Esaia 60 - Tosi Tapu

Kololia o Selusalemi i le temi ka au

¹ Tuu ki aluga, ke ke gigila, talie kua soko mai lou malama, ti kua sopo le kololia o le Eteleno kiate koe.

² Ko leinei, e uufi e le pouli le malama nei, Ti e le fakapouli matotolu a kakai ; Kae kiate koe e sopo ake le Eteleno, Kiate koe e sa lona kololia.

³ E saele ni puleaga i lou malama, Ti mo ni sau i le gigila o lou kololia.

⁴ Tagaki ou mata ki ou tafa, ti ke tio : E lotou fakatasi fuli, e lotou au kiate koe ; E au ou vosa mei mamao, Ti e luluku ou taineliki i lima.

⁵ Ti e ke soposopo loa i le fiafia, ti e ke fakafiafia loa ; E ta vave loa lou mafu ti e makita loa a ia i le fiafia, Mo ka tau mai loa a koloa o le tai kiate koe, Mo ka kaku mai loa a koloa o atu puleaga kiate koe.

⁶ E ke apele loa i kamelo, I kamelo o Matiane mo Efa ; E lotou au fuli loa mei Sapa ; E lotou fetuku mai loa le aulo mo le iseso, Ti e lotou fakasa loa a fakavikiviki o le Eteleno.

⁷ E tanaki mai loa kiate koe a kau manu fuli o Ketale ; E fakalogo loa kiate koe a kau ovi tagata o Nepasote ; E lotou pale loa ki loku aletale ti e kau tali loa latou ; Ti e kau fakakololia loa le fale o loku kololia.

⁸ Ko ai ma latou ana e lele ofaipe ni ao, Ofaipe ni lupe ki olatou ofaga ?

⁹ Talie amanaki malie a atu motu kiate au, Ti e muamua a vaka faikoloa o Talesisi, O aumai mei mamao au fanau, Mo alatou paaga ti mo alatou aulo, O tupu ko le suafa o le Eteleno, lou Atua, O tupu ko le Sagato o Iselaele, leia e fakakololia ia a koe.

¹⁰ E toe laga loa e vosa o le tagata matapule ou paa, Ti e liliu loa olatou sau ko au tagata fakasausau ; Talie na kau taai a koe i loku sausau, Kae i loku manava alofa na kau alofa kiate koe.

¹¹ E mavaa tuumau loa ou matapa, E leaise lotou toe mapono loa i le ao mo le pouli, O tupu ke tuku ke ulu mai kiate koe a koloa fufu o atu puleaga, Ti mo olatou sau mo olatou famili.

¹² Talie ko le kakai mo le puleaga, ala e leaise tausi loa kiate koe, e mamate loa ; Io, e tuuti loa a puleaga ana.

¹³ E au loa kiate koe le kololia o Lipane, Le sipele, mo le oleme ti mo le pui, latou fuli fakatasi, Ke teuteu ai loku sagatualio, Ti e kau fakakololia loa le ganea leia e malolo ai oku vae.

¹⁴ E au loa a vosa o latou ala na fakaveliveli kiate koe, o su kiate koe, Ti ko latou fuli ala na vesia kiate koe e punou loa i ou vae ; E lotou fakaigoa loa a koe ko le kolo o le Eteleno, Sione o le Sagato o Iselaele.

¹⁵ I mua na tiaki a koe ti na vesia kiate koe, Ti na leaise fakalaka se tasi iate koe, Kae i le aso nei e kau fakaliliu loa a koe ko se nea fakateuteu o lee gato, Ko se fiafiaaga ki tautupu mo tautupu.

¹⁶ E ke mimiti loa le sua u o atu puleaga, E ke mimiti loa le u o sau ; Ti e ke iloa loa ko au ko le Eteleno, lou fakamauli, Leia na totogi ia a koe, le mafimafi o Sakopo.

¹⁷ E kau aumai loa kiate koe le aulo ke fetogi ai le sila, Le paaga ke fetogi ai le ukamea, Le sila ke fetogi ai le papa, Le ukamea ke fetogi ai a fatu ; E kau tuku loa ke nofo iate koe le tokamalie, Ti ke pule le faitotonu.

¹⁸ E leaise toe logo loa ki le agamakeke i lou fenua, Pe ki le kaia mo le maumau i lou kele ; E ke tuku loa ki ou paa le igoa ko fakamauli, Ki ou matapa leia o kololia.

¹⁹ E leaise ko le laa loa leia e fakamalama ia loa a koe i le ao, Ti e leaise ko le masina loa leia e fakamalama ia loa a koe i le pouli ; Talie e liliu loa le Eteleno ko lou malama o lee gato, Ti e liliu loa lou Atua ko lou kololia.

²⁰ E leaise toe to loa lou laa, Ti e leaise toe fakapouli loa lou masina ; Talie e liliu loa le Eteleno ko lou malama o lee gato, Ti e gato loa a aso o lou mamae.

²¹ E maokioki loa lou kakai katoa, E lotou maua loa le fenua o lee gato ; Ko le uli a ia na kau to ia, le gaoiaga o oku lima, Ke tausi ki loku kololia.

²² E liliu loa leia e ikiiki ko se tino afe, Ti ko leia e gaegae ko se puleaga makeke. Ko au, le Eteleno, e kau fakavave loa a nea ana i lona temi.