Esaia 9 - Tosi Tapu

¹ Ko le kakai leia na saele i le fakapouli Kua tio ki se malama lasi ; Ko latou ala na nonofo i le fenua o le ata o le mate, Kua mu kia latou se malama.

² Kua ke fakaliliu le kakai o toka api, Kua ke tuku kiate ia se fiafia lasi ; Kua fiafia a ia i ou mua, ofaipe le fiafia i le tuuti o le fulumeto, Ofaipe le kalaga fakafiafia i le vae o koloa o le tau.

³ Talie ko le fa amo leia na taomi ia lona ua, Mo le tokotoko leia na ta ia lona tua, Mo le laakau leia na fakapopula ia a ia, Kua ke fatii latou, ofaipe le aso o Matiane.

⁴ Talie ko taka fuli ala na taka ki ai i le tau, Ti mo teu tau fuli ala na kelekele i le toto, E laku loa ki ulaula, Ke tutu latou e le afi.

⁵ Talie kua tupu kia matou se toe, kua soli mai kia matou se vosa, Ti e teki loa le pule i lona tuauma ; E fakaigoa loa a ia ko Fulumalie, Tokoi, Atua mafimafi, Tamana lee gato, Aliki o le tokamalie.

⁶ E fakamafola loa e ia lana pule ki atu puleaga, E tuku loa e ia le tokamalie lee gato ki le ekeekeaga fakasau o Tavite, mo lona puleaga, Ti e fakamakeke loa e ia a ia ti mo poupou a ia ki le lao mo le faitotonu, I le temi nei o lee gato : Ko lena le nea e fai loa e le Eteleno o kau tau i lona alofa lasi.

Ko le fakamaau o Iselaele mo Suta

⁷ E kakau e le Eteleno se folafola kia Sakopo, Ti kua vilo a ia ki Iselaele.

⁸ Ti e iloa loa a ia e le kakai katoa, Io, e Efalaimi mo le kakai o Samalia, Ala e pati i le nekenekea mo le fia nealasi :

⁹ Kua maluluku ki lalo ni piliki, Kae e motou toe lagai loa latou ki ni fatu ta ; Kua tuutuu ki lalo ni pou sikomole, Kae e motou toe fetogi loa latou ki ni pou sete.

¹⁰ E fakatuu loa e le Eteleno ke agatuu kia latou a fili o Letisini, Ti e fakamasafu loa e ia olatou fili,

¹¹ Le kau Silia i le potu esite, mo le kau Filisitini i le potu uesite ; Ti e lotou kai maaga loa Iselaele. Kae logo ai a nea fuli ana, e leaise malu loa lona itaita, Ti koi falo aifai lona lima.

¹² Talie e leaise toe liliu mai le kakai ki leia e taai ia a ia, Ti e leaise afa e ia le Eteleno o kau tau.

¹³ Koia e taaki ai loa e le Eteleno le ulu mo le siku o Iselaele, Le taulu palemie mo le fa u i se aso fai e tasi.

¹⁴ (Ko le matua mo le tui fakamaau, ko le ulu a ia, Ti ko le polofeta leia e akonaki i le loi, ko le siku a ia.)

¹⁵ Ko le kau takitaki o le kakai leinei e fakasese ia a ia, Ti e puli noa latou ala e fakalogo.

¹⁶ Koia e leaise mafai ke fiafia le Aliki ki ona tagata tupulaga, Pe alofa ki ona fanau sala matua mo ona fafine lokonui ; Talie ko latou fuli ko ni kau malualoi mo ni kau agaveveli, Ti e masau olatou gutu fuli ki nea fakalialia. Kae logo ai a nea fuli ana, e leaise malu lona itaita, Kae koi mafao aifai lona lima.

¹⁷ Talie e kaikai le agaveli ofaipe le afi, Leia e tutu ia a uluvao gaoa mo talatala ; E tutu e ia le vaomatua matotolu, leia e mafuta ai ni afu matotolu.

¹⁸ Io, e tutu loa e le sausau o le Eteleno o kau tau le fenua, Ti e fai loa le kakai pe se nea kai a le afi ; E leaise saofaki loa e se tasi lona taina.

¹⁹ E kaia i le fetuu atamai, kae e pakupaku aifai ; E kaia i le fetuu sema, kae e leaise makona aifai ; E tasi kai e le tagata le kakano o lona lima.

²⁰ E kai e Manase a Efalaimi, ti e kai e Efalaimi a Manase, Ti e la oso fakatasi o kai a Suta. Kae logo ai nea fuli ana, e leaise makona aifai le sausau o le Eteleno, Kae koi falo aifai lona lima.