Esaia 50 - Tosi Tapu

Valoki a le Eteleno ki lona kakai

¹ Ko leinei le folafola a le Eteleno : Kofea le tosi mavete leia na kau fakafiti ai ki lokoutou tinana ? Pe ko ai ia latou ala na kau tuu maua ki ai na kau fakatau koutou ki ai ? Ko leinei, na fakatau koutou o tupu ko akoutou agaveli. Ti na kapu lokoutou tinana o tupu ko akoutou agasala.

² Na kau au : kolea na leaise kau maua ai se tasi ? Na kau kalaga : kolea na leaise tali mai ai se tasi ? Pe kua toetoe loku lima ke totogi koutou ? Pe leaise feauga loku makeke ke saofaki koutou ? Ko leinei, i laku valoki, e kau fakamalo le tai, E kau fakaliliu a vaitafe o toafa ; E gaegagae olatou ika, sala vai, Ti e lotou mamate i le fia inu.

³ E kau kofu le lagi ki le fakapouli, Ti e kau tuku ki ai se kofu taga.

Ko le tagata fakasausau a le Eteleno

⁴ Ko le Aliki, le Eteleno, na soli mai kiate au se alelo poto, O tupu ke kau iloa le masau e aoga ki leia e gaegae. E fafagu e ia, i usu fuli, e fafagu e ia loku taliga, O tupu ke kau fakalogo ofaipe le fakalogo a ni tisipulo.

⁵ Na fakamavaa e le Aliki, le Eteleno, loku taliga, Ti na leaise kau agatuu, Na leaise kau solomuli.

⁶ Na kau fakaali loku tua kia latou ala na ta ia au, Ti mo oku kalaafau kia latou ala na futi ia loku kaukava ; Na leaise kau fufu oku mata I tauvele mo aanu.

⁷ Kae na tokoi kiate au e le Aliki, le Eteleno ; Koia na leaise kau matagafua ai, Koia na kau fakafefeka ai oku mata ofaipe se fa fatu, Talie e kau iloa e leaise kau luma loa.

⁸ Ko leia e fakamatatonu ia au e tuu i oku tafa : Ko ai e fia fefele kiate au ? Ke ta tutuu fakatasi ! Ko ai e fia fili mai kiate au ? Ke au a ia ki oku mua !

⁹ Ko leinei, e tokoi loa kiate au le Aliki, le Eteleno : Ko ai e fakatua ia loa au ? Ko leinei, e lotou motumotu fuli loa ofaipe se kofu popo, E kai loa latou e ilo.

¹⁰ Ko ai ia koutou e i ki le Eteleno, Ke fakalogo a ia ki le leo o lana tagata fakasausau ! Ko leia e saele i le fakapouli ti e sala malama, Ke fanaki a ia ki le suafa o le Eteleno, Ti ke pipiki a ia ki lona Atua !

¹¹ Ko leinei, ko koutou fuli ala e tafu ia se afi, Ti e too ia ni taume ulaula, Kotou ano ki loto malie o lakoutou afi mo akoutou taume ulaula ! Ko loku lima leia e fakasoko ia loa a nea ana kia koutou ; E kotou momoe loa i le mamae.