Esaia 49 - Tosi Tapu

Le Fakamauli o Iselaele mo atu puleaga

¹ Atu motu, kotou fakalogo mai kiate au ! Kakai mamao, kotou tokaga ! Na kalagai au e le Eteleno talu mei loku tupu, Na tuku e ia loku igoa talu mei laku mavae i le manava o loku tinana.

² Na fakaliliu e ia loku gutu ke tatau mo se seleta matakakai, Na fufu e ia au i le malu o lona lima ; Na fai e ia kiate au se gasau matakakai, Na fufu e ia au i lana taga gasau.

³ Ti na pati mai a ia kiate au : Ko laku tagata fakasausau a koe, Iselaele leia e fakasa ia loa loku kololia.

⁴ Kae ko au na kau pati : Na leaise aoga o laku gaoi ; Na maumau noa loku makeke talie e leai sona fua ; Kae e fakamaoki le Eteleno kiate au, Ti e nofo le Atua mo loku fakapale.

⁵ I le aso nei, e folafola le Eteleno, Leia na fau ia au talu mei loku tupu ke liliu ko lana tagata fakasausau, Ke toe aumai kiate ia Sakopo, Ti mo Iselaele leia koi mavetevete ; Talie e kau mauiga ki mata o le Eteleno, Ti ko loku Atua ko loku makeke.

⁶ E pati a ia : Ko se nea noa ke ke liliu ko laku tagata fakasausau O toe lagai a faasiga o Sakopo, Ti mo toe aumai a toetoega o Iselaele : E kau fakanofo a koe ke liliu ko le malama o atu puleaga, Ke ave ia loku fakamauli o kaku ki potupotu o le malama nei.

⁷ Koia e pati ai le Eteleno, le fakamauli, le Sagato o Iselaele, Ki leia e vesiainai, leia e fakalialia ki ai le kakai, Ki le tagata popula a le kau makeke : E tio loa ni sau kiate ia, ti e lotou tutuu loa ki aluga ; E tio foki ni aliki kiate ia, ti e lotou punou loa i ona mua, O tupu ko le Eteleno, leia e agatonu, O tupu ko le Sagato o Iselaele, leia na filifili ia a koe.

⁸ Ko leinei le folafola a le Eteleno : I le temi o le kalasia e kau tali loa kiate koe, I le aso o le fakamauli e kau tokoi loa kiate koe ; E kau taupau loa a koe, ti e kau fakanofo loa a koe ke fai ia se sai mo le kakai, Ke toe lagai ia le fenua ki aluga, Ti ke tufa ia a tofiga na tiaki ;

⁹ Ke fakasa ia ki le kau popula : Kotou mavae ! Ti mo latou ala e nonofo i le fakapouli : Kotou au ki le malama ! E lotou fai loa pe se kau manu leia e kai i ala, Ti e lotou maua loa ni faisaga mutie sesega i mauga fuli.

¹⁰ E leaise lotou toe fia kai loa, ti e leaise lotou toe fia inu loa ; E leaise lotou toe mamae loa i le matagi vevela o le toafa ti mo le laa ; Talie ko leia e alofa kia latou e liliu loa ko lolatou tagata takitaki, Ti e taki loa e ia latou ki ni matapuna vai.

¹¹ E kau fetogi loa oku mauga fuli ke alai, Ti e kau fakafoou loa oku ala.

¹² Ko nei latou, e lotou au mei mamao, Ko iki mei le potu noleto mo le potu uesite, Ko iki mei le fenua o Sinime.

¹³ Atu lagi, kotou fakafiafia ! Kele, kotou nekenekea ! Atu mauga, kotou kalaga fakafiafia ! Talie e fakapelepele e le Eteleno lona kakai, Ti kua alofa a ia ki lona kakai na mamae.

¹⁴ Kae na pati Sione : Kua tiaki au e le Eteleno ! Kua galoi au e le Aliki !

¹⁵ Pe galoi e se fafine lana fanau leia e fakau e ia ? Pe leaise alofa a ia ki le fua o lona manava ? Pe ka galoi loa e le tinana lana fanau, Ko au e leaise kau galoi loa a koe.

¹⁶ Ko leinei, na kau ta lou igoa i oku lima ; E tuu ou paa i mua o oku mata o lee gato.

¹⁷ E fai makape mai ou vosa ; Ko latou ala na maumaui ia ti na kaia ia a koe E mavae loa i loto malie o ou.

¹⁸ Siki ake ou mata, o tio takatakai, ti ke tio : E lotou fakatasi fuli, ti e lotou au kiate koe. E kau mauli ! e pati le Eteleno, E ke kofu loa kia latou ofaipe se kofu fakateuteu, E ke nonoa loa latou i ou vakavaka ofaipe ni titi o se taine avaga.

¹⁹ I ou kolo maumau mo lavaki, I lou fenua maumau E kopikopi loa lou kakai i le aso lena ; Ti ko latou ala na kai ia a koe e fakamamao loa.

²⁰ E lotou tau pati atu loa ki ou taliga A vosa ala na ke sala ai : E lau ikiiki loku ganea nofo ; Fakalauatea mai se ganea, ke feala ke kau nofo ai !

²¹ Ti e ke pati loa i lou loto : Ko ai leia na fanaui ia latou kiate au ? Talie na kau sala fanau, na kau paa. Na ave popula au, na kapu au e loku avaga : ko ai na taupau ia latou ? Na kau nofo toka tasi : Ko latou anei, na lotou nonofo ifea ?

²² Koia na folafola ai le Aliki, le Eteleno : Ko leinei, e kau siki loa loku lima ki atu puleaga, E kau toso loa laku manumanu ki atu kakai ; Ti e lotou aumai loa ou vosa i olatou lima, Ti e lotou amo loa ou taineliki i olatou tuauma.

²³ E liliu loa ni sau ko ou tagata taupau toe, ti e liliu loa olatou fafine aliki ko au fafine taupau toe ; E lotou punou loa o kaku ki le kele i ou mua, Ti e lotou epo loa le efu i ou vae, Ti e ke iloa loa ko au ko le Eteleno, Ti ko latou ala e tuku ia lalatou amanaki malie kiate au e leaise luma loa.

²⁴ Pe too loa le koloa o le tagata makeke iate ia ? Pe too loa mei lima o le tagata tukipo leia na popula kiate ia ?

²⁵ Io, e pati le Eteleno, e too loa leia e popula ki le tagata makeke mei ona lima, Ti e too loa le koloa o le tagata agaveli mei ona lima. E kau taui loa ou fili, Ti e kau fakamauli loa ou vosa.

²⁶ E kau fagai loa latou ala na fakaveliveli kiate koe ki lolatou tino totonu ; E lotou konana loa i lolatou toto totonu ofaipe se vino ; Ti e iloa loa e tagata fuli ko au ko le Eteleno, lou fakamauli, Leia na totogi ia a koe, le mafimafi o Sakopo.