Esaia 44 - Tosi Tapu

Ko le Eteleno mo taulaatua

¹ I le temi nei fakalogo mai, ei Sakopo, ko laku tagata fakasausau ! Ei Iselaele, leia na kau filifili !

² Ko leinei le folafola a le Eteleno, leia na fakatupu ia a koe, Leia na fau ia a koe mei lou tupu, Leia ko lou fanakiaga : Aua na ke i ki se nea, ei laku tagata fakasausau ko Sakopo, Ei laku Iselaele, leia na kau filifili.

³ Talie e kau liligi loa ni vai ki le fenua kua mate i le fia inu, Ti mo ni liua ki le kele malo ; E kau liligi loa loku Laumalie ki lou sakoga, Ti mo laku tapuakina ki ou uli.

⁴ E lotou sosomo loa ofaipe i loto malie o se mutie, Ofaipe ni sole i tafa o ni tafeaga vai.

⁵ E pati loa le tasi : Ko au a le Eteleno ; E loto loa le tasi ki le igoa o Sakopo ; E tosi loa e le tasi ake ki lona lima : ki le Eteleno ! Ti e puaki loa e ia i le alofa le igoa o Iselaele.

⁶ Ko leinei le folafola a le Eteleno, le sau o Iselaele ko lona fakamauli, Le Eteleno o kau tau : Ko au ko le uluaki ti ko au ko le fakamulimuli, Ti e leaise tasi ake Atua iate au.

⁷ Ko ai, ofaipe au, na fai ia ni kikite Talu mei le aso leia na kau fakatupu ai le kakai afea ? Ke fakasa mai e ia ti ke tuku mai e ia ni ana fakamaoki ! Ke lotou fakasa le temi ka au ti mo nea ka soko !

⁸ Aua na kotou i, ti aua na kotou lulu ; Pe na leaise kau fakasa atu a nea fuli ana talu mei mamao kiate koe ? Ko aku tagata fakamaoki koutou : Pe i ai se tasi ake Atua iate au ? E leaise tasi ake a utu, e leaise kau iloa se tasi ake.

⁹ Ko latou fuli ala e fau ia ni taulaatua ko nea noa, Ti e leaise aoga alatou gaoi fulumalie fuli ; E lotou fakamaoki totonu : E leaise lotou tio, e leai solatou atamai, O tupu ke lotou luma.

¹⁰ Ko ai kua fau ia se atua, pe kua saka ia se taulaatua ukamea, Kae e leai sona ga aoga fua kiate ia ?

¹¹ Ko leinei, ko latou fuli ala e fau fakatata e luma loa ; Ti ko kau tufuga ko ni tagata ; Ke lotou fakatasi fuli, ke lotou au ki oku mua, Ti e lotou lulu fuli loa i le i, ti e lotou apele loa i le luma !

¹² E fai e le tagata gaoi ukamea se toki, E gaoi a ia mo ni malala, Ti e ta e ia ki le amale ; E gaoi a ia ki le makeke o lona lima ; Kae ka fia kai a ia, ti ko lena kua oki lona makeke ! Ti ka e leaise inu a ia, ti ko lena kua gaegae a ia !

¹³ E fao e le tagata tufuga laakau le va, Ti e fai e ia se fakamailoga ki le peni, Ti e togi e ia le potu laakau ki le siso, Ti e fakamomole e ia ona koga fakalikiliki ki le kili ; Ti e fai e ia ni mata o se tagata, Se paaki fulumalie o se tagata, O tupu ke nofo a ia i se fale.

¹⁴ E sele e ia ni sete, E too e ia ni telepate mo ni sene, Ti e filifili e ia se tasi ake laakau i le vaomatua ; E to e ia ni pinusi, Ti e fakasomo latou e le ua.

¹⁵ E aoga a laakau ana ki le tagata ke tafu ai le afi ; E too e ia se potu ti e fakamafana a ia ki ai, E fakamoso e ia lana nea kai ki le tasi a potu. Ti e toe fai foki e ia ki ai se atua, leia e atolasio a ia ki ai, E fai e ia ki ai se taulaatua, leia e punou a ia ki ai.

