Esekiele 10 - Tosi Tapu

Mavae o le kololia o le Atua i le fale tapu

¹ Na kau tio loa, ti ko leinei, i aluga o le lagi leia na tuu i aluga o ulu o selupino, na i ai se nea ofaipe le fatu ko le safile ; na sa i olatou aluga se nea ofaipe se ekeekeaga fakasau.

² Ti na pati loa le Eteleno ki le tagata leia na kofu ki le kofu tea fulumalie : Ano ki le vasa o teka ala i lalo o Selupino, ti fakaapele ou lima ki ni malala kaka ala e ke too loa i le vasa o selupino, o liligi latou ki le kolo ! Ti na ano loa a ia i oku mua.

³ I le ulu atu a le tagata, na tutuu a selupino i le fetuu atamai o le fale, ti na fakaapele loa e le ao le malae loto.

⁴ Na malaga ake loa le kololia o le Eteleno i aluga o selupino, o ano ki le mua matapa o le fale tapu ; ti na apele loa le fale i le ao, ti na apele loa le malae i le kololia fulumalie o le Eteleno.

⁵ Ti na logo loa o kaku ki le lotoa i fafo le patu o kapakau o selupino, ofaipe le leo o le Atua mafimafi mo ka folafola.

⁶ Ti na tuku loa e le Eteleno le fakatotonu leinei ki le tagata leia na kofu ki le kofu tea fulumalie : Too se afi i le vasa o teka, i le vasa o selupino ! Ti na ano loa le tagata lena, o tuu feofi ki teka.

⁷ Ti na falo loa e se selupino lona lima ki le afi leia na tuu i le vasa o selupino ; ti na too loa e ia se afi, o fakatoo ki lima o le tagata leia na kofu ki le kofu tea fulumalie. Ti na too loa e le tagata lena le afi, o ulu ki fafo.

⁸ Na sa mai loa i lalo o kapakau o selupino ni nea ofaipe ni lima o se tagata.

⁹ Na kau tio foki ki ni fa teka e fa, ti na tuu le fa teka e tasi i tafa o le selupino e tasi ; ti na fai a fa teka ana pe le fatu ko le kilisolite.

¹⁰ I olatou agaaga, na tatau a fa teka fuli, ti na sakinake na ulu le fa teka i loto o le tasi fa teka.

¹¹ I lalatou saele, na lotou ano ki fetuu e fa, ti na leaise lotou maliu. Kae na lotou ano ki le ganea leia na agaaga ki ai a ulu, ti na leaise lotou toe mafuli i lalatou saele.

¹² Na apele i mata le tino katoa o selupino, mo olatou tua, mo olatou lima, ti mo olatou kapakau, ofaipe fa teka e fa i lolatou takatakai katoa.

¹³ Na kau logo loa e fakaigoa a fa teka ko asesio.

¹⁴ Na lotou maua taki tasi ni mata e fa : ko le uluaki mata ko le mata o le selupino, ko le lua mata ko le mata o le tagata, ko le tolu mata ko le mata o le laione, ti ko le fa mata ko le mata o le akuila.

¹⁵ Ti na malaga loa ki aluga a selupino. Ko leinei ko manu ala na kau tio ki ai i le laugutu o le vaitafe ko Kepale.

¹⁶ Ka saele a selupino, ti saele a fa teka i olatou tafa ; ti ka folasi olatou kapakau ke lotou malaga i le kele, ti e leaise toe mavae foki a fa teka i a latou.

¹⁷ Ka lotou tuu, ti tuu a fa teka ; ti ka lotou malaga ki aluga, ti e malaga foki a fa teka mo latou, talie na nofo le laumalie o manu ia latou.

¹⁸ Na mavae loa le kololia o le Eteleno i le mua matapa o le fale tapu, o ano o tuu i aluga o selupino.

¹⁹ Na folasi loa e selupino olatou kapakau, ti na lotou malaga loa i le kele ki aluga i oku mua, ti na kau tio foki na lotou ano fakatasi mo teka. Na lotou tuu loa i le uluaga o le fale o le Eteleno i le potu esite, ti na tuu i aluga o latou le kololia o le Atua o Iselaele.

²⁰ Ko leinei ko manu ala na kau tio ki ai i kauvai o le vaitafe o Kepale, na tuu i lalo o le Atua o Iselaele, ti na kau matala loa ko selupino latou.

²¹ Na mata fa le manu e tasi, mo kapakau e fa, ti na i ai se nea ofaipe se lima o se tagata i lalo o olatou kapakau.

²² Na fai olatou mata pe mata ala na kau tio ki ai i le vaitafe ko Kepale ; na lotou agaaga tasi, ko latou totonu ai. Na lotou tasi saele fakaagatonu i ona mua.