Esaia 47 - Tosi Tapu

Le fakamaau o Papilone

¹ Ifo, ti ke tonatona i le efu, A koe, taupoou, taine o Papilone ! Tonatona ki le kele, sala ekeekeaga fakasau, Taine o le kau Kaletea ! E leaise toe fakaigoa loa a koe fakaeteete mo fafine aliki.

² Ke ke too a fatu fakamaluu, ti ke ke fakamaluu le falina ; Too lou pulou, kutukutu lou kofu, Tuku ke fakatekateka ou vae, fakalaka i vaitafe lalasi !

³ E fakasa loa lou telefua, Ti e tio loa ki lou luma. E kau tautea loa a koe, E leaise kau tuku loa ke sao se tasi.

⁴ Ko lomatou fakamauli, ko leia e igoa ko le Eteleno o kau tau, Ko le Sagato o Iselaele.

⁵ Tonatona fakalologo, ti ke ke ano ki le fakapouli, Taine o le kau Kaletea ! E leaise toe fakaigoa loa a koe ko le fafine aliki o atu puleaga.

⁶ Na kau ita ki loku kakai, Ti na kau fakakelekele loku tofiga ; Ti na kau tuku latou ki ou lima : Kae na leaise ke maua fua kia latou se manava alofa, Ti na ke fakamamafa lau laakau ki le matua.

⁷ Na ke pati : E kau fafine aliki loa o lee gato ! Na leaise ke tuku fua ki lou loto, Na leaise ke manatu fua e oki loa le nea a ia i se aso.

⁸ Fakalogo mai i le lakaga nei ki le nea leinei, taine fia aliki, A koe leia e ekeeke fia fafine, Ti e pati i lou loto : Ko au fai, ti ko au fai toka tasi ! E leaise kau lokonui loa i se aso, Ti e leaise kau sala fanau loa i se aso !

⁹ Ko nea ana e lua e soko fakapunamauli loa kiate koe, i le aso e tasi, Lau nofo sala fanau ti mo lau nofo lokonui ; E la vilo fakaagatonu loa kiate koe, Logo ai le mauke o au puleaki fakatemonio fuli, Logo ai le lasi o au fakalaulaakau.

¹⁰ Na ke fanaki ki lou agaveli, Na ke pati : E leaise tio mai se tasi kiate au ! Ko lou poto mo lou atamai na fakasese ia a koe. Ti na ke pati i lou loto : Ko au fai, ti ko au fai toka tasi !

¹¹ E au loa le malaia kiate koe, Kae e leaise ke tio loa ki lana au ; E vilo loa le tautea kiate koe, Kae e leaise toe mafai loa ke ke malui a koe ; E vilo fakaofolele loa le maumau kiate koe, I le temi leia na leaise ke talitali ki ai.

¹² Soko atu lau fai au fakalaulaakau Ti mo au faitoo fakatemonio, Ala na ke gaoi pakia ki ai mei lou ikiiki ; E lagi feala loa ke ke maua ia latou se nea, E lagi feala loa ke ke makeke ai.

¹³ Kua ke pakia i le ano kia latou ala e sivi ia le lagi mo temi ! Ke lotou tutuu ake ki aluga ti ke lotou fakamauli a koe, Latou ala e iloa ia le lagi, Latou ala sivisivi ia a fetuu, Latou ala e kikite ia le nea leia ka soko o mulimuli ki masina foou, Le nea leia ka soko kiate koe !

¹⁴ Ko leinei, e lotou faipe le kaui fulumeto leia e susunu e le afi. E leaise lotou fakamauli loa olatou mauli mei ula : E leaise ko se malala loa a ia ke fakamafana ai, E leaise ko le afi loa a ia ke tonatona i ona tafa.

¹⁵ Ko lena loa le anoaga o latou ala na ke pakia i le afa ki ai. Ti ko latou ala na faikoloa mo koe talu mei lou ikiiki E mavetevete loa o tasi ano ki lona fetuu : E leaise au loa se tasi o tokoi kiate koe.