Esaia 65 - Tosi Tapu

Tali a le Eteleno : ko le fakasemala

¹ Na kau tali latou ala na leaise kole ia se nea, Na kau tuku ke maua au e latou ala na leaise afa ia au ; Na kau pati : Ko leinei au, ko leinei au ! Ki se puleaga leia na leaise fakaigoa ki loku suafa.

² Na kau falo oku lima i aso fuli ki se kakai agatuu, Leia e saele i se ala veli, o mulimuli ata ki ana manatu ;

³ Ki se kakai leia e leaise gato lana fakatupu loku ita, Leia e momoli ia ni failaulau i oloto, Ti e tutu ia le iseso i aluga o piliki ;

⁴ Leia e fai lona nofoaga i ni tanuma, Ti e moe i pouli i ana, O kai a inati o puaka Ti mo tanaki i alatou ipu ni nea kai kelekele ;

⁵ Leia e pati : Ano kese, Aua na ke fakafeofi mai kiate au, Talie e kau maokioki !… Ko nea ana ko se afu i oku pogoiisu, Ko se afi leia e leaise toe mate.

⁶ Ko leinei le nea leia na kau fakapapau i loku loto : E mamao iate au le fakalologo, e kau fakaamo loa kia koutou le tua, Io, e kau fakaamo loa kia latou le tua,

⁷ O akoutou agaveli, e pati le Eteleno, ti mo agaveli o okoutou tamana, Ala na tutu ia le iseso i aluga o mauga, ti na nukinuki kiate au i aluga o mauga liliki ; E kau fuafua loa kia latou le totogi totonu o alatou gaoi i le temi kua sili.

⁸ Ko leinei le folafola a le Eteleno : Ka maua se fui vite malie, ti e pati : Aua na maumaui a ia, Talie ko se tapuakina a ia ! E kau toe fai felaaki loa, o tupu ko loku alofa ki aku tagata fakasausau, Ke aua na maumaui nea fuli.

⁹ E kau fakasomo loa se sakoga ia Sakopo, Ti meia Suta se tasi ke maua ia oku mauga ; E maua loa e aku filifiliia le fenua, Ti e nonofo loa aku tagata fakasausau i ai.

¹⁰ E liliu loa le Saloni ko se lotoa ke kai ai a kau manu liliki, Ti mo le vaivailiua o Akole ke se maloloaga o le kau manu lalasi, Ki loku kakai leia e afa ia loa a au.

¹¹ Kae ko koutou, ala e tiaki ia le Eteleno, Ala e galoi ia loku mauga tapu, Ala e fakatuu ia se aletale kia Kate, Ti e fakaapele ia se ipu kia Meni,

¹² E kau tuku loa koutou ki le seleta, Ti e kotou peluki fuli loa a tuli ke tamate koutou ; Talie na kau kalaga atu, ti na leaise kotou tali mai ; Na kau masau, ti na leaise kotou fakalogo ; Kae na kotou fai le nea leia e veli ki oku mata, Ti na kotou filifili le nea leia e kau vesia ki ai.

¹³ Koia e folafola ai le Aliki, le Eteleno, o pati : Ko leinei, e kai loa aku tagata fakasausau, kae e kotou fia kakai loa ; Ko leinei, e inu loa aku tagata fakasausau, kae e kotou fia inu loa ; Ko leinei, e fiafia loa aku tagata fakasausau, kae e kotou luma loa ;

¹⁴ Ko leinei, e sua loa aku tagata fakasausau i le fiafia o olatou loto ; Kae e kotou tagi loa i le mamae o lokoutou laumalie, Ti e kotou tagi laulau loa i le mamae okoutou loto.

¹⁵ E kotou tuku loa okoutou igoa ko se takuga malaia ki aku kau filifiliia ; E fakamamate loa koutou e le Aliki, le Eteleno, Kae soli loa e ia ki ana tagata fakasausau se igoa foou.

¹⁶ Talie ko leia e loto ke tapuakina i le fenua, E loto loa ke tapuakina a ia i le suafa o le Atua o le maoki ; Ti ko leia e fakapapau loa i le fenua, E fakapapau loa i le suafa o le Atua o le maoki ; Talie e galoi loa a mamae afea, E fufu loa latou ki oku mata.

¹⁷ Talie e kau fakatupu loa se lagi foou Mo se kele foou ; E leaise toe manatu loa ki nea kua sili, E leaise lotou toe au loa ki le loto.

¹⁸ Kae ke kotou fakafiafia ti ke kotou nekenekea o lee gato, O tupu ko le nea leia ka kau fakatupu loa ; Talie ka kau fakatupu loa Selusalemi ki le nekenekea, Ti mo lona kakai ki le fiafia.

¹⁹ E kau fai loa ki Selusalemi loku nekenekeaaga, Ti ki loku kakai ko loku fiafiaaga ; E leaise toe logo loa i ai Ki le logoa o ni tagi ti mo le logoa o kalaga.

²⁰ E leaise toe maua loa i ai se toe pe ko se matua Ala e leaise kaku ki le katoa o latou aso ; Talie ko leia e mate loa i lona fetuu kau lelau e tupulaga loa, Ti ko le tagata agasala leia e fetuu kau lelau e malaia loa.

²¹ E lotou fakatuu loa ni fale, ti e lotou nonofo loa i ai ; E lotou to loa ni faisaga vite, ti e lotou kai loa olatou fua.

²² E leaise lotou fakatuu loa ni fale ke nofo ai e se tasi kese, Ti e leaise lotou to loa ni faisaga vite ke kai e se tasi kese le fua ; Talie e fai loa a aso o loku kakai pe aso o laakau, Ti e fiafia loa aku kau filifiliia i le gaoiaga o olatou lima.

²³ E leaise lotou gaoi loa ki le noa, Ti e leaise lotou maua loa ni fanau ke tio ki lolatou mamate ; Talie e lotou liliu loa ko se lanu tapuakina e le Eteleno, Ti e nonofo loa alatou fanau mo latou.

²⁴ I mua o lalatou fetapa mai kiate au, E kau tali loa ; I mua o le tuku o lalatou masau, e kau tali loa.

²⁵ E kai fakatasi loa le lupo mo le akeno, E kai loa e le laione le mutie ofaipe le pipi tagata, Kae ko le nea kai a le gata ko le efu. E leaise toe fai loa se veli pe ko se maumau I loku mauga maokioki katoa, E pati le Eteleno.