Esaia 6 - Tosi Tapu

Vokasio mo le gaoi a Esaia

¹ I le fetuu o le mate o le sau ko Osiasi, na kau tio ki le Aliki na eke i se ekeekeaga fakasau taualuga, ti na fakaapele e tapatapa o lona kofu le fale tapu.

² Na tuu ni selafimi i ona aluga ; na lotou tasi mo ia ni kapakau e ono ; na puloui e ia ona mata ki kapakau e lua, ti na uufi e ia ona vae ki kapakau e lua, ti na lele a ia ki kapakau e lua.

³ Na lotou kalaga o fetaliaki : Maokioki, maokioki, maokioki le Eteleno o kau tau ! E apele le kele katoa i lona kololia !

⁴ Na galulu loa a matapa i olatou tuuaga i le leo leia na gugulu, ti na apele loa le fale i se afu.

⁵ Ti na kau pati loa : Malaia kiate au ! Kua kau puli noa, talie ko au ko se tagata leia e kelekele oku laugutu, ti e kau nofo i loto malie o se kakai leia e kelekele ona laugutu, kae kua tio oku mata ki le Sau, le Eteleno o kau tau.

⁶ Kae na lele mai loa se tasi o le kau Selafimi kiate au, mo se fa fatu kaka na too i lona lima, leia na too e ia mei le aletale ki se saga.

⁷ Na fakalave loa e ia le fa fatu ki loku gutu, o pati : Kua lave le nea leinei ki ou laugutu ; kua sau lau agaveli, ti kua fakamolemole lau agasala.

⁸ Na kau logo loa ki le leo o le Aliki leia na pati : Ko ai ka kau kakau ia loa, ti ko ai ka saele loa kia matou ? Na kau tali loa : Ko leinei au, ke ke kakau au.

⁹ Ti na pati loa a ia : Ano, o pati ki le kakai leinei : E kotou logo maoki loa, kae e leaise kotou matala loa fua ; E kotou tio maoki loa, kae e leaise kotou malama loa fua.

¹⁰ Ke ke fakaliliu le loto o le kakai leinei ke logo noa ; Ke ke fakatulituli ona taliga, ti mo tapono ona mata, Talie ke aua na tio loa ona mata, mo logo loa ona taliga, Mo matala loa lona loto, Mo tafoki loa, ti ke kau fakamauli loa a ia.

¹¹ Na kau pati : E kaku loa kiafea Aliki ? Ti na tali loa a ia : E kaku loa ki le maumaui o kolo Ti mo lolatou tuku ke lavaki ; E kaku ki le aso leia e leaise toe maua ai loa se tagata i fale, Ti e maumaui ai loa le fenua e le lavaki ;

¹² E kaku ki le aso leia e fakamamao ai loa e le Eteleno a tagata, Ti e liliu ai loa le fenua ko se toafa lasi,

¹³ Ti kapau e toe loa se vaega kau agafulu o le kakai, E lotou toe liliu mai loa ke tutu latou e le afi. Kae ofaipe le telepate mo le sene ala e fakatologa ia ola tafito mo ka sele, E toe tupu loa se sakoga maokioki i le kakai lena.