Esaia 62 - Tosi Tapu

Ko le fakamauli o Selusalemi

¹ I loku alofa ki Sione e leaise kau fakalologo loa, I loku alofa ki Selusalemi e leaise kau malolo loa, O kaku ki le sa o lona fakamauli, ofaipe le mafoata, Ti mo lona saofaki, ofaipe se taume leia e ulaula.

² Ti e tio loa a atu puleaga ki lou fakamauli, Ti mo sau fuli ki lou kololia ; Ti e fakaigoa loa a koe ki se igoa foou, Leia e filifili loa e le gutu o le Eteleno.

³ E ke liliu loa ko se pala gigila i le lima o le Eteleno, Ko se pale fakasau i le lima o lou Atua.

⁴ E leaise toe fakaigoa loa a koe ko tiakina, Ti e leaise toe fakaigoa loa lou fenua ko lavaki ; Kae e fakaigoa loa a koe : Ko loku fiafiaaga iate ia, Ti e fakaigoa loa lou fenua ko le fafine avaga ; Talie e maua loa e le Eteleno lona fiafia iate koe, Ti e maua loa e le fenua lona avaga.

⁵ Ofaipe se tama tupulaga leia e pipiki ki se taine taupoou, E pipiki loa ou vosa kiate koe ; Ofaipe le taine feauaki leia e fai ia le fiafia o lona avaga, E ke fai ia loa le fiafia o lou Atua.

⁶ I aluga o ou paa, Selusalemi, na kau fakanofo ni kau tagata leo ; E leaise lotou fakalologo loa i le ao mo le pouli. Koutou ala e fakamanatu ia a ia ki le Eteleno, E leaise malolo kia koutou !

⁷ Ti ke aua na kotou tuku se malolo kiate ia i se lakaga, O kaku ki lana toe fakatuu Selusalemi ke tuu mau, Ti mo lana fakaliliu a ia ke kololia ia i le malama nei.

⁸ Na fakapapau a ia i lona lima atamai ti mo lona lima makeke : E leaise kau toe soli loa lau fulumeto ke kai e ou fili, Ti e leaise toe inu loa e vosa o le matapule lau vino, Fua o au gaoi ;

⁹ Kae ko latou ala e tanaki ia loa le fulumeto e kai ia loa a ia Ti e fakafetai loa ki le Eteleno, Ti ko latou ala na tau ia le vite e inu ia loa le vino I lotoa o loku sagatualio.

¹⁰ Kotou ulu, kotou ulu i matapa ! Kotou teuteu se ala ki le kakai ! Kotou fakalauatea ! Kotou fakalauatea le ala, kotou too a fatu ! Kotou toso se manumanu ki kakai !

¹¹ Ko leinei le nea leia e fakasa e le Eteleno ki potupotu o le malama nei : Kotou pati ki le taine o Sione : Ko leinei, e au lou fakamauli ; E au a ia mo le totogi, Ti e muamua a fakapale iate ia.

¹² E fakaigoa loa latou kakai maokioki, kakai na totogi e le Eteleno ; Ti ko koe, e fakaigoa loa a koe alofaina, kolo na leaise tiakina.