Esaia 40 - Tosi Tapu

Ko le fakapelepele o Iselaele

¹ Kotou fakafimalie, kotou fakafimalie loku kakai ! E pati lokoutou Atua.

² Kotou masau ki le loto o Selusalemi, ti kotou kalaga kiate ia Kua oki lona popula, Kua fakamolemole lana agaveli, Kua maua e ia mei le lima o le Eteleno O liuga lua o ana agasala fuli.

³ Kua kalaga se leo : Kotou teuteu i le toafa le ala o le Eteleno, Kotou fakatokatoka i ganea kele kaka Se ala ki lotatou Atua.

⁴ Ke tanu a popoko fuli, Ke soloi ki lalo a mauga lalasi mo mauga liliki fuli ! Ke fakaliliu a patu fuli ko ni potu laumalie ! Ti ke fakaliliu a mauga liliki ko ni vaivailiua lalasi !

⁵ Ti e fakasa loa le kololia o le Eteleno, Ti e tio loa kiate ia a tagata fuli i le temi fai lena ; Talie kua folafola le gutu o le Eteleno.

⁶ Na pati se leo : Kalaga ! Ti na tali a ia : Kolea ke kau kalaga ? E tatau tagata fuli mo le mutie, Ti e tatau lona kololia mo le se o faisaga.

⁷ E malo le mutie, e vilo le se Mo ka agi loa le matagi a le Eteleno ki ai. E maoki, e fai le kakai pe le mutie :

⁸ E malo le mutie, e vilo le se ; Kae e tuu le folafola a lotatou Atua o lee gato.

⁹ Pale ki se mauga taualuga, Sione, o fakasa le logo malie ; Kalaga fakamakeke lou leo, Selusalemi, o fakasa le logo malie ; Kalaga leo lasi, aua na ke i, Pati ki kolo o Suta : Ko leinei lokoutou Atua !

¹⁰ Ko leinei, le Aliki, le Eteleno e au i lona mafimafi, Ti e pule lona lima ; Ko leinei, e au a ia mo le totogi, Ti e muamua a fakapale iate ia.

¹¹ Ofaipe se tagata tausi manu, e fagai loa e ia lana kau manu, E too loa e ia a akeno i ona lima, Ti e luluku loa e ia latou i lona fatafata ; E taki loa e ia a ovi fafine ala e fakau olatou uviki.

¹² Ko ai na fua ia le lasi o atu vai i lona alofilima ? Ko ai na fuafua ia le lau lasi o le lagi ki lona alofilima ? Ko ai na tanaki ia le kele katoa o le malama nei ke o i se pakete ? Ko ai na fua ia le mamafa o mauga lalasi mo mauga liliki ki se fua ?

¹³ Ko ai na oono ia le Laumalie o le Eteleno, Ti ko ai na fakamalama ia le Eteleno ki ana tokoi ?

¹⁴ Ko ai leia na felogoi mo ia ke ako ia a ia ? Ko ai na ako ia kiate ia le ala o le faitotonu ? Ko ai na ako ia kiate ia le poto, ti na fakailoilo ia kiate ia le ala o le atamai ?

¹⁵ Ko leinei, ko puleaga e faipe se fa moti vai i se pakete, E lotou faipe le efu i se fua ; Ko leinei, e fai a motu pe se efu maninifi leia e agina.

¹⁶ E leaise feauga a laakau fuli o Lipane ke tafu ai le afi, Ti e leaise feauga ona manu ke fai ai le failaulau.

¹⁷ E fai a atu puleaga fuli i ona mua pe se nea noa, E leai solatou ga uiga fua kiate ia.

¹⁸ Ko ai e kotou loto ke fakatatau ki ai le Atua ? Ti ko le fakatata fea leia e kotou fakatatau a ia ki ai ?

¹⁹ Ko se tagata tufuga leia e saka ia le ukamea o le fakatata, Ti ko se tagata gaoi ukamea leia e kofu ia le taulaatua ki le aulo, Ti e fakapipiki ia ki ai ni tini siliva.

²⁰ Ko leia e fakamaua e lona mativa ke soli ia se nea ikiiki, E filifili ia se potu laakau leia e leaise manua ; E kole e ia se tagata poto Ke fau ia se taulaatua leia e leaise taugaoi.

²¹ Pe leaise kotou iloa ? Pe na leaise kotou logo ki ai ? Pe na leaise fakasa atu kia koutou i le kamataaga ? Pe na leaise kotou fakakaukau i se aso ki le fakatupu o le malama nei ?

²² Ko ia leia e ekeeke i aluga o le lagi leia e takatakai ia le malama nei, Ti ko latou ala e nofo i ai e tatau mo lomimi ; E folasi e ia le lagi ofaipe se kie maamaa, E fola e ia latou ofaipe se falela, ke fai ai lona nofoaga.

²³ Ko ia leia e fakaliliu ia a aliki ko ni nea noa, Ti e fakaliliu ia a tui fakamaau o le malama nei ko se nea vaiga ;

²⁴ Na leaise to fua latou ki le kele, pe na muluki fua latou, Na leikiaise lotou maua foki ni olatou aka i le kele : Kae kua agi le matagi kia latou, ti kua lotou malo ai, Ti kua ave latou e se sasataki ofaipe ni penu.

²⁵ Ko ai e kotou fakatatau au ki ai, ti ko ai leia e kau tatau mo ia ? E pati le Maokioki.

²⁶ Kotou siki okoutou mata ki aluga, ti kotou tio ! Ko ai na fakatupu ia a nea ana ? Ko ai e fakasaele fakaatu ia olatou kau tau ? E kalagai e ia latou fuli i olatou igoa taki tasi ; I lona makeke lasi mo lona pule, E leaise puli fua se toka tasi.

²⁷ Kolea e ke pati ai Sakopo, Kolea e ke pati ai Iselaele : Kua munia loku ala i mua o le Eteleno, Kua galo loku agatonu ki loku Atua ?

²⁸ Pe leaise ke iloa ? Pe na leaise ke logo ki ai ? Ko le Eteleno ko le Atua o sekulo mo sekulo ; Ko ia leia na fakatupu ia le malama nei mei leia potupotu o kaku ki leia potupotu ; E leaise toe gaegae fua a ia, ti e leaise toe kaekae fua a ia ; E leaise mafai ke fuafua lona atamai.

²⁹ E soli e ia se makeke ki leia kua gaegae, Ti e fakaapele e ia ki le makeke leia kua oki lona makeke.

³⁰ Ko tupulaga koi tupu e gaegae ti e kaekae ; Ti ko le kau tupulaga kua katoa e sisiga ki lalo ;

³¹ Kae ko latou ala e fanaki ki le Eteleno e fakafoou lolatou makeke. E lotou toe malaga ki aluga o lele pe ni akuila ; E lotou makape, kae e leaise lotou kaekae ; E lotou saele, kae e leaise lotou gaegae.