Esaia 48 - Tosi Tapu

Ko folafola afea mo folafola foou

¹ Kotou fakalogo mai ki le nea leinei, fale o Sakopo, Koutou ala e igoa ki le igoa o Iselaele, Koutou ala na ulu mei vai o Suta ; Koutou ala e fakapapau i le suafa o le Eteleno, Ti e faikole ki le Atua o Iselaele, Kae puli ai le maoki mo le loto sako !

² Talie e lotou igoa ki le kolo maokioki, Ti e lotou fanaki ki le Atua o Iselaele, Leia ko lona igoa ko le Atua o kau tau.

³ Talu mei fualoa na kau fakasa a nea ala na soko i le kamataaga, Na lotou mavae mei loku gutu, ti na kau fakasa latou : Na fokifa kua kau gaoi, ti na lotou soko.

⁴ Kae na kau iloa ko koe ko se kakai loto fefeka, Ti ko lou ua ko se potu ukamea, Ti ko lou lae ko se potu sila,

⁵ Na kau fakasa fakatomua kiate koe a nea ana talu mei mamao, Ti na kau fakasa atu latou kiate koe kae leikiaise lotou soko, O tupu ke aua na ke pati : Ko loku taulaatua leia na fai ia latou, Ko loku fakatata laakau pe ko loku fakatata ukamea, leia na fakatotonu ia latou.

⁶ E ke logo ! fakakaukau ki nea fuli ana ! Ti ko koutou, pe leaise kotou fakamaoki loa ki ai ? I le aso nei, e kau fakasa kiate koe ni nea foou, Na fufu, na leaise iloa iate koe.

⁷ E lotou soko i le temi nei, ti e leaise lotou kau ki le temi kua sili ; O kaku ki lolatou soko mai, na leaise ke lave fua ki ai, O tupu ke aua na ke pati : ko leinei, na kau iloa a ia.

⁸ Na leaise ke logo fua ki ai, na leaise ke iloa fua se nea, Ti na leaise logo fua lou taliga ki ai i le temi kua sili : Talie na kau iloa e leaise ke agatonu loa, Ti na fakaigoa a koe talu mei lou tupu ko le taine agatuu.

⁹ Kae o tupu ko loku suafa, e kau taofi loku sausau kiate koe ; O tupu ko loku kololia, e kau taofi loku lima kiate koe, Ke aua na kau tuuti a koe.

¹⁰ Na kau tuku a koe ki le gutuumu kaka, kae na leaise ko le gutuumu leia e fakamea ai le paaga ; Na kau asiasii a koe i le gutuumu o le mamae.

¹¹ O tupu ko le alofa kiate au, o tupu ko le alofa kiate au, leia na kau fai ai le nea lena ; Talie kolea e fakakelekele ai loa loku suafa ? E leaise kau soli loa loku kololia ki se tasi kese.

Fakamakeke ke fakalogo ki le Atua

¹² Sakopo, fakalogo mai kiate au ! Ti mo koe, Iselaele, leia na kau kalagai ! Ko au, io, ko au leia ko le uluaki, Ko au foki leia ko le fakamuli.

¹³ Na fakatuu e loku lima le malama nei, Ti na folasi e loku lima atamai a atu lagi : E kau kalagai latou, ti e lotou au aifai.

¹⁴ Koutou fuli, kotou fakatasi mai, ti kotou fakalogo ! Ko ai ia latou na fakasa fakatomua ia a nea ana ? Ko leia e alofa ki ai le Eteleno e fakasoko ia loa lona finegalo ki Papilone, Ti e mamafa loa lona lima ki le kau Kaletea.

¹⁵ Ko au, ko au, na kau masau ti na kau kalagai a ia ; Na kau aumai a ia, ti e manuia loa lana gaoi.

¹⁶ Kotou fakafeofi mai kiate au, ti kotou fakalogo ! Talu mei le kamataaga, na leaise kau masau fakafufu ; Talu mei le kamataaga o nea ana, na kau nofo i ai. Kae i le aso nei, ko le Aliki, le Eteleno, na kakau mai au mo lona Laumalie.

¹⁷ Ti ko leinei le folafola a le Eteleno, leia na totogi ia a koe, le Sagato o Iselaele : Ko au, le Eteleno, lou Atua, e kau ako a koe ke ke manuia, E kau taki a koe i le ala leia e tonu ke ke mulimuli ai.

¹⁸ Oi, amusia ake ke ke tokaga ki aku folafola ! E ifo loa kiate koe ni tapuakina ofaipe se vaitafe, Ti e au loa kiate koe le manuia ofaipe ni galu o le tai !

¹⁹ E fai loa lou sakoga pe le one o le mata tai, Ti ko fua o lou manava pe fiti o le one ; E leaise toe soloi loa lou igoa, pe puli loa i oku mua !

²⁰ Kotou mavae i Papilone, kotou sosola i loto malie o le kau Kaletea ! Kotou fakasa i ni kalaga fakafiafia le logo malie leinei, Kotou fakasa a ia o kaku ki le potupotu o le malama nei, Kotou pati : Kua toe totogi e le Eteleno lana tagata fakasausau ko Sakopo !

²¹ Ti e leaise lotou fia inu loa i toafa ala e taki loa e ia latou ki ai : E fakasali loa e ia kia latou le vai i le utu, E fakamafaa loa e ia le utu, Ti e sali loa le vai.

²² E leaise tokamalie ki le kau agaveli, e pati le Eteleno