Esaia 39 - Tosi Tapu

Ko le fakatalitali e Esekiasi o fakafofoga o Papilone

¹ I le temi foki lena, na fakamomoli loa e Melotake-Palatane, vosa o Palatane, sau o Papilone, se tosi mo se nea alofa kia Esekiasi, talie na logo loa a ia ki lona masaki mo lona toe mauli.

² Na fiafia loa Esekiasi i le nea lena, ti na fakasa loa e ia ki le kau fakafofoga o Papilone le ganea leia e tuku ai ona koloa mauiga, le paaga mo le aulo, mo nea fakamanogi, mo le lolo mauiga, mo ana masafu fuli, ti mo nea fuli ala na tanaki i ona fale koloa : Na leaise nea fua e tasi leia na leaise fakasa e Esekiasi kia latou i lona fale ti mo lona puleaga katoa.

³ Ti na ano loa le polofeta ko Esaia ki le sau ko Esekiasi, o pati kiate ia : Koa masau a tagata ana ? Na lotou au meifea ? Ti na tali loa Esekiasi : Na lotou au kiate au mei se fenua mamao, mei Papilone.

⁴ Ti na toe pati loa Esaia kiate ia : Koa nea ala na lotou tio ki ai i lou fale ? Ti na tali loa Esekiasi : Na lotou tio ki nea fuli ala e maua i loku fale : na leaise koloa fua e tasi leia na leaise kau fakatio latou ki ai.

⁵ Na pati loa Esaia kia Esekiasi : fakalogo mai ki le folafola a le Eteleno o kau tau !

⁶ Ko leinei, e soko mai loa ni aso, ti e fetuku loa ki Papilone a nea fuli ala e maua i lou fale ti mo nea fuli ala na tanaki e ou tamana o kaku mai ki le aso nei ; ti e leaise toe toe loa se nea fua e tasi, ko le folafola lena a le Eteleno.

⁷ Ti e too loa ou vosa totonu, ala na tupu meiate koe o fakaliliu ko ni enuke i le fale sau o le sau o Papilone.

⁸ Na tali loa Esekiasi kia Esaia : E malie le folafola a le Eteleno leia kua ke fakasa. Ti na toe pati loa a ia : Talie e tokamalie loa mo fimalie loa i loku mauli.