Esaia 41 - Tosi Tapu

Mafimafi o le Atua ; noa o taulaatua

¹ Atu motu, kotou fakalologo o fakalogo mai kiate au ! Ke fakafoou e kakai fuli lolatou makeke ! Ke lotou soso mai, ti ke lotou masau ! Tou fakafeofi fakatasi ki le fakamaau !

² Ko ai na lagai ake ia i le potu esite Leia na kalagai e le fakamauli ke muli iate ia ? Ko ai na tuku ia kiate ia a atu puleaga ti na fakapopula ia ni sau ? Ko ai na fakaliliu ia alatou seleta o efu, Ti mo alatou gasau ko se penu malo leia e agina i le matagi ?

³ Na tuli e ia latou, ti na saele a ia i le fimalie I se ala leia na leikiaise takafi e ona vae.

⁴ Ko ai na fai ia ti na fakasoko ia a nea ana ? Ko leia na kalagai ia a tautupu mei le kamataaga, Ko au, le Eteleno, le uluaki Leia e tatau o kaku ki sekulo fakamuli.

⁵ E tio a atu motu kiate ia, ti e lotou i ; E lulu a potupotu o le malama nei : E lotou fakafeofi mai, e lotou au.

⁶ E lotou fetokoiaki ia latou, Ti e pati le taina ki lona taina : Loto makeke !

⁷ Ko le tagata togi laakau e fakalotomakeke ia le tagata saka ukamea ; Ko leia e fakamomole ki le amale e fakalotomakeke ia leia e ta ki le lago ukamea ; E pati a ia ki le puluti ukamea : e malie a ia ! Ti e fakamau e ia le taulaatua ki ni fao, ke aua na toe gaga.

⁸ Kae ko koe, Iselaele, laku tagata fakasausau, Sakopo, leia na kau filifili, Sakoga o Apalaamo leia na kau alofa ki ai !

⁹ A koe, leia na kau too i potupotu o le malama nei, Ti na kau kalagai mei se fenua mamao, Leia na kau pati ki ai : Ko koe ko laku tagata fakasausau, Kua kau filifili a koe, ti e leaise kau tiaki a koe !

¹⁰ Aua na ke i ki se nea, talie e kau nofo mo koe ; Aua na ke takamilo ni mata tuania, talie ko au ko lou Atua ; E kau fakamakeke a koe, e kau au o tokoi kiate koe, E kau taofi a koe ki loku lima atamai malo.

¹¹ Ko leinei, e lotou fakasemala loa, e lotou apele loa i le luma, Latou fuli ala na itaita kiate koe ; E fakaliliu loa latou ko ni nea noa, e lotou mamate loa, Latou ala e fakafefele atu kiate koe.

¹² E ke afa loa latou, kae e leaise ke maua loa latou, Latou ala na fakatupu fefele atu kiate koe ; E fakaliliu loa latou ko ni nea noa, e lotou pupuli loa, Latou ala na fai ia le tau kiate koe.

¹³ Talie ko au ko le Eteleno, lou Atua, Leia e fakamakeke ia lou lima atamai, Leia e pati atu kiate koe : Aua na ke i ki se nea, E kau au o tokoi kiate koe.

¹⁴ Aua na ke i ki se nea, kelemutu o Sakopo, Toetoega gaegae o Iselaele ; E kau au o tokoi kiate koe, e pati le Eteleno, Ti ko le Sagato o Iselaele ko lou fakamauli.

¹⁵ Ko leinei, e kau fakaliliu a koe ko se saliote sasa fulumeto, foou katoa, Kua apele i ni nifo matakakai ; E ke sasa loa, e ke gugu loa a mauga lalasi, Ti e ke fakaliliu loa a mauga liliki ofaipe le mutie malo leia e viligia.

¹⁶ E ke tuui loa latou, ti e ave loa latou e le matagi, Ti e fakamavete loa latou e se sasataki. Kae ko koe, e ke fiafia loa i le Eteleno, Ti e tuku loa lou kololia ki le Maokioki o Iselaele.

¹⁷ E afa e le kau fakaaloalofa mo le kau mativa se vai, kae e leaise maua a ia ; Kua malo olatou alelo i le fia inu. Ko au, le Eteleno, e kau tali loa latou ; Ko au, le Atua o Iselaele, e leaise kau tiaki loa latou.

¹⁸ E kau fakamavaa loa ni vaitafe i mauga liliki, Ti mo ni matamata i loto malie o vaivailiua ; E kau fakaliliu loa le toafa ko se vai tanaki, Ti mo le kele kaka ko ni tafe ;

¹⁹ E kau tuku loa i le toafa le sete, mo le akasia, Le mila mo le olive ; E kau tuku loa i le potu kele kaka Le sipele, mo le oleme, ti mo le pui, fakatasi fuli ;

²⁰ O tupu ke lotou tio, ke lotou iloa, Ke lotou tokaga, ti ke lotou matala Ko le lima o le Eteleno leia na fai ia a nea ana, Ko le Sagato o Iselaele leia na fakatupu ia latou.

²¹ Kotou fai lakoutou tagi, E pati le Eteleno ; Kotou tuku mai akoutou fakamaoki, E pati le sau o Sakopo.

²² Ke lotou tuku mai latou ki loto, ti ke lotou fakasa mai kia matou Le nea leia e tonu ke soko. Koa a nea ala na kotou fakasa fakatomua i le temi kua sili ? Kotou fakasa mai latou, ke motou tokaga ki ai, Ti ke motou fakamaoki ki lolatou fakasoko ; Kapau e leai, kotou fakasa mai a nea ala ka soko i le temi ki muli !

²³ Io, kotou fakasa mai le nea leia ka soko loa ki muli, Ke motou iloa pe ko ni atua maoki koutou ! Kotou fai fua se nea e tasi, pe malie pe veli, Ke motou tio ki ai ti ke tou tio fakatasi ki ai.

²⁴ Ko leinei, ko koutou ko nea noa, Ti ko lakoutou gaoiaga ko le noa ; Ko se nea fakalialia le fanaki kia koutou.

²⁵ Na kau lagai se tagata mei le potu noleto, ti na au a ia ; I le potu esite, e too e ia loku igoa ; E takatakafi e ia le kau lalasi ofaipe le pela, Ofaipe le kele kula leia e takatakafi e le tagata faiipu.

²⁶ Ko ai na fakasa ia a ia i le kamataaga, o tupu ke motou iloa a ia ? Ti ko ai na fakasa fakatomua ia a ia mei fualoa, o tupu ke motou pati : E maoki ! Na leaise fakasa a ia e se tasi fua, na leaise fakasa fakatomua a ia e se tasi fua, Ti na leaise se logo fua se tasi ki akoutou masau.

²⁷ Ko au leia na uluaki pati ki Sione : Ko nei latou, ko nei latou ! Ko au leia na uluaki pati ki Selusalemi : E kau kakau se tagata avelogo o ni logo malilie !

²⁸ E kau tio saele, kae e leai fua se tasi, E leaise tasi fua ia latou e faikikite, Ti e mafai ke tali mai, mo ka kau vesili ki ai.

²⁹ Ko leinei, ko latou fuli ko nea noa, Ko alatou gaoi ko le noa, Ko olatou taulaatua ko se matagi noa.