Esaia 56 - Tosi Tapu

Fakapale o le fakalogo

¹ Ko leinei le folafola a le Eteleno : Kotou tausi le nea leia e maoki, Kotou fai le nea leia e totonu ; Talie e leaise tuvai loa le au o laku fakamauli Ti mo le fakasa o laku faitotonu.

² Manuia le tagata leia e fai ia le nea lena, Ti mo le vosa o le tagata leia e tuu makeke i ai, O tausi le sapato, ke aua na maumaui a ia, Ti mo tokaga ki lona lima, ke aua na fai se nea veli !

³ Ke aua na pati le matapule leia e pipiki ki le Eteleno : E vaei loa au e le Eteleno i lona kakai ! Ti ke aua na pati le enuke : Ko leinei, ko se laakau malo au !

⁴ Talie e folafola le Eteleno : Ki le kau enuke ala e tausi ia loa oku sapato, Ala e filifili ia loa le nea leia e malie kiate au, Ti e too mau ia loa laku sai :

⁵ E kau soli loa i loku fale mo oku paa se nofoaga ti mo se igoa E malilie ake i ni vosa ti mo ni taineliki ; E kau soli loa kia latou se igoa lee gato, Leia e leaise toe mate loa.

⁶ Ti ko le kau matapule, ala e pipiki loa ki le Eteleno o tausi kiate ia, O alofa ki le suafa o le Eteleno, O liliu ko ana tagata fakasausau, Ko latou fuli ala e tausi ia loa le sapato, Ke aua na maumaui a ia, Ti e too mau ia loa laku sai,

⁷ E kau ave loa latou ki loku mauga maokioki, Ti e kau fakafiafia loa olatou loto i loku fale faikole ; E tali loa alatou failaulau mo alatou sakilifisio i loku aletale ; Talie e fakaigoa loa loku fale ko se fale faikole ki kakai fuli.

⁸ E folafola le Aliki, le Eteleno, Leia e fakatasi ia le kau popula o Iselaele : E kau fakatasi loa ni iki ake kakai kiate ia, ki lona kakai leia na toe fakatasi foki.

Valoki o pule mo la e tausi ki taulaatua

⁹ Koutou fuli, manu o faisaga, Kotou au o kai, koutou fuli, manu o le vao !

¹⁰ E kivi fuli ona tagata leo, sala atamai ; Ko latou fuli ko ni kuli gutu mate, ala e leaise mafai ke ko ; E lotou maua ni moe miti, e lotou momoe i lalo, E lotou manako ki le moe.

¹¹ Ti ko ni kuli uakai latou ala e leaise toe makokona ; Ko ni tagata tausi manu latou ala e leaise matala ki se nea ; E lotou tasi mulimuli fuli i lona ala, O tasi fai le nea e malie kiate ia, o kaku ki le mulimuli :

¹² Kotou au, e kau ano nei o afa mai se vino, Ti e tou inu loa ni kava makeke ! I le aso nei o tatau mo apogipogi, Talie e lasi a nea inu !