Esaia 5 - Tosi Tapu

Ko Iselaele ko le vite a le Eteleno

¹ E kau sua loa ki loku alofaaga Le katiko o loku alofaaga ki lana vite. Na maua e loku alofaaga se faisaga vite, I se mauga kele mauli.

² Na fakamaluu loa e ia le kele, Na sau loa e ia a fatu, Ti na to loa e ia i ai se uli vite malie. Na fakatuu loa e ia se tule i loto malie ; Na kenu foki e ia se fa tane tatau vite i ai. Ti na amanaki malie loa a ia e soli loa e ia se fua malie, Kae na tuku loa e ia se fua veli.

³ Koia i le lakaga nei, kakai o Selusalemi mo tagata o Suta, Ke kotou liliu ko ni tui fakamaau iate au mo laku vite !

⁴ Kolea mo se nea ke fai ki laku vite, leia na leikiaise kau fai ki ai ? Kolea na kau amanaki malie ai ki se fua malie, ti na fua veli a ia ?

⁵ E kau fakasa atu loa kia koutou i le lakaga nei Le nea leia ka kau fai loa ki laku vite. E kau tata loa le a laakau, o tupu ke kai a ia e manu ; E kau maumaui loa le a, o tupu ke takatakafi a ia e le fenua.

⁶ E kau tuku loa a ia ke lusa ; e leaise toe koti loa ona laa, pe toe fai loa ki ai se gaoi ; E sosomo loa a vao mo malualoi i ai ; Ti e kau fakatotonu loa ki ao, Ke aua na lotou toe fakato ia se ua ki ai.

⁷ Ko le vite a le Eteleno o kau tau, ko le fale o Iselaele, Ti ko tagata o Suta, ko le uli leia na alofa mamae a ia ki ai. Na amanaki malie a ia ki le loto sako, kae ko leinei ko se toto na liligi ! Na amanaki malie a ia ki le faitotonu, kae ko leinei ko ni tagi mamae !

Ko malaia e ono ki Iselaele

⁸ Malaia kia latou ala e kauga ko le fakatuu fale, Ti mo latou ala e kauga fai ko le fai o ni faisaga, O fakaoki ake e leaise koi maua se ganea lauatea, Ti kua lotou nonofo tefua i le fenua katoa !

⁹ Ko leinei le nea leia na fakasa mai kiate au e le Eteleno o kau tau : E kau fakamaoki atu kiate koe, e maumaui loa a fale mauke anei, Ti e leaise toe nofoi loa e ni iki a fale lalasi ana mo fulumalilie.

¹⁰ Talie e maua loa i le faisaga vite, leia e alepate kau agafulu lona lasi, se pate fai e tasi ; Ti e fakatupu loa e le omele pulapula se efa fai e tasi.

¹¹ Malaia kia latou ala e makape usuusu o afa ni kava makeke, Ti e fakaoki tausala lalatou inu vino i le pouli !

¹² Ko le alepe, mo le lute, mo le nafa, mo le fulute, ti mo le vino e fakaalaala ia alatou lafeti ; Kae e leaise lotou tokaga fua ki le gaoi a le Eteleno, Ti e leaise lotou tio fua ki le gaoi o ona lima.

¹³ Koia e ave fakapunamauli loa loku kakai o fakapopula : E mamate loa ona kau lalasi i le fia kai, Ti e mamate loa lona kakai toka api i le fia inu.

¹⁴ Koia kua fakamavaa ai le gutu o le nofoaga o le kau mate, Ti kua fakamavaa lasi ai lona gutu ; Ti e ifo loa ki ai le kau mauiga mo le kau mou koloa o Sione, Ti mo lona kakai logoa mo fiafia.

¹⁵ E tuku loa ki le kele le kau liliki, ti e fakataulalo loa le kau lalasi, Ti e saele tulolo loa le kau fia nealasi fuli.

¹⁶ Kae e siki loa ki aluga le Eteleno o kau tau i lana fakamaau, Ti e fakamaokioki loa le Atua maokioki i le faitotonu.

¹⁷ E kai loa ni kau ovi ofaipe i lolatou faisaga, Ti e kai loa e ni kau matapule a koloa i fale maumau o le kau mou koloa.

¹⁸ Malaia kia latou ala e toso ia le agaveli ki maea o le aga fakalialia, Ti mo le agasala ki maea o le kaka,

¹⁹ Ti e pati : ke fakatavili a ia, ke fakatavili lana gaoi O tupu ke motou tio ki ai ! Ke kaku mai la le fakamaau a le Sagato o Iselaele, ti ke fakasoko a ia Talie ke motou tio ki ai !

²⁰ Malaia kia latou ala e fakaigoa ia le veli ko le malie, ti mo le malie ko le veli, Ala e fetogi ia le fakapouli ko le malama, ti mo le malama ko le fakapouli, Ala e fetogi ia le kona ko le suamalie, ti mo le suamalie ko le kona !

²¹ Malaia kia latou ala e popoto kia latou totonu, Ti e manatu e lotou atamai !

²² Malaia kia latou ala e makeke i le inu vino, Ti e fia tagata i le filo o kava makeke ;

²³ Kia latou ala e fakatonu ia leia e sala ki se nea alofa, Kae e fakalakasala ia latou e saosaoa !

²⁴ Koia e lotou fai loa pe se kalosii afi leia e susunu ia le lau malo, Pe se ula leia e kai ia o okioki le mutie malo, E popo loa olatou aka, Ti e pupuli loa olatou se ofaipe le efu ; O tupu na lotou tiaki le lao a le Eteleno o kau tau, Ti na lotou vesia ki le folafola a le Maokioki o Iselaele.

²⁵ Koia kua vilo ai le sausau o le Eteleno ki lona kakai, Kua falo ai lona lima kiate ia, o taai a ia. Kua lulu a mauga ; Ti kua fai a mate pe ni penu i loto malie o ala. Kae logo ai a nea fuli ana, e leaise malu lona sausau, Ti e koi falo lona lima.

²⁶ Kua siki e ia se manumanu ki kakai mamao, Ti e vekai e ia se kakai mei potupotu o le malama nei : Ti ko leinei, kua kaku fakatavili mai aifai a ia.

²⁷ E leaise fa toka tasi fua e gaegae ; e leaise tasi fua e toso ona vae ; E leaise fa toka tasi fua e fia moe, pe tulemoe ; E leaise fa toka tasi fua e leaise toi lona kilipipi i ona vakavaka, Pe motumotu a va o ona taka.

²⁸ Kua matakakai ana gasau, Ti kua toso fakakitakita ana kalolo ; Kua fai a vae o ana osi pe ni fatu, Ti kua fai a teka o ana saliote pe se asesio.

²⁹ E fai lana gugulu pe le tagi a le laione fafine ; E tagi a ia ofaipe ni uviki laione, e gugulu a ia ti e uuti e ia lana nea kai ; E ave e ia a ia, ti e leaise tasi e au o taofi a ia.

³⁰ I le aso lena, e i ai loa se gugulu i ona tafa, Ofaipe le gugulu o le afa i le tai ; Ka tio ki le fenua, e tio loa ki le fakapouli ata, Mo ni tuania ti mo ni amanaki malie o faifai lakaga ; Ti e fakapouli loa le lagi.