Esaia 66 - Tosi Tapu

Fakalialia o le Atua ki le malualoi

¹ Ko leinei le folafola a le Eteleno : Ko le lagi ko loku ekeekeaga fakasau, Ti ko le malama nei ko loku tekitekiaga vae. Ko le fale fea leia e feala ke kotou fakatuu mai loa kiate au, Ti ko le potu fea leia e kotou soli mai loa ke kau malolo ai ?

² Ko nea fuli ana, ko loku lima leia na fai ia latou, Ti ko nea fuli a aku, e pati le Eteleno. Kae ko leinei leia e tio loa ki ai oku mata : Ki leia e mamae ti mo leia e loto fakasemala maoki, Ki leia e i ki laku folafola.

³ Ko leia e momoli ia se pipi e tatau mo leia e tamate ia loa se tagata ; Ko leia e momoli ia se akeno e tatau mo leia e fatii ia loa le ua o se kuli, Ko leia e momoli ia se moliga e tatau mo leia e liligi ia loa le toto o se puaka, Ko leia e tutu ia se iseso e tautau mo leia e tausi loa ki ni taulaatua. Ko latou fuli ana na fiafia i olatou ala, Ti na maua e olatou laumalie lolatou fiafia i alatou nea fakalialia.

⁴ Ko au foki, e kau fiafia loa i lolatou mamae, Ti e kau kakau mai loa kia latou le nea leia e lotou i ki ai ; Talie na kau kalaga, ti na leaise lotou tali mai, Talie na kau masau, ti na leaise lotou fakalogo mai ; Kae na lotou fai le nea leia e veli ki oku mata, Ti na lotou filifili le nea leia e kau vesia ki ai.

⁵ Kotou fakalogo ki le folafola a le Eteleno, Koutou ala e i ki lana folafola. Ko leinei le nea e pati ki ai okoutou fetaina, Ala e vesia kia koutou ti e fakalialia kia koutou O tupu ko loku suafa : Ke fakasa e le Eteleno lona kololia, Ti ke motou tio ki lokoutou fiafia ! Kae e lotou luma loa.

⁶ E au se leo makeke mei le kolo, E ulu se leo mei le fale tapu. Ko le leo o le Eteleno, Leia e tuku ia ki ona fili lolatou totogi.

Ko le tupu o Iselaele i se aso e tasi

⁷ I mua o le laga o lona ganea, Na fanau a ia ; I mua o le mamae o lona ganea, Na fanaui e ia se vosa.

⁸ Ko ai na logo ki se nea felaaki i se aso ? Ko ai na tio ki se nea felaaki i se aso ? Pe feala ke tupu se fenua i se aso e tasi ? Pe feala ke fanaui se puleaga i se faiaga e tasi ? Koi kamata atu lana gaoi, kae na fanaui e Sione ona vosa !

⁹ Pe kau fakamavaa ia loa le manava o le tinana, Ke aua na fanau a ia ? e pati le Eteleno ; Ko au, leia e fakafanau ia, Pe e kau taofi ia loa ke fanaui le toe ? e pati lou Atua.

¹⁰ Kotou fiafia mo Selusalemi, Kotou fai kiate ia le tupuaga o lolatou nekenekea, Koutou fuli ala e alofa kiate ia ; Kotou soposopo mo ia i le fiafia, Koutou fuli ala e mamae o tupu ko ia ;

¹¹ O tupu ke fagai koutou ke makokona Ki le sua u o ana fakapelepele, O tupu ke kotou mimiti i le fiafia Le apele katoa o lona kololia.

¹² Talie e folafola le Eteleno : Ko leinei, e kau tuku loa kiate ia le tokamalie ofaipe se vaitafe, Ti mo le kololia o atu puleaga ofaipe se vaitafe lau lasi. E fakau loa koutou, E luluku loa koutou i lima, Ti e amoamo loa koutou i tuli.

¹³ Ofaipe se tagata leia e fakapelepele e lona tinana, E kau fakapelepele felaaki loa koutou ; E kau fakapelepele loa koutou i Selusalemi.

¹⁴ E kotou tio loa ki ai, ti e fiafia loa lokoutou loto, Ti e toe maua loa e okoutou ivi se makeke ofaipe le laakau sesega. E fakasa loa e le Eteleno lona mafimafi ki ana tagata fakasausau, Kae e fakamamafa loa e ia lona sausau ki ona fili.

¹⁵ Talie ko leinei, e au le Eteleno i se afi, Ti e fai ana saliote pe se sasataki ; E fakaliliu e ia lona sausau ko se vela, Ti mo ana valoki ko ni ulai afi.

¹⁶ Talie e fai e le Eteleno ana fakamaauaga ki le afi, Ti e tautea e ia a kanofi fuli ki le seleta ; Ti e toka api loa latou ala e tamate loa e le Eteleno.

¹⁷ Ko latou ala e fakatapui mo fakamea i oloto, Ala e lotou ulu taki toka tasi ki ai, Ala e kai ki inati o puaka, Ki ni nea fakalialia ti mo ni kimoa, Ko latou fuli ana e mamate loa, e pati le Eteleno.

¹⁸ E kau iloa alatou gaoi mo alatou manatu. Kua soko mai le temi leia ke fakatasi ai a atu puleaga fuli Ti mo masau fuli ; E lotou au loa ti e lotou tio loa ki loku kololia.

¹⁹ E kau tuku loa se fakamailoga ia latou, Ti e kau kakau loa latou ala na sao ia latou ki atu puleaga, Ki Talesisi, ki Pule mo Lute, ala e faikalolo, Ki Tupale mo Savani, Ki atu motu mamao, Ala na leikiaise logo masau kiate au i se aso, Ti na leikiaise tio ki loku kololia ; Ti e lotou fakasa loa loku kololia i atu puleaga.

²⁰ E lotou aumai loa okoutou fetaina fuli mei puleaga fuli, Ofaipe se moliga ki le Eteleno, I ni osi, mo ni saliote ti mo ni palepale, I ni asino ti mo ni kamelo, Ki loku mauga maokioki, Ki Selusalemi, e pati le Eteleno, Ofaipe le aumai e fanau o Iselaele o lalatou moliga, I se ipu mea, Ki le fale o le Eteleno.

²¹ Ti e kau too foki ia latou Ni tagata faisakilifisio, mo ni levita, e pati le Eteleno.

²² Talie, ofaipe le lagi foou Mo le kele foou ala ka kau fakatupu loa E tutuu loa i oku mua o lee gato E tutuu loa lokoutou sakoga mo lokoutou igoa i oku mua o lee gato.

²³ I masina foou fuli ti mo sapato fuli, E au loa a kakai fuli o atolasio kiate au, e pati le Eteleno.

²⁴ Ti ka mavae loa mei ai, e tio loa Ki mate o latou ala na agatuu kiate au ; Talie e leaise mamate loa olatou ilo, ti e leaise toe mate loa lolatou afi ; Ti e lotou liliu loa ko se nea fakalialia ki le kakai katoa.