Esaia 59 - Tosi Tapu

Ko agatuu a Suta

¹ Leai, e leaise toetoe le lima o le Eteleno ke fakamauli, Pe tulituli lona taliga ke aua na logo.

² Kae ko akoutou agatuu ala e fakatuu ia se paa ia koutou mo lokoutou Atua ; Ko akoutou agasala ala e fufu ia ona mata kia koutou, Ti e tapono ia a ia ke fakalogo kia koutou.

³ Talie e kelekele okoutou lima i le toto, Ti mo okoutou maikao i agaveli ; E masau loi okoutou laugutu, E puaki e okoutou alelo le veli.

⁴ E leaise fai e se tasi se tagi i le maoki, E leaise fai e se tasi se fakamaau i le faitotonu ; E lotou fanaki ki nea noa, ti e lotou lau ni nea salasala ; E lotou fakakaukaui le veli, ti e lotou fanaui le agasala.

⁵ E lotou titi ni fua o le gata uti kona, Ti e lotou lalaga ni pikiaga o kaleveleve. Ko le tagata leia e kai ia alatou fuai manu e mate ; Ti kapau e titi se fa fuai manu e tasi, e ulu mei ai se gata kona.

⁶ Ko nea ala na lotou lalaga e leaise aoga ke fai ai se kofu, Ti e leaise mafai ke lotou lava ki alatou gaoiaga ; Ko alatou gaoi ko ni gaoi o le agasala, Ti e maua i olatou lima ni gaoi o le agamakeke.

⁷ E makape olatou vae ki le veli, Ti e lotou fakatavili o liligi le toto mea ; Ko alatou manatu ko ni manatu o le agasala, Ti e maua i olatou ala le kaia mo le maumau.

⁸ E leaise lotou iloa le ala o le tokamalie, Ti e leaise maua le faitotonu i olatou ala ; E lotou saele i ni ala pikopiko : Ko leia e saele i ai e leaise iloa ia le tokamalie.

⁹ Koia e mamao ai le saofaki ia matou ; Ti e leaise kaku mai ai le fakamauli kia matou ; E motou talitali ki le malama, ti ko leinei ko le fakapouli, Ki le mafoata, ti e motou saele i le pouli.

¹⁰ E motou saele taufa ofaipe ni kivi ki se kaua, E motou saele taufa ofaipe latou ala e leai ni mata ; E motou sisiga i le lalatea ofaipe le pouli, I loto malie o le mou e motou faipe ni mate.

¹¹ E motou tagi fuli ofaipe ni uluso, E motou tagi fakaaloalofa ofaipe ni lupe ; E motou talitali ki se tokoi, kae e leaise kaku mai a ia, Ki le fakamauli, kae e mamao a ia ia matou.

¹² Talie e lasi ai amatou patigataa i ou mua, Ti e fakamaoki amatou agasala kia matou ; E pipiki amatou agatuu kia matou, Ti e motou iloa amatou agaveli.

¹³ Io, na motou agasala ti na motou agatuu ki le Eteleno, Na motou tiaki lomatou Atua ; Na motou masau ki le agamakeke mo le agatuu, Na motou faufau mo fakakaukaui i omatou loto ni masau loi ;

¹⁴ Koia na mavae ai le tokoi, Ti na mamao ai le fakamauli ; Talie e siga le maoki i le malae fakafenua, Ti e leaise mafai ke fakafeofi ki ai le faitotonu.

¹⁵ E puli le maoki, Ti ko leia e fakamamao i le veli e kaia ona koloa. E tio le Eteleno ki le nea a ia, ti na veli ai ki ona mata, Leia e puli le faitotonu.

Ko le fakapapau o le Fakamauli

¹⁶ E tio a ia e leaise se tagata, E ofolele a ia e leaise se tasi e kole ; Koia na au ai lona lima o tokoi kiate ia, Ti na fanaki a ia ki lona faitotonu.

¹⁷ Na kofu e ia le faitotonu ofaipe se kofu tau, Ti na teki e ia ki lona ulu le puloga o le fakamauli ; Na too e ia le sausau o kofu, Ti na pulupulu a ia ki le finenonofo.

¹⁸ E liufaki loa e ia ki le tagata taki toka tasi o mulimuli ki ana gaoi, Le sausau kia latou ala na vesia kiate ia, Le totogi ki ona fili, E tuku loa e ia le totogi ki atu motu.

¹⁹ Ti e i loa ki le suafa o le Eteleno mei le sopoaga o le laa, Ti mo lona kololia mei le toaga o le laa. Ka au loa le fili ofaipe se vaitafe, E kapu loa a ia e le Laumalie o le Eteleno.

²⁰ E au loa se fakamauli ki Sione, Kia latou o Sakopo ala e tafoki loa i alatou agasala, E pati le Eteleno.

²¹ Ko leinei laku sai mo latou, e pati le Eteleno : Ko loku Laumalie, leia e nofo iate koe, Ti mo aku folafola, ala na kau tuku ki lou gutu, E leaise toe mavae loa i lou gutu, Mo le gutu o au fanau, Ti mo le gutu o fanau o au fanau, I le aso nei o lee gato, e pati le Eteleno.