Esaia 57 - Tosi Tapu

¹ E mate le tagata agatonu, ti e leaise tokaga se tasi ki ai ; E pupuli a tagata malilie, ti e leaise tokaga se tasi. Io, e puli le tagata agatonu i mua o le malaia.

² E ulu loa a ia ki le tokamalie, E malolo loa a ia i lona moeaga, Leia e mulimuli loa i le ala totonu.

³ Kae ko koutou ake ala, kotou fakafeofi mai ki leinei, vosa o le fafine fai nea fakatemonio, Sakoga o le fafine tono mo faiaga !

⁴ Ko ai e kotou gologolo ki ai ? Ko ai e fakamavaa fakalaulasi ki ai okoutou gutu Ti e kotou fakainaina ki ai ? Pe leaise ko ni fanau koutou o le agasala, Se lanu o le loi ?

⁵ Ala e faiaga i tafa o ni laakau lalasi, I lalo o laakau sesega fuli, Ala e tamate ia ni toe i vaivailiua, I lalo o mafaa o utu ?

⁶ E maua lou vaega i fatu momole o liua, Ko lena, ko lena lou vaega ; Ko latou ana e ke liligi ki ai ni moliga vino, E ke fai ki ai ni moliga : Pe mafai ke kau tuku noa a nea ana ?

⁷ E ke teuteu lou moeaga i se mauga taualuga, Ti e ke pale foki ki ai o momoli au failaulau.

⁸ E ke tautau ou fakatata fakamanatu i muli o matapa mo pou. Talie, mamao iate au, e ke tatala ou kofu, ti e ke sopo ki lou moeaga, E ke fakalaulasi lou moeaga, ti e ke fai se sai mo latou, E ke manako ki le momoe mo latou, e ke tio ki le nea.

⁹ E ke ano ki le sau mo se lolo, E ke liuliuga au nea fakamanogi ; E ke kakau ki mamao au tagata avelogo, E ke ifo o kaku ki le nofoaga o le kau mate.

¹⁰ Kua ke gaegae i le lasi o lau feanoaki, Kae e leaise ke pati fua : E kau fakafiti ki ai ! E ke toe maua foki se makeke i lou lima : Koia e leaise ke mamae ai.

¹¹ Ti ko ai na ke tuania ia mo ke i ki ai, ke ke agatuu ai, Ke aua na ke manatu ai kiate au, ke aua na ke tokaga ai kiate au ? Pe na leaise kau fakalologo talu mei fualoa ? Koia leia na leaise i ai kiate au.

¹² E kau fakasa loa lou anoaga totonu, Ti e leaise aoga loa au gaoi kiate koe.

¹³ Ka ke tagi loa, pe fakamauli loa a koe e ou taulaatua mauke ? E ave loa latou fuli e le matagi, e seu loa latou e se tukumanava. Kae ko leia e fanaki kiate au e maua ia loa le fenua, Ti e maua ia loa loku mauga maokioki.

Fakapapau a le Atua

¹⁴ E pati loa : Kotou foa, kotou foa, kotou teuteu le ala, Kotou too a tukiaaga fuli i le ala o loku kakai !

¹⁵ Talie e folafola le Taualuga, Leia e lee gato lona nofoaga ti e maokioki lona suafa : E kau nofo i potu taualuga ti mo le maokioki ; Kae e kau nofo foki mo le tagata fakasemala mo agamalu, O tupu ke toe fakamauli a loto fakasemala, O tupu ke toe fakaofo a loto agamalu.

¹⁶ E leaise kau loto ke valoki o lee gato, Pe ke taofi se sausau lee gato, Kae i oku mua e vivilo a laumalie i le gaegae, A laumalie ala na kau fai.

¹⁷ O tupu ko lona manumanu agasala, na kau ita ti na kau taai a ia ; Na kau mumuni i loku mamae ; Ti na muli le tagata agatuu i le ala o lona loto.

¹⁸ Na kau tio ki ona ala, Ti e kau fakamauli loa a ia ; E kau liliu loa kiate ia ko lona tagata taki, Ti e kau fakapelepele loa a ia, a ia ti mo latou ala e tagi mo ia.

¹⁹ E kau tuku loa le fakafetai ki ona laugutu. Tokamalie, tokamalie ki leia e mamao ti mo leia e feofi ! e pati le Eteleno. E kau fakamauli loa latou.

²⁰ Kae fai loa le kau agaveli pe le moana veli, Leia e leaise feala ke malie, Ti e lagai e ona vai ki aluga le takele mo le limu.

²¹ E leai se tokamalie ki le kau agaveli, e pati loku Atua.