tuku mai le folafola a le Eteleno kiate au, o pati :

²⁷ Vosa o le tagata, ko leinei, e pati le fale o Iselaele : Ko tio ala e maua e ia e leikiaise papaliga ke soko ; E kikite a ia ki ni temi mamao.

²⁸ Koia, ke ke pati kia latou : E folafola le Aliki, le Eteleno, o pati : E leaise tuvai loa le fakasoko o aku folafola ; E soko maoki loa le folafola leia e kau fakasa loa, E pati le Aliki, le Eteleno.