¹⁶ E tafu e ia le afi ki le vaelua o lana laakau, Ki le vaelua lena o le laakau e fakamoso e ia le inati, E teuteu e ia se potu inati moso, ti e kai a ia o makona ; E toe fakamafana foki a ia ki ai, o pati : A ! a ! Kua kau fakamafana, e kau tio ki le ula !

¹⁷ Kae e fai e ia ki le toe o le laakau se atua, lona taulaatua. E punou a ia i ona mua, e atolasio a ia ki ai, e faikole a ia ki ai, Ti e kalaga a ia ki ai : Fakamauli au ! Talie ko koe ko loku atua !

¹⁸ E leaise lotou maua se atamai, e leaise lotou matala fua ki se nea, Talie na tapono olatou mata ke aua na lotou tio, Ti mo olatou loto ke aua na lotou matala.

¹⁹ E leaise fakakaukau a ia, Ti e leaise maua e ia se atamai, pe ko le manatu poto fua ke pati : Na kau tafu le afi ki le koga o le laakau leinei, Na kau fakamoso se nea kai i malala kaka, Na kau tunu i ai se inati ti na kau kai a ia ; Ti e kau fai loa ki le toe o le potu laakau se nea fakalialia ! E kau punou loa i mua o se potu laakau !

²⁰ E kai makona a ia ki le mugalafu, E fakasese a ia e lona loto fakapouli, Ti e leaise fakamauli loa e ia lona laumalie, ti e leaise pati loa a ia : Pe leaise ko se loi leinei e kau too i loku lima ?

Ko le toe liliu o Iselaele ia Silusi

²¹ Manatui a nea ana, ei Sakopo ! Ei Iselaele ! talie ko laku tagata fakasausau a koe ; Na kau gaoi a koe, ko laku tagata fakasausau a koe ; Iselaele, e leaise kau toe galoi loa a koe.

²² E kau soloi au sala ofaipe se kokofu, Ti mo au agasala ofaipe se ao ; Toe liliu mai kiate au, Talie na kau totogi a koe.

²³ Atu lagi, kotou fakafiafia ! talie kua gaoi le Eteleno ! Potu loloto o le kele, kotou kalaga fakanekenekea ! Mauga lalasi, kotou fai ni kalaga fakafiafia ! Mo koutou foki, vaomatua ti mo okoutou laakau fuli ! Talie kua toe totogi e le Eteleno a Sakopo, Kua fakasa e ia lona kololia i Iselaele.

²⁴ Ko leinei le folafola a le Eteleno, leia na totogi ia a koe, Leia na fau ia a koe mei lou tupu : Ko au, le Eteleno, na kau fai ia a nea fuli, Ko au toka tasi leia na folasi ia a atu lagi, Ko au toka tasi leia na fola ia le malama nei.

²⁵ E kau fakanoa ia a fakamailoga a kau polofeta loi, Ti e kau fakasa le valea o kau kikite ; E kau fakasolomuli le kau poto, Ti e kau fakaliliu lolatou iloa ko le valea.

²⁶ E kau fakamaoki ki le masau a laku tagata fakasausau, Ti e kau fakasoko le nea leia kua fakasa fakatomua e aku tagata fakafofoga ; E kau pati ki Selusalemi : E nofo loa i ai, Ti e kau pati ki kolo o Suta : E toe laga loa latou ; Ti e kau toe fakatuu loa ona kolo maumau.

²⁷ E kau pati ki le vanu loloto : Ke ke malo, E kau fakamasa loa ou vaitafe.

Folafola o uiga mo Silusi

²⁸ E kau pati kia Silusi : Ko laku tagata tausi manu a ia, Ti e fakasoko loa e ia loku finegalo katoa ; E pati loa a ia ki Selusalemi : Ke toe laga a ia ! Ki le fale tapu : Ke toe fakavae a ia !