Esaia 54 - Tosi Tapu

Ko le manuia o Iselaele i le temi ki muli

¹ Ke ke fakafiafia, fafine paa, a koe leia e leaise koi fanaunau ! Ke ke fakasa lou nekenekea mo lou fiafia, a koe leia e leaise koi mamae lou ganea ! Talie ko vosa o leia na tiakina e toka api ake loa I vosa o le fafine leia na avaga, e pati le Eteleno.

² Fakalasi lou falela ; Folasi a puipui o lou nofoaga : Aua na ke tataofi ! Fakaloloa ou maea, Ti fakamakeke ou pou !

³ Talie e ke mafolafola loa ki le fetuu atamai mo le fetuu sema ; E maua loa e lou sakoga ni puleaga, Ti e fakakakai ia loa ni kolo lavaki.

⁴ Aua na ke i ki se nea, talie e leaise ke luma loa ; Aua na ke liliko, talie e leaise ke telefua loa ; Kae e ke galoi loa le luma o lou temi tupulaga, Ti e leaise ke toe manatui loa le matagafua o lou temi lokonui.

⁵ Talie ko lou tupuaga ko lou avaga : Ko lona igoa ko le Eteleno o kau tau ; Ti ko lou fakamauli ko le Sagato o Iselaele : E igoa a ia ko le Atua o le malama nei katoa ;

⁶ Talie e toe kalagai a koe e le Eteleno ofaipe se fafine tiakina mo mamae i lona loto, Ofaipe se fafine leia na avaga koi muli ti na tiaki, e pati lou Atua.

⁷ I se ga temi ikiiki na kau tiaki a koe, Kae i se alofa lasi e kau tali loa a koe ;

⁸ I se ga temi ikiiki o le ita, na kau fufu oku mata iate koe, Kae i se alofa lee gato e kau aloalo malie loa kiate koe, E pati le Eteleno, leia na totogi ia a koe.

⁹ Talie e fai loa kiate au pe le lomaki i le temi o Noe : Na kau fakapapau e leaise toe to loa le lomaki ia Noe ki le malama nei ; E kau toe fakapapau foki ke aua na kau toe ita kiate koe, Ti ke aua na kau toe valoki a koe.

¹⁰ Talie e pupuli loa a mauga, Ti e sisiga loa a mauga liliki, Kae e leaise puli loa loku alofa kiate koe, Ti e leaise fetogi loa laku sai o le tokamalie, E pati le Eteleno, leia e alofa kiate koe.

¹¹ A koe leia e mamae, mo ta e le afa, ti e leaise fakapelepele e se tasi ! Ko leinei, e kau toe laga loa a koe ki ni fatu fakateuteu fulumalilie, Ti e kau toe fai loa ou fakatafito ki le safile ;

¹² E kau fai loa ou takakega ki le lupi, Ou matapa ki le kilisitale, Ti mo ou kaua takatakai ki ni fatu mauiga.

¹³ E liliu loa ou vosa fuli ko tisipulo a le Eteleno, Ti e lasi loa le manuia o ou vosa.

¹⁴ E fakamakeke loa a koe e le faitotonu ; Kapu iate koe le tuania, talie e leaise tonu ke i ki se nea ; Ti mo le lulu, talie e leaise fakafeofi loa a ia kiate koe.

¹⁵ Kapau e fai ni fakatasi kiate koe, e leaise natu loa le nea lena iate au ; Ko latou fuli ala e fili loa kiate koe e vivilo loa i lou pule.

¹⁶ Ko leinei, na kau fakatupu le tagata leia e pupusi ia le malala i le afi, Ti e fau ia se masafu i lana gaoi ; Kae na kau toe fakatupu foki le tagata maumau ke fatii ia le masafu.

¹⁷ E noa loa a masafu tau fuli na fau ke tau kiate koe ; Ti ko alelo fuli ala e malaga ake loa kiate koe i le fakamaauaga E ke tautea loa latou. Ko lena le tofiga o tagata fakasausau a le Eteleno, Ko lena le fakamauli leia e au loa meiate au kia latou, E pati le Eteleno.