Esaia 45 - Tosi Tapu

Ko le gaoi a Silusi

¹ Ko leinei le folafola a le Eteleno ki lana filifiliia, ko Silusi,

² Leia e too e ia i le lima, Ke laku ia ki le kele a atu puleaga i ona mua, Ti ke fakagaga ia le kilipipi o sau, Ti ke fakamavaa ia a matapa, O tupu ke aua na toe tapono latou : E kau saele loa i ou mua, E kau fakatokatoka loa a ala patupatu, E kau fatifatii loa a matapa kapa, Ti e kau fatifatii loa a fakamau ukamea.

³ E kau soli loa kiate koe ni koloa fufu, Ni koloa na tanu, O tupu ke ke iloa Ko au ko le Eteleno leia e kalaga kiate koe i lou igoa, Ko au ko le Atua o Iselaele.

⁴ O tupu ko loku alofa ki laku tagata fakasausau ko Sakopo, Ti mo Iselaele, laku filifiliia, Na kau kalagai a koe i lou igoa totonu, Na kau masau kiate koe i le loto malie, i mua o lau iloa au.

⁵ Ko au ko le Eteleno, ti e leaise tasi ake ; Sala mo au e leaise tasi ake Atua ; Na kau fakakofu a koe, i mua o lau iloa au.

⁶ E tupu ke iloa mei le sopoaga o le laa o kaku ki le galoaga o le laa, E leaise tasi ake Atua iate au : Ko au ko le Eteleno, ti e leaise tasi ake.

⁷ E kau fau le malama, ti e kau fakatupu le fakapouli ; E kau soli le mou koloa, ti e kau fakatupu le malaia ; Ko au, le Eteleno, e kau fai a nea fuli ana.

⁸ Ke ifo a atu lagi mei aluga Ti ke tuku e ao ke sali le faitotonu ! Ke mavaa le kele, ke tupu i ai le fakamauli, Ti ke toe tupu foki i ai le faitotonu ! Ko au, le Eteleno, e kau fakatupu ia a nea ana.

Ko le kele faiipu mo le tagata faiipu

⁹ Malaia leia e fakatutuu ki leia na fakatupu ia a ia ! A koe ko le ipu kele i loto malie o ni ipu kele ! Pe feala ke pati le kele kula ki le tagata leia e gaoi ia a ia : Kolea e ke fai ? Pe pati le ipu ki le tagata faiipu : E leaise ke poto ?

¹⁰ Malaia ki leia e pati ki lona tamana : Kolea na ke fakatupu ai au ? Ti e pati ki lona tinana : Kolea na ke fanaui ai au ?

¹¹ Ko leinei le folafola a le Eteleno, le Sagato o Iselaele, leia na fakatupu ia a ia : Pe kotou loto ke fakavesilii au o uiga mo le temi ka au, Ke tuku mai kiate au ni fakatotonu o uiga mo aku fanau, ti mo le gaoiaga o oku lima ?

¹² Ko au leia na fai ia le kele, Ti na fakatupu ia le tagata leia e mauli i ai. Ko au, ti ko oku lima ala na folasi ia a atu lagi, Ti ko au foki leia na fakatuutuu ia lona kau tau.

¹³ Ko au leia na lagai ia Silusi ke fakasoko ia laku faitotonu, Ti e kau fakafaigaofie ia loa ona ala fuli. E toe laga loa e ia loku kolo, ti e fakalauatea loa e ia laku kau popula, Sala totogi, sala se nea alofa, E pati le Eteleno o kau tau.

Tapuakina ki malama nei katoa

¹⁴ Ko leinei le folafola a le Eteleno : Ko fua o gaoi a Esipito ti mo koloa o Etiopia, Ti mo koloa o le kakai o Sapa ala ko ni tagata lalasi, E aumai loa kiate koe, ti e ke maua loa latou ; E saele loa a kakai ana i ou muli, E lotou saele loa mo ni tini, E lotou punou loa i ou mua, o kolekole atu kiate koe : Ko le maoki e nofo le Atua iate koe toka tasi, E leaise tasi ake Atua i se tasi ake ganea.

¹⁵ Kae ko se Atua a koe leia e mumuni, Atua o Iselaele, le fakamauli !

¹⁶ Kua lotou luma fuli ti kua lotou fakasemala fuli i le fau o taulaatua. Kua lotou saele tulolo fuli i le luma, Latou fuli ala na fau ia ni taulaatua.

¹⁷ Kae ko le Eteleno leia e maua ai e Iselaele le fakamauli, Se fakamauli lee gato. E leaise kotou luma loa pe fakasemala loa, o lee gato.

¹⁸ Talie ko leinei le folafola a le Eteleno, Leia na fakatupu ia a atu lagi, le Atua e tasi, Leia na fau ia le malama nei, leia na fai ia a ia ti na fakamakeke ia a ia, Leia na fau ia a ia ke aua na lavaki, Leia na fakatupu ia a ia ke nofoi : Ko au ko le Eteleno, ti e leaise tasi ake Atua.

¹⁹ Na leaise kau masau fakafufu I se ganea fakapouli o le kele ; Na leaise kau pati ki le sakoga o Sakopo : Kotou afa au i se ganea leia e leaise kau nofo ai ! Ko au, le Eteleno, e kau fakasa le maoki, E kau fakasa le nea leia e totonu.

²⁰ Kotou fakatasi ti kotou au, kotou fakafeofi fakatasi mai, Koutou ala na sao i atu puleaga ! E leaise lotou maua ia se atamai, latou ala e amo ia olatou taulaatua laakau, Ala e faikole ki se atua leia e leaise mafai ke fakamauli ia latou.

²¹ Kotou fakasa le nea lena, ti kotou aumai latou kiate au ! Ke lotou fakakaukau fakatasi ! Ko ai na kikite ia mei le kamataaga a nea ana, Ti na fakasa ia latou mei mamao ? Pe leaise ko au, le Eteleno ? E leaise tasi ake Atua iate au, Ko au ko le Atua faitotonu e toka tasi Ti e fakamauli ia.

²² Kotou tafoki mai kiate au, ti e kotou mauli loa, Koutou fuli ala e nonofo i potupotu o le malama nei ! Talie ko au ko le Atua, e leaise tasi ake Atua.

²³ E kau fakapapau iate au totonu, E ulu le maoki mei loku gutu, ti e leaise toe liliu loa ki muli laku masau : E peluki loa a tuli fuli i oku mua, Ti e fakapapau loa a alelo fuli iate au.

²⁴ E lotou pati mai loa kiate au : Ko le Eteleno toka tasi leia e maua ai le faitotonu mo le makeke ; Ko latou fuli ala na itaita kiate ia E toe liliu mai loa kiate ia i le luma.

²⁵ E maua loa e vosa o Iselaele Le faitotonu mo le kololia i le Eteleno.