Esaia 52 - Tosi Tapu

Ko le toe laga o Selusalemi

¹ Ke ke alaala ! Ke ke alaala ! Ke tui lou kofu fulumalie, Sione ! Ke ke tui ou kofu fakateuteu, Selusalemi, kolo maokioki ! Talie e leaise toe ulu loa i lou fale se tagata lee silikosisio pe ko se tagata kelekele.

² Ke ke tu le efu iate koe, ke ke tuu ki aluga, Ke ke eke ki lou ekeekeaga, Selusalemi ! Ke ke tatala a va i lou ua, Taine o Sione leia na popula !

³ Talie ko leinei le folafola a le Eteleno : Na fakatau noa koutou, Ti e leaise toe totogi loa koutou ki se paaga.

⁴ Talie ko leinei le folafola a le Aliki, le Eteleno : I mua na ifo loku kakai ki Esipito o nofo i ai ; Ti na fakavelivelii a ia e le tagata Asilia kae e leai sona tupuaga.

⁵ I le aso nei, e pati le Eteleno : Kolea e kau fai loa Talie na too noa loku kakai ? Ko latou ala e pule fakamakeke kiate ia e kalaga fia tagata, Ti e lotou lauveli ki loku suafa i le aso katoa.

⁶ Koia e iloa loa e loku kakai loku suafa i se aso ; Koia e iloa loa e ia, i le aso lena, Ko au leia na folafola : Ko leinei au !

⁷ E lotou fulumalilie ai i mauga, A vae o leia e ave ia ni logo malilie, O leia e fakasa ia le tokamalie ! O leia e ave ia ni logo malilie, O leia e fakasa ia le fakamauli ! O leia e pati ki Sione : E sau lou Atua !

⁸ E tatagi le leo o au kau tagata leo ; E lotou siki olatou leo ki aluga, E lotou fai fakatasi ni kalaga nekenekea ; Talie e lotou tio ki olotou mata totonu E aumai Sione e le Eteleno.

⁹ Kotou fai fakatasi ni kalaga fakafiafia, Koutou ko maumau o Selusalemi ! Talie e fakapelepele e le Eteleno lona kakai, E toe totogi e ia Selusalemi.

¹⁰ E fakasa e le Eteleno le lima o lona maokioki I mata o atu puleaga fuli ; Ti e tio loa a potupotu fuli o le malama nei Ki le fakamauli a lotatou Atua.

¹¹ Kotou ano, kotou ano, kotou mavae i lena ! Aua na kotou fafa ki se nea kelekele ! Kotou mavae i loto malie o ona ! Kotou fakamea, koutou ala e amo ia a ipu o le Eteleno !

¹² Aua na kotou mavae fakatavili, Aua na kotou sosola ; Talie e ano loa le Eteleno i okoutou mua, Ti e mulimuli loa le Atua o Iselaele ia koutou.

Le gaoi a le tagata fakasausau a le Eteleno

¹³ Ko leinei, e manuia loa laku tagata fakasausau ; E pale ake loa a ia ki aluga, e malaga loa a ia ki aluga, e malaga loa a ia o taualuga.

¹⁴ Na fai a ia ki le toka api pe se nea fakaii, I le lasi o le fetogi o ona mata, I le lasi o le fetogi o lona tino, Talie na leaise koi fai a ia pe se tagata,

¹⁵ Koia e liliu loa a ia ki le toka api ko se tupuaga o le fiafia ; I ona mua e tapono loa e ni sau olatou gutu ; Talie e lotou tio loa ki le nea leia na leaise fakamatala kia latou, E lotou logo loa ki le nea leia na leaise lotou logo ki ai.