Esekiele 11 - Tosi Tapu

Fakamaau o le kau pagani ; fakapapau o le malolo

¹ Na too loa au e le Laumalie, o ave ki le matapa o le fale o le Eteleno, leia e aga ki le potu esite. Ti ko leinei, i le uluaga o le matapa na i ai ni kau tagata e tino lua tupu lima ; ti na kau tio loa i loto malie o latou kia Saasania, vosa o Asule, mo Pelatia, vosa o Penasa, ko pule laua o le kakai.

² Ti na pati mai loa le Eteleno kiate au : Vosa o le tagata, ko ni tagata latou e fakakaukau ki le veli, ti e lotou tuku ia ni tokoi veveli i le kolo leinei.

³ E lotou pati : E leaise ko le temi leinei ke tou fau ai i leinei ni fale ! Ko le kolo ko le fa kulo, ti ko tatou ko ni inati.

⁴ Koia, vosa o le tagata, kikite kia latou !

⁵ Ti na ulu loa le Laumalie o le Eteleno kiate au. Ti na pati mai loa a ia kiate au : Pati : Ko leinei le folafola a le Eteleno : E kotou masau fenaaki, fale o Iselaele ! Ti ko le nea leia e pale ake i okoutou fakakaukau e kau iloa malie a ia.

⁶ Na kotou liuliuga a tukipo i le kolo leinei, Na kotou fakaapele a ala ki mate.

⁷ Koia e folafola ai le Aliki, le Eteleno, o pati : Ko okoutou mate ala na kotou laku i loto malie o le kolo Ko le inati latou, ti ko le kolo, ko le kulo a ia ; Kae ko koutou, e fakamavae loa koutou i ai.

⁸ E kotou i ki le seleta, Kae e kau kakau mai loa kia koutou le seleta, E pati le Aliki, le Eteleno.

⁹ E kau fakamavae loa koutou i loto malie o le kolo, E kau tuku loa koutou ki lima o ni kau matapule, Ti e kau fakasoko loa kia koutou aku fakamaauaga.

¹⁰ E kotou mamate loa i le seleta, E kau fakamaau loa koutou i le koiga o Iselaele, Ti e kotou iloa loa ko au ko le Eteleno.

¹¹ E leaise liliu loa le kolo ko se kulo kia koutou, Ti e leaise kotou liliu loa ko ni inati i lotomalie o ona : Talie e kau fakamaau loa koutou i le koiga o Iselaele.

¹² Ti e kotou iloa loa ko au ko le Eteleno, Leia na leaise kotou fakalogo ki ana fakatotonu Pe na fai ia ana lao ; Kae na kotou mulimuli ki lao o puleaga ala e takatakai ia koutou.

¹³ Koi kau lolotoga kikite, kae mate loa Pelatia, vosa o Penasa. Na kau fakasiga loa ki oku mata, ti na kau tagi leo lasi : Ei Aliki Eteleno, pe ke fakapuli loa le nea leia e toe i Iselaele ?

¹⁴ Ti na tuku mai loa le folafola a le Eteleno kiate au, o pati :

¹⁵ Vosa o le tagata, ko ou fetaina, io, ko ou fetaina totonu, Ala o lou famili, ti mo le fale katoa o Iselaele, Ala e pati ki ai le kakai o Selusalemi : Kotou nonofo mamao i le Eteleno, Na soli mai le fenua kia matou ke motou maua tofiga.

¹⁶ Koia leia e ke pati ai loa : E folafola le Aliki, le Eteleno, o pati : Kapau e kau taofi latou i loto malie o atu puleaga, Kapau na kau fakamavetevete latou i fenua kesekese, E kau liliu loa kia latou ko se maloloaga i se ga temi I fenua ala na lotou kaku ki ai.

¹⁷ Koia e ke pati ai loa : E folafola le Aliki, le Eteleno, o pati : E kau toe fakatasi loa koutou i loto malie o atu puleaga, E kau too loa koutou i fenua ala na kotou mavetevete ai, Ti e kau tuku loa kia koutou le fenua o Iselaele.

¹⁸ Ko lena le ganea e lotou ano loa ki ai, Ti e lotou too loa i ai a taulaatua fuli mo nea fakalialia fuli.

¹⁹ E kau soli loa kia latou se loto e tasi, Ti e kau tuku loa kia koutou se laumalie foou ; E kau too loa i olatou tino le mafu fatu, Ti e kau soli loa kia latou se mafu kanofi,

²⁰ O tupu ke lotou mulimuli i aku fakatotonu, Ti ke lotou tausi mo fai aku lao ; Ti e lotou liliu loa ko loku kakai, ti e kau liliu loa ko lolatou Atua.

²¹ Kae kia latou ala e fiafia olatou loto i alatou taulaatua mo alatou nea fakalialia, E kau fakavilo loa alatou gaoiaga ki olatou ulu, E pati le Aliki, le Eteleno.

Mavae o le kololia o le Eteleno i Selusalemi

²² Ti na folasi loa e Selupino olatou kapakau, o ano, ti na ano foki mo teka ; ti na ano loa i aluga o latou le kololia o le Atua o Iselaele.

²³ Na malaga ake loa ki aluga le kololia o le Eteleno i le loto kolo, o tuu i le mauga leia i le potu esite o le kolo.

²⁴ Ti na too loa au e le Laumalie, o ave ki Kaletea ki le kau popula ; ti na puli loa le nea leia na kau tio ki ai i oku aluga.

²⁵ Na kau fakasa loa ki le kau popula a folafola fuli a le Eteleno ala na tuku mai e ia kiate au.