Esekiele 1 - Tosi Tapu

Sa o le Aliki kia Esekiele : Kololia o le Eteleno

¹ I le kau tolu fetuu, i le aso lima o le masina fa, i laku nofo mo le kakai popula i le vaitafe o Kepale, na mavaa loa le lagi ti na kau tio loa ki ni nea fakaatua.

² I le aso lima o le masina, ko le fetuu lima a ia o le popula o le sau ko Sosakimi,

³ Na tuku loa le folafola a le Eteleno kia Esekiele, vosa o Pusi, ko le tagata faisakilifisio, i le fenua o le kau Kaletea, o ofi ki le vaitafe o Kepale ; ti na iate ia loa le lima o le Eteleno.

⁴ Na kau tio loa, ti ko leinei, na au loa mei le potu noleto se asesio : ko se ao matotolu mo se afi takamilomilo, ti na takatakai a ia e se malama, ti na gigila i loto malie ofaipe se sila momole leia nao too fua mei le afi.

⁵ I loto malie foki, na sa ni manu mauli e fa, ala na mata pe ni tagata.

⁶ Na lotou tasi mo ia ni fa mata e fa, ti na lotou tasi mo ia ni kapakau e fa.

⁷ Na sasako olatou vae, ti na fai olatou alofivae pe ni alofivae o se uviki pipi ; ti na lotou gigila ofaipe le sila momole.

⁸ Na lotou maua ni limai tagata i lalo o olatou kapakau i olatou fetuu e fa ; ti na lotou tasi mo ia toka fa ona mata mo ona kapakau.

⁹ Na feuluaki a potupotu o olatou kapakau. Na lotou tasi saele fakaagatonu ki mua ti na leaise toe mafuli kese olatou tino.

¹⁰ Na lotou tasi mo ia fuli se matai tagata, mo se matai laione i le fetuu atamai, mo se matai pipi i le fetuu sema, mo se matai akuila.

¹¹ Na mafola loa ki aluga a kapakau e lua, o pipiki tasi ; kae uufi loa e la ake kapakau e lua ola kuaga.

¹² Na latou tasi saele fakaagatonu i ona mua. Ti na lotou ano ki le ganea leia na taki latou ki ai e le Laumalie, ti na leaise lotou tafoki i lalatou saele.

¹³ I vasa o manu mauli ana na i ai ni nea ala na faipe ni malala kaka, ti na feanoaki i ai ni nea ala na faipe ni malama ; ti na au mei le afi se malama gigila mo ni uila.

¹⁴ Ti na makape ti na toe foki mai a manu ofaipe le mu o le uila.

¹⁵ I le lolotoga o laku tio ki manu ana, ko leinei, na tuu se fa teka e tasi ki le kele, o ofi ki manu, i mua olotou mata e fa.

¹⁶ Na fai a teka ana pe le kilisolite, ti na tatau fuli latou toka fa ; i lolatou gaoi mo lolatou fau na sakinake e tuku le tasi fa teka i loto o le tasi fa teka.

¹⁷ Na mafai ke lotou ano ki fetuu e fa kae aua na lotou toe foki i lalatou saele.

¹⁸ Na lotou taualuga lasi ai, ti na apele le takatakai katoa o fa teka i ni fa mata.

¹⁹ Ka ano a manu, ti e ano a fa teka i olatou tafa ; ti ka malaga ki aluga a manu i le kele, ti e toe malaga foki ki aluga a fa teka i le kele.

²⁰ Na lotou ano ki le ganea leia na taki latou ki ai e le Laumalie ; ti na ano a fa teka mo latou, talie na nofo le laumalie o manu i fa teka.

²¹ Ka saele a manu, ti toe saele a fa teka ; ka lotou tuu, ti e toe tuu foki a fa teka ; ka lotou malaga ki aluga i le kele, ti e toe malaga foki ki aluga a fa teka i le kele mo latou, talie na nofo le laumalie o manu i fa teka.

²² I aluga o manu, na i ai pe se lagi usi gigila, leia na mafola i aluga o olatou ulu.

²³ I lalo o le lagi lena, na tutuu fakasako ki aluga a kapakau e lua o manu ti na la felaveaki, kae na uufi e la ake kapakau e lua olatou tino.

²⁴ I lalatou saele, na kau logo loa ki le logoa o olatou kapakau, ofaipe le gugulu o vai lalasi, ofaipe le leo o le Mafimafi, pe ko se logoa o se solia toka api ; ka lotou tuu loa, e lotou fakavilo loa olatou kapakau.

²⁵ Ti na i ai loa se logoa leia na au mei le lagi i aluga o olatou ulu, i le temi leia e lotou tuu ai, o fakavilo olotou kapakau.

²⁶ I le lagi leia i aluga o olatou ulu, na i ai se nea leia na faipe le safile, ti na fai foki pe se ekeekeaga fakasau ; ti na sa i aluga o le nea lena na faipe se ekeekeaga fakasau se mata o se tagata leia na teki i ai.

²⁷ Na kau toe tio foki ki se nea ofaipe se sila gigila, ofaipe se afi, ti na tuu le tagata lena i loto o le nea lena, ti na takatakai a ia e se malama gigila i ona vakavaka o kaku ki aluga ; ti i ona vakavaka o kaku ki lalo, na kau tio ki se nea ofaipe se afi, ofaipe se malama gigila leia na takatakai ia a ia.

²⁸ Na tatau le malama gigila lena na takatakai ia a ia mo le malama o le nuanua i se aso ua. Ko se paaki a ia o le kololia o le Eteleno. I laku tio ki le nea lena, na kau fakamapee loa, o fakatuu oku mata ki le kele, ti na kau logo loa ki le leo o se tasi leia na masau.