Esaia 53 - Tosi Tapu

Le sakilifisio a Kilisito

¹ Ko ai na tui ki le nea leia na fakasa fakatomua mai kia tatou ? Ko ai na iloa ia le lima o le Eteleno ?

² Na tupu ake a ia o lasi i ona mua ofaipe se ga laakau gaegae, Ofaipe se uli leia e somo ake i se kele malo ; Na leaise maua e ia se fulumalie, pe ko se gigila ke tapa ki otou mata, Ti na leaise nea fua iate ia ke tou alofa ai kiate ia.

³ Vesiaina mo tiakina e tagata, Tagata o le mamae mo masani i le mamae, Tatau mo leia e mafuli kese i ai a mata ; Na tou nukinuki kiate ia, na leaise tou tokaga fua kiate ia.

⁴ Kae ko otou gaegae ala na too e ia, Ko otou mamae ala na amo e ia ; Na tou tuku na tautea a ia Na taai a ia e le Atua, ti na tuku a ia ki lalo.

⁵ Kae na lavea a ia o tupu ko atatou agasala, Fatii o tupu ko atatou agaveli ; Ko le tautea leia e soli ia kia tatou le tokamalie na vilo kiate ia, Ti ko ona kafo ala e tou mauli ai.

⁶ Na tou sese fuli ofaipe ni ovi, Na tou tasi muli i lona ala totonu ; Ti na fakavilo e le Eteleno kiate ia le agatuu a tatou fuli.

⁷ Na fakaveliveli a ia mo fakamamae, Kae na leaise fakamavaa fua e ia lona gutu, Ofaipe se akeno leia e taki ki le fale tamate manu, Se ovi fafine gutu mate i mua o latou ala e koti ia a ia ; Na leaise fakamavaa fua e ia lona gutu.

⁸ Na ave a ia e le mamae mo le tautea ; Ti ko ai i lona tautupu na tui Na tuuti a ia i le kele o le kau mauli, Ti na taai a ia o tupu ko agasala o loku kakai ?

⁹ Na tuku lona tanuma i le kau agaveli, Lona tanuma mo le tagata mou koloa, Kae na leaise fai e ia se veli, Ti na leaise maua se kaka i lona gutu.

¹⁰ Na malie ki le Eteleno ke fatii a ia i le mamae… I le oki o le soli o lona mauli ko se sakilifisio ki le agasala, E tio loa a ia ki se sakoga ti e fakatologa loa e ia ona aso ; Ti e manuia loa le gaoiaga a le Eteleno i ona lima.

¹¹ E fiafia loa ona mata o tupu ko le gaoi o lona laumalie. I lona iloa e fakamatatonu loa e laku tagata fakasausau agatonu ni tagata toka api, Ti e amo loa e ia alatou agaveli.

¹² Koia e kau soli ai loa kiate ia lona vaega mo le kau lalasi ; E vae loa e ia le koloa o le tau mo le kau makeke, O tupu na tuku e ia a ia totonu ki le mate, Ti na lau a ia i le kau tukipo, Talie na amo e ia a agasala a le toka api, Ti na ulufaki e ia le kau agasala.