Esaia 46 - Tosi Tapu

Ko le vilo o atua o Papilone

¹ Kua fakapulou a Pele, ti kua vilo a Nepo. Kua teki ola fakatata ki ni manu, ki ni pipi ; Kua amo laua pe se kavega, ti kua mafaia ai a manu ti kua lotou gaegae foki.

² Kua lotou vivilo, kua lotou mafaafaa i le kele, a taulaatua mo manu, Ti e leaise mafai ke lotou fakamauli le amoga, Ti e lotou ano, latou totonu, ki le popula.

³ Kotou fakalogo mai kiate au, fale o Sakopo, Ti mo koutou fuli, toetoega o le fale o Iselaele, Koutou ala na kau too o taupau talu mei lokoutou kamataaga, Ala na kau luluku talu mei lokoutou tupu !

⁴ E kau tatau loa kia koutou o kaku ki lokoutou matutua ; E kau tokoi loa kia koutou o kaku ki lokoutou matutua. Io, na kau fai a ia, ti e kau loto foki ke toe luluku koutou, Ke toe tokoi kia koutou, ti ke toe fakamauli koutou.

⁵ Ko ai e kotou fakatatau au ki ai, ke kotou fai a ia ko loku tatau ? Ko ai e kotou fia fakatatau au ki ai, ke ma tatau ?

⁶ Ko leinei e lotou liligi le aulo mei lalatou taga paaga, Ti e lotou fua le mamafa o le paaga i le fua. E lotou totogi se tagata tufuga ukamea ke fai ia ki le aulo mo le paaga se atua, Ti e lotou punou i ona mua, o atolasio ki ai.

⁷ E lotou amo a ia, ti e lotou teki a ia ki olatou tuauma ; E lotou fakatuu a ia ki lona tuuaga, ti e nofo a ia i ai ; E leaise taugaoi a ia i lona tuuaga ; Ti e lotou kalaga ki ai, kae e leaise tali a ia, E leaise fakamauli e ia i le mamae.

⁸ Kotou manatui a nea ana, Ti kotou faipe ni tagata ! Tagata agasala, kotou fakakaukau !

⁹ Kotou manatui le nea leia na soko i temi afea ; Talie ko au e Atua, ti e leaise tasi ake Atua. Ko au e Atua, ti e leaise tasi e tatau mo au.

¹⁰ E kau fakasa mei le kamataaga le nea leia e tonu ke soko, Ti mei mamao le nea leia e leikiaise soko ; E kau pati : E tuu mau loa aku fakatuutuu, Ti e kau fai loa loku finegalo katoa.

¹¹ Ko au leia e kalagai ia mei le potu esite se manu lele fekai, Mei se kele mamao se tagata ke fakasoko ia aku fakatuutuu, Na kau fakasa a ia, ti e kau fai loa a ia ; Na kau fakakaukaui a ia, ti e kau fakasoko loa a ia.

¹² Kotou fakalogo mai kiate au, kakai loto fefeka, Ala ko fili o le maoki !

¹³ E kau fakafeofi mai laku faitotonu : e leaise mamao a ia ; Ti ko laku fakamauli : e leaise tuvai loa. E kau tuku loa le fakamauli i Sione, Ti mo loku kololia i Iselaele.