Esaia 8 - Tosi Tapu

Ko le maumaui o Tamaso mo Samalia.

¹ Na pati mai loa le Eteleno kiate au : Too se laupapa lasi, ti ke tosi i ai, ke matala malie : Ke fakavilivili o kaia, ke oso fakatavili ki koloa.

² Na kau too loa ni tagata fakamaoki agatonu, ko le tagata faisakilifisio ko Uli ti mo Sakalia, vosa o Pelekia.

³ Na kau momoe loa mo laku avaga, le fafine polofeta ; na tinae loa a ia, ti na fanaui loa e ia se tama. Na pati mai loa le Eteleno kiate au : Fakaigoa a ia ko Maele-Salale-Kase-Pase.

⁴ Talie i mua o le poto o le toe i le pati : Loku tamana ! loku tinana ! e ave loa a koloa o Tamaso mo koloa o Samalia ki le sau o Asilia.

⁵ Na toe folafola mai loa le Eteleno kiate au, o pati :

⁶ O tupu na tiaki e le kakai leinei a vai o Siloe ala e tafe mamalie, Kae na lotou fiafia ia Letisini mo le vosa o Lemalia,

⁷ Ko leinei, e fai loa e le Aliki ke pale mai kia latou A vai makeke mo lalasi o le vaitafe (Le sau o Asilia mo lona kololia katoa) ; E pale loa a ia i lona tafeaga i ganea fuli, Ti e mafola loa a ia i ona kauvai fuli.

⁸ E ulu loa a ia ki Suta, e tafe loa a ia ki tafa, o fakalofia a nea fuli, Ti e kaku loa a ia ki le ua. E folasi loa e ia ona kapakau O fakaapele lou fenua katoa, ei Emanuele !

Ko le toetoega o le kau agatonu

⁹ Kakai, ke kotou fakamapa ni kalaga tau ! ti e fatifatii loa koutou ; Kotou fakalogo mai okoutou taliga, koutou fuli ala e nonofo i mamao ! Kotou teuteu ki le tau, ti e fatifatii loa koutou ; Kotou teuteu ki le tau, ti e fatifatii loa koutou.

¹⁰ Kotou fai ni fakatuutuu, ti e lotou ano noa loa ; Kotou tuku ni fakatotonu, ti e leaise lotou aoga loa : Talie e kau le Atua mo matou.

¹¹ Ko leinei le folafola a le Eteleno kiate au, i le aso leia na too ai lona lima kiate au, Ti na fakasa fakatomua mai e ia kiate au ke aua na kau saele i le ala o le kakai leinei :

¹² Aua na kotou fakaigoa ko le tau a nea fuli ala e fakaigoa e le kakai leinei ko le tau ; Aua na kotou i ki le nea leia e lotou i ki ai, ti aua na kotou lulu.

¹³ Ko le Eteleno o kau tau leia e tonu ke kotou iloa ko le Maokioki, Ti ko ia leia e tonu ke kotou i ki ai, ti ke kotou lulu ki ia.

¹⁴ Ti e soko loa a ia ko se sagatualio, Kae e toe liliu foki a ia ko se fa fatu fakatupu tukia, Ko se utu fakatupu siga ki fale e lua o Iselaele, Ko se kupega mo se masele Ki le kakai o Selusalemi.

¹⁵ E tukia loa se toka api ; E lotou sisiga loa ki lalo o fatifati, E lotou pikiia loa i masele o mamate.

¹⁶ Kofukofu le fakamaoki leinei, Fakamaumau le levelasio leinei iate koe, ke gato i aku tisipulo.

¹⁷ E kau amanaki malie ki le Eteleno, Leia kua tapono ia ona mata ki le fale o Sakopo ; E kau tuku laku fanaki kiate ia.

¹⁸ Ko leinei, ko au mo fanau ala na tuku mai e le Eteleno kiate au, Kua motou liliu ko ni fakamailoga mo ni nea fakatalatupua i Iselaele, Mei le Eteleno o kau tau, Leia e nofo i le mauga o Sione.

¹⁹ Kapau e pati atu kia koutou : Kotou afa kia latou ala e felogoi mo le kau mate ti mo latou ala e kikite ia le apogipogi, Ala e fai ia ni mapu mo ni mumusu. Kotou tali : Pe leaise totonu koia ke afa e le kakai ki lona Atua ? Pe totonu koia ke afa ki le kau mate kae tiaki leia e mauli ?

²⁰ Afa ki le Lao mo le fakamaoki ! Kapau e leaise masau felaaki, Ti e leai loa se mafoata ki le kakai.

²¹ Kae e foli noa loa a ia i le fenua, i le mamae mo le pakupaku. Ti ka fia kai loa a ia, e itaita loa a ia, O lauveli ki lona sau ti mo lona Atua, Ti e tio loa ona mata ki aluga ;

²² Ti e toe tio loa a ia ki le kele, Ti ko leinei, ko le mamae, mo le fakapouli, mo tuania fakaii : E tuku loa a ia ki se fakapouli matotolu.

Ko le temi o le Mesia

²³ Kae e leaise pule tuumau loa le fakapouli I le kele leia e maua ai i le aso nei ni mamae lalasi : Kapau na kofu e le luma i temi kua sili Le fenua o Sapulone mo le fenua o Nefetali, Kae i le temi ka au, e kofu loa e le kololia le fenua o le mata tai, i le tua Solotane, Le fenua o le kau pagani.