Esaia 55 - Tosi Tapu

Ko le fakamauli ki tagata fuli

¹ Koutou fuli ala e fia inu, kotou au ki atu vai, Mo leia foki e leaise maua ia sana paaga ! Kotou au, kotou totogi ti kotou kai, Kotou au, kotou totogi se vino mo se sua u, sala paaga, sala totogi !

² Kolea e kotou maumaui ai le paaga ki le nea leia e leaise fagai ia koutou ? Kolea e kotou gaoi ai ki le nea leia e leaise kotou makona ai ? Koia kotou fakalogo mai kiate au, ti e kotou kai loa le nea leia e malie, Ti e fiafia loa okoutou laumalie i ni nea kai malilie ai.

³ Kotou tokaga mai okoutou taliga, ti kotou au kiate au, Kotou fakalogo mai, ti e mauli loa lokoutou laumalie : E kau fai loa mo koutou se sai lee gato, Ke tuku tuumau kia koutou oku kalasia kia Tavite.

⁴ Ko leinei, na kau fakanofo a ia ke fakamaoki i mua o ni kakai, Ke takimua mo pule ki atu puleaga.

⁵ Ko leinei, e ke kalagai loa ni puleaga ala e leaise ke iloa, Ti e feoso mai loa kiate koe ni puleaga ala e leaise iloa ia a koe, O tupu ko le Eteleno lou Atua, O tupu ko le Sagato o Iselaele leia e fakakololia ia a koe.

⁶ Kotou afa le Eteleno koi maua a ia ; Kotou fetapa kiate ia koi nofo a ia i okoutou tafa.

⁷ Ke tiaki e le tagata agasala lona ala, Ti mo le tagata agaveli ana manatu ; Ke toe liliu a ia ki le Eteleno, leia e alofa loa kiate ia, Ki lotatou Atua, leia e leaise kaekae i le fakamolemole.

⁸ Talie ko aku manatu e leaise ko akoutou manatu, Ti ko okoutou ala e leaise ko oku ala, E pati le Eteleno.

⁹ Talie e faipe le atu lagi e taualuga ake i le malama nei, E toe taualuga ake foki oku ala i okoutou ala, Ti mo aku manatu i akoutou manatu.

¹⁰ Talie e faipe le ua mo le nive e ifo mei le atu lagi, Ti e leaise toe liliu ki ai Kae e leikiaise fakavai ia mo fakagako ia le kele, ti mo fakasosomo ia a laakau, Kae e leikiaise soli ia se pulapula ki le tagata to pulapula Ti mo se pane ki leia e kai,

¹¹ E tatau foki mo laku folafola, leia e ulu mei loku gutu : E leaise toe liliu mai a ia kiate au sala fua, Kae e leikiaise fai e ia loku finegalo Ti mo fakasoko aku fakatuutuu.

¹² Io, e kotou mavae loa i le fiafia, Ti e takitaki loa koutou i le tokamalie ; E fakamapaa loa e mauga lalasi mo mauga liliki ni sua fakafiafia i okoutou mua, Ti e pasipasi loa a lima o laakau fuli o le vao.

¹³ E tupu loa le sipele i le ganea leia na tuu ai le laakau talatala, Ti e tupu loa le mila o fetogi le vao veli ; Ti e liliu loa le nea lena ko se kololia ki le Eteleno, Ko se fakamanatu lee gato, leia e leaise toe puli loa.