Esaia 43 - Tosi Tapu

Ko le Atua toka tasi ko le Fakamauli

¹ I le aso nei, ko leinei le folafola a le Eteleno, leia na fakatupu ia a koe, Sakopo ! Leia na fau ia a koe, Iselaele ! Aua na ke i ki se nea, talie e kau toe totogi a koe, E kau kalagai a koe i lou igoa totonu : a aku a koe !

² Kapau e ke ano i atu vai, e kau nofo loa mo koe ; Ti kapau e ke ano i ni vaitafe lalasi, e leaise ke ogo loa ; Kapau e ke saele i le afi, e leaise ke vela loa, Ti e leaise tutu loa a koe e le ula.

³ Talie ko au ko le Eteleno, lou Atua, Le Sagato o Iselaele, ko lou Fakamauli ; E kau soli Esipito ko lou totogi, Etiopia mo Sapa ko lou fetogi.

⁴ Talie e ke mauiga ki oku mata, Talie e ke lasi kiate au ti e kau alofa kiate koe, E kau soli ni tagata ke fetogi ai a koe, Ti mo ni kakai ke totogi ai lou mauli.

⁵ Aua na ke i ki se nea, talie e kau nofo mo koe ; E kau toe aumai loa mei le potu esite lou lanu, Ti e kau fakatasi mai loa a koe mei le potu uesite.

⁶ E kau pati loa ki le noleto : Soli mai ! Ti e kau pati loa ki le potu saute : Aua na taofi ! Kotou aumai oku vosa mei fenua mamao, Ti mo oku taineliki mei potupotu o le malama nei,

⁷ Latou fuli ala e igoa ki loku igoa, Ti na kau fakatupu ki loku kololia, Ala na kau fau ti na kau fai.

Iselaele ko le tagata fakamaoki

⁸ Ke fakaulu ki fafo le kakai kivi, leia e maua ia ni mata, Ti mo le kau tulituli, ala e maua ia ni taliga.

⁹ Ke fakatasi a atu puleaga fuli, Ti ke fakatasi a kakai fuli. Ko ai ia latou na fakasa fakatomua ia a nea anei ? Ko ai ma latou ala na fakasa ia mai kia matou a uluaki kikite ? Ke lotou tuku mai ki loto alatou tagata fakamaoki, ti ke lotou fakasa pe lotou maoki ! Ke fakalogo ki ai ti ke pati : e maoki !

¹⁰ Ko koutou ko aku tagata fakamaoki, e pati le Eteleno, Koutou mo laku tagata fakasausau leia na kau filifili, O tupu ke kotou iloa a ia, Ke kotou tui mai kiate au, ti ke kotou matala ko au : I oku mua na leaise fau se Atua, Ti i oku muli, e leaise toe maua loa se Atua.

¹¹ Ko au, ko au leia ko le Eteleno, Ti e sala mo au, e leai se fakamauli.

¹² Ko au leia na fakasa ia, na fakamauli ia, na fakasa fakatomua ia, E leaise ko se atua kese ia koutou ; Ko koutou ko aku tagata fakamaoki, e pati le Eteleno, Ko au leia e Atua.

¹³ E kau Atua talu le kamataaga, Ti e leaise tasi e saofaki ia mei loku lima ; E kau gaoi loa : ko ai e taofi ia loa au ?

¹⁴ Ko leinei le folafola a le Eteleno, Lokoutou Fakamauli, le Sagato o Iselaele : O tupu ko koutou, e kau kakau le fili ki Papilone, Ke laku ia ki lalo a loka fuli, Ti e liliu loa, i le kau Kaletea, a kalaga fakafiafia ko ni tagi laulau.

¹⁵ Ko au ko le Eteleno, lokoutou Sagato, Le tupuaga o Iselaele, lokoutou sau.

Ko le ala foou i le toafa

¹⁶ Ko leinei le folafola a le Eteleno, Leia na tofa ia se ala i le tai, Leia na tofa ia se anoaga i loto malie o atu vai makeke,

¹⁷ Leia na tuku ia ke ano ki le tau ni saliote mo ni osi, Ni kau solia mo ni tagata toa, Ala na sisiga fakafokifa fuli i le temi e tasi, Ti na leaise lotou toe malaga ake loa ki aluga, Talie kua lotou mamate, kua lotou okioki ofaipe se vavai o se malama.

¹⁸ Aua na kotou toe manatu ki nea kua sili, Ti aua na kotou toe tokaga ki nea kua afea.

¹⁹ Ko leinei, e kau fai loa se nea foou, leia kua vave soko fua : Pe leaise kotou tio mata loa ki ai ? E kau tofa loa se ala i le toafa, Ti mo ni vaitafe lalasi i le potu lavaki.

²⁰ E fakakololia loa kiate au a manu o faisaga, A kuli vao mo otulusi, Talie e kau tuku loa ni vai i le toafa, Ni vaitafe i le potu lavaki, Ke fakainu ai loku kakai, loku filifiliia.

²¹ Ko le kakai leia na kau fau ma aku, E fakasa ia loa oku fakavikiviki.

Ko le fakamaau a le Atua mo Iselaele

²² Kae na leaise ke fetapa mai kiate au, ei Sakopo ! Talie na ke kaekae iate au, ei Iselaele !

²³ Na leaise ke momoli mai kiate au ni akeno i ni failaulau, Ti na leaise ke fakamauiga au ki au sakilifisio ; Na leaise kau fakamakeke kiate koe ni moliga, Ti na leaise kau fakakaekae a koe ki se iseso.

²⁴ Na leaise ke totogi paaga ni nea fakamanogi kiate au, Ti na leaise ke fagai au ke makona ki le gako o au sakilifisio ; Kae na ke fakamamae au ki au agasala, Na ke fakapakia au ki au agaveli.

²⁵ Ko au, ko au leia e soloi ia a agatuu o tupu ko loku alofa kiate au, Ti e leaise kau toe manatui loa au agasala.

²⁶ Fafagu loku manatu, ta masasau fakatasi, Masau mai a koe totonu, o fakasa mai lou faitotonu !

²⁷ Na agasala lou uluaki tamana, Ti na agatuu kiate au ou fakafofoga.

²⁸ Koia na kau fai ai ki pule o le fale tapu pe ni tagata noa, Ti na kau tuku ai Sakopo ki le maumau, Ti mo Iselaele ki lauveli.