Esaia 64 - Tosi Tapu

¹ Ofaipe se ula a se afi na tafu ki se fafie malo, Ofaipe se pula o se vai vela o masa ; E iloa loa e ou fili lou suafa, Ti e lulu loa a atu puleaga i ou mua.

² I le aso na ke fai ai ni nea fakamanamana ala na leaise motou talitali ki ai, Na ke ifo mai loa, ti na sosolo loa a mauga i ou mua.

³ Talie e talu mei le kamataaga o le malama nei, E leikiaise logo se taliga, Pe tio se mata ki se tasi ake atua iate koe, Kua fai ia ni nea ana kia latou ala e fanaki kiate ia.

⁴ E ke ano ki mua o leia e fai ia le faitotonu i le fiafia, Ki mua o latou ala e saele i ou ala ti e manatu kiate koe. Kae na ke ita, o tupu na motou agasala ; Ti e motou mamae i ai o fualoa o kaku ki le aso e fakamauli ai loa matou.

⁵ E motou fai fuli pe ni nea kelekele, Ti e fai lomatou faitotonu katoa pe se kofu kelekele ; E motou fefe fuli ofaipe se lau laakau, Ti e ave matou e amatou agaveli ofaipe le matagi.

⁶ E leaise tasi leia e fetapa ki lou suafa, Leia e ala ake i le usu o pipiki kiate koe : Koia na ke fufu ai ou mata kia matou, Ti na ke tuku ai matou ke mamate i amatou agasala.

⁷ Kae, ei Eteleno, ko koe ko lomatou tamana ; Ko matou ko le kele kula, ti ko koe leia na fau ia matou, Ko matou fuli ko le gaoiaga o ou lima.

⁸ Aua na tuku lou sausau ke kaku ki lona gatoaga, ei Eteleno, Ti aua na ke manatui o tuumau le agaveli ; Kae ke ke tio mai kia matou, ko matou fuli ko lou kakai.

⁹ Kua liliu ou kolo maokioki ko se toafa ; Kua liliu Sione ko se toafa, Ti kua lavaki Selusalemi.

¹⁰ Kua liliu lomatou fale tapu o le kololia, Leia na sua ai e omatou tamana ou fakafetai Ko le nea kai a ula ; Kua maumau a nea fuli ala na mauiga kia matou.

¹¹ I le oki o le nea lena, ei Eteleno, pe ke toe kataki loa ? Pe ke fakalologo loa, ti mo ke fakamamae loa matou ke veli ?