Esaia 58 - Tosi Tapu

Le sesunio maoki mo le sesunio loi

¹ Kalaga i lou makeke katoa, aua na ke tataofi a koe, Siki ki aluga lou leo ofaipe se fakatagi pupusi, Ti ke fakasa ki loku kakai ana agaveli, Ki le fale o Sakopo ana agasala !

² I aso fuli e lotou afa au, E lotou fia iloa oku ala ; Ofaipe se puleaga leia na fai ia le faitotonu Ti na leaise tiaki ia le lao o lona Atua, E lotou kole mai kiate au ni fakamaau faitotonu, E lotou oli ke fakafeofi ki le Atua.

³ Kolea le uiga o lamatou sesunio, mo kapau e leaise ke tio mai kia matou ? O le fakamamae omatou laumalie, mo kapau e leaise ke tokaga ki ai ? Ko leinei, i le aso o lokotou sesunio, e kotou fakataga a nea fuli ala e kotou oli ki ai, Ti e kotou fai fakamakeke ki akoutou tagata gaoi fuli.

⁴ Ko leinei, e kotou sesunio ke visi, ke fefele, Ke ta fakamakeke okoutou kaito ; E leaise kotou sesunio ofai ki le uiga totonu o le aso lena, Ke logo lokoutou leo ki aluga.

⁵ Pe ko le sesunio lena e kau maua ai loku fiafia, Se aso leia e fakamamae ai e le tagata lona laumalie ? Ko le peluki le ulu ofaipe se fa u, Ti mo le moe i le taga mo le mugalafu, Pe ko le nea lena e ke fakaigoa loa ko se sesunio, Se aso malie ki le Eteleno ?

⁶ Ko leinei le sesunio leia e kau fiafia ai : Vevete a tini o le agaveli, Tatala a sai o le popula, Tuku ke lauatea latou e mafaia, Ti ke motusi a amoga kesekese fuli.

⁷ Vaevae lau pane mo leia e fia kai, Fakaulu ki lou fale latou e fakaaloalofa mo sala nofoaga ; Ka ke tio ki se tagata telefua, uufi a ia, Kae aua na ke maliu kese i leia e tatau mo koe.

⁸ Ti e sa loa lou malama ofaipe le mafoata, Ti e somo vave loa lou fakamauli ; E saele loa lau faitotonu i ou mua, Ti e ano loa le kololia o le Eteleno mo koe.

⁹ Ti e ke kalaga loa, ti e tali atu loa le Eteleno kiate koe, E ke tagi loa, ti e pati loa a ia : Ko leinei au ! Kapau e ke fakamamao iate koe le kavega mamafa, Le ta fakaitaita o lima, ti mo le masau lauveli,

¹⁰ Ti kapau e ke soli le pane leia e ke kai ki leia e fia kai, Kapau e ke fakamakeke le loto e mamae, E sopo ake loa lou malama i le fakapouli, Ti e fai loa ou fakapouli pe le lalatea.

¹¹ E liliu loa le Eteleno ko lou tagata taki o lee gato, E fagai loa e ia lou laumalie o makona i potu malo, Ti e toe soli loa e ia se makeke ki ou kogatino ; E ke fai loa pe se oloto fakavai, Pe se matapuna o vai mauli leia e leaise toe masa ona vai.

¹² E toe laga loa e au fanau ni kolo foou i aluga o kolo maumau, E ke toe fakatuu loa ki aluga ni fakatafito afea ; E fakaigoa loa a koe ko le tagata fakafoou o nea maumau, Leia e toe fakafoou ia a ala, leia e fakaliliu ia le fenua ke nofoi.

¹³ Kapau e ke taofi lou vae i le aso o le sapato, Ke aua na fai lou loto i loku aso maokioki, Kapau e ke fai ki le sapato lou fiafiaaga, Ke tausi a ia ki le kololia o le Eteleno, Ti kapau e ke fakamauiga a ia, o leaise mulimuli i ou ala, O leaise mulimuli ki oli o lou loto mo au manatu noa,

¹⁴ Ti e ke maua loa lou fiafia i le Eteleno, Ti e kau ave loa a koe ki potu taualuga o le fenua, E kau fakafiafia loa a koe ki le tofiga o Sakopo, lou tamana ; Talie kua masau le gutu o le Eteleno